[1] ཡ་ཧུ་དཱ་ཡི་རྒྱལ་པོ་ཧི་ཟི་ཀི༌ཡཱའི། །མི་རྣམས་ཀྱིས་ནི་བཤུས་ནས་ཐོན་པ༌ཡི། །སོ་ལོ་མོན་གྱི་ལེགས་བཤད་འདི་ལྟ༌སྟེ།
[2] གསང་བར་བྱེད་པ་དཀོན་མཆོག་དཔལ་ཡིན༌ཞིང༌། །རྩད་གཅོད་པ་ནི་རྒྱལ་པོའི་གཟི་དཔལ༌ཡིན།།
[3] མཐོན་པོ་གནམ་དང་གཏིང་ཟབ་ས་གཞི༌བཞིན། །རྒྱལ་པོའི་སེམས་ཀྱང་རྟོགས་པར་མི་ནུས༌སོ།།
[4] དངུལ་གྱི་སྙིགས་རོ་ཕྱུང་ཞིག༌དང༌། །དངུལ་མགར་གྱིས་ནི་སྣོད་ཆས༌བཟོ།།
[5] ངན་པ་རྒྱལ་པོའི་མདུན་ནས༌སྐྲོད། །དྲང་བའི་ནང་དུ་རྒྱལ་ཁྲི༌བརྟན།།
[6] རྒྱལ་པོའི་དྲུང་དུ་རང་རློམ་བྱེད་མི༌རུང༌། །མི་ཆེན་ཁྲོད་དུ་རང་དགར་འགྲེང་མི༌རུང༌།།
[7] ཁྱོད་ཀྱིས་དངོས་སུ་མཐོང་བ༌ཡི། །སྐུ་དྲག་མདུན་དུ་འབེབས་པ༌ལས། །གྲལ་མགོར་ཕེབས་ཤོག་ཟེར་ན༌ལེགས།།
[8] རྟབ་རྟོབ་མི་ལ་འཐབ་ཕྱིར་འགྲོ་མི༌རུང༌། །དེ་ལྟར་བྱས་ཚེ་ཁྱོད་རང་ཁྱིམ་མཚེས༌ཀྱིས། །ངོ་ཚར་གཏད་ན་ཁྱོད་ཀྱིས་ཅི༌བྱའམ།།
[9] རྩོད་གཞི་ཡོད་ན་ཁྱིམ་མཚེས་ཁོ་ནར༌རྩོད། །གཞན་གྱི་གསང་བ་ཕྱི་ལ་འཆད་མི༌རུང༌།།
[10] བཤད་ན་ཐོས་པའི་མི་ཡིས་ཁྱོད་ལ༌སྡུག །ཁྱོད་རང་མིང་ངན་ལས་ནི་ཐར་མི༌འགྱུར།།
[11] ཚིག་གཅིག་སྨྲས་པ་གནད་ལ་ཁེལ་ན༌ནི། །དངུལ་གྱི་སྣོད་ནང་གསེར་གྱི་ཀུ་ཤུ༌འདྲ།།
[12] མཁས་པའི་ཞལ་ཏ་བཀའ་ལ་ཉན་པ༌ཡི། །རྣ་བར་མཚོན་ན་གསེར་གྱི་རྣ་ཆ༌དང༌། །བཙོ་མའི་གསེར་གྱི་རྒྱན་ཆ་ལྟ་བུ༌ཡིན།།
[13] བློ་སེམས་དཀར་བའི་བང་ཆེན༌དེ། །ཁོ་རང་མངག་མཁན་མི་ལ༌ནི། །སྟོན་ཐོག་བསྡུ་བའི་དུས་ཚིགས༌སུ། །ཁ་བའི་བསིལ་བུ་བཞིན་ཡིན༌ཏེ། །བདག་པོའི་སེམས་ཁམས་གསོ་བར༌བྱེད།།
[14] རྔན་པར་བསྟོད་ཀྱང་མི་སྦྱིན༌པ། །ཆར་བ་མེད་པའི་སྤྲིན་དང༌མཚུངས།།
[15] ཡུན་རིང་བཟོད་བསྲན་བྱེད་མཁན༌གྱིས། །དཔོན་པོའི་བློ་ཁ་བསྒྱུར་བ༌དང༌། །ལྕེ་འཇམ་གྱིས་ནི་རུས་པ༌གཅོག །
[16] སྦྲང་རྩི་ཐོབ་ན་འཇུ་ཚད༌ཟོ། །མང་མང་ཟོས་ན་སྐྱུག་པར༌འགྱུར།།
[17] ཁྱིམ་མཚེས་ནང་དུ་རྐང་པ་སྤོ་མ༌མང༌། །མང་ན་ཁོ་ནི་ཁྱོད་ལ་སུན་ཞིང༌སྡང༌།།
[18] རྫུན་གྱི་དཔང་པོས་ཁྱིམ་མཚེས་ལ་འཚེ༌མཁན། །ཐོ་བ་རལ་གྲི་རྣོན་པོ་མདའ་དང༌འདྲ།།
[19] ཆག་སྒོ་འབྱུང་དུས་ཁྲམ་པར་བརྟེན་པ༌ནི། །སོ་ཆག་ཚིགས་འབུད་རྐང་པར་བརྟེན་དང༌མཚུངས།།
[20] སྐྱོ་གདུང་སེམས་ལ་གླུ་གཞས་ལེན་པ༌ནི། །འཁྱག་པའི་དུས་སུ་གྱོན་གོས་ཕུད་པ༌དང༌། །རྨ་ཁའི་སྟེང་ལ་སྐྱུར་ཁུ་བླུགས་འདྲ༌ཡིན།།
[21] ཁྱོད་ཀྱི་དགྲ་བོ་ལྟོགས་ན་ཁ་ཟས༌བྱིན། །སྐོམ་པ་བྱུང་ན་དེ་ལ་འཐུང་ཆུ༌སྦྱིན།།
[22] གང་ལ་ཞེ་ན་དེ་བཞིན་སྒྲུབ་པ༌ནི། །དེ་ཡི་མགོ་ལ་སོལ་མེ་སྤུངས་པ༌ཡིན། །ཡ་ཝཱེས་ཁྱོད་ལ་བྱ་དགའ་གནང་བར༌འགྱུར།།
[23] བྱང་རླུང་གིས་ནི་ཆར་བ་འདྲེན་པ༌ལྟར། །ལྐོག་ངན་སྨྲ་བའི་ལྕེ་ཡིས་ངོ་གདོང༌གནག །
[24] བུད་མེད་འཁོན་ཞུགས་མཉམ་དུ་ཁང་པར་སྡོད་པ༌ལས། །ཁང་པའི་ཀླད་ཀྱི་གྲུ་ཟུར་སྡོད་པ་ཅིས་མི༌ལེགས།།
[25] རྒྱང་རིང་ཡུལ་ནས་ཐོན་པའི་གཏམ་བཟང༌ནི། །ངལ་བའི་མི་ལ་གྲང་མོ་ཆུ་བཞིན༌ཡིན།།
[26] ངན་པའི་མདུན་དུ་དྲང་པོ་མགོ་བསྒུར༌ན། །རྙོག་པའི་ཆུ་མིག་སྦགས་པའི་ཁྲོན་པ༌བཞིན།།
[27] སྦྲང་རྩི་ཚད་མེད་སྤྱད་ན་མི་ལེགས༌ཤིང༌། །རང་ལ་བཀུར་སྟི་འཚོལ་བ་དེ་བཞིན༌ཡིན།།
[28] རང་གི་སེམས་ལ་ཚོད་འཛིན་མི་བྱེད༌ན། །ལྕགས་རི་མེད་པའི་ཞིག་རལ་གྲོང་དང༌མཚུངས།།