[1] གཙོ་བོ་ཡ་ཝཱེའི་བཀའ་ནི་ཕེ་ཏུ་ཨེལ་གྱི་བུ་ཡོ་ཨེལ་ལ་བྱུང་པ།
[2] ཀྱེ་རྒན་པ་རྣམས་ཀྱིས་གཏམ་འདི་ལ་ཉོན་ཞིག ཀྱེ་ཡུལ་འདིའི་མི་སྡེ་ཐམས་ཅད་ཀྱིས་རྣ་བ་གཏད་དེ་གཏམ་འདི་ལ་ཉོན་ཞིག ཁྱོད་རང་གི་དུས་དང་། ཁྱོད་ཚོའི་ཕ་མེས་རྣམས་ཀྱི་དུས་ལ་འདི་འདྲ་བྱུང་མྱོང་ངམ།
[3] ཁྱོད་རྣམས་ཀྱིས་དོན་འདི་ནི་རང་གི་བུ་རྒྱུད་རྣམས་དང་། དེ་རྣམས་ཀྱིས་དེ་དག་གི་ཚ་རྒྱུད་རྣམས་དང་། དེའི་རྣམས་ཀྱིས་དེ་དག་གི་བུ་རྒྱུད་ལ་ཤོད་ཅིག
[4] ལྡག་མཁན་ལས་ལུས་པ་ཆ་ག་འབུ་ཡིས་ཟོས་ཏེ། ཆ་ག་འབུ་ལས་ལུས་པ་དེའི་འབུ་ཆུང་གིས་ཟོས་ཏེ། འབུ་ཆུང་ལས་ལུས་པ་དེ་མིད་མཁན་གྱིས་ཟོས།
[5] ཀྱེ་ཆང་ལ་བཟི་མཁན་རྣམས་ནི་གཉིད་ལས་སད་པར་བྱོས་ལ་ངུས་ཤིག ཆང་ལ་དགའ་བ་ཁྱོད་ཐམས་ཅད་རྒུན་ཆང་མངར་མོའི་ཕྱིར་སྨྲེ་སྔགས་ཐོང་ཞིག གང་ལ་ཞེ་ན། ཆང་དེ་ནི་ཁྱེད་ཀྱི་ཁ་ལས་བྲལ་པའི་ཕྱིར།
[6] ཆ་ག་འབུའི་དཔུང་ཚོགས་སྟོབས་ལྡན་གྲངས་ལས་འདས་པ་ཞིག་ངའི་ཡུལ་ལ་ཡར་ཚུར་རྒོལ་བྱེད་དུ་འོང་སྟེ། དེའི་སོ་རྣམས་ནི་སེང་གེའི་སོ་དང་། མོ་སེང་གི་མཆེ་བ་དང་འདྲ།
[7] དེས་ངའི་རྒུན་ཤིང་ལ་གཏོར་བརླག་བྱས་པ་དང་། ངའི་སེ་ཡབ་ཤིང་བཅག་སྟེ། དེའི་སྡོང་ཤུན་བཤུས་ནས། ཡལ་ག་རྣམས་ལུས་པར་གྱུར།
[8] ཇི་ལྟར་ཁྱོད་ནི་ན་ཆུང་མ་ཞིག་གིས་སྐེད་པར་གཙོ་མོས་གཡོགས་ཏེ། རང་གི་གཞོན་ནུ་ཁྱོ་གའི་ཕྱིར་དུ་ངུ་འབོད་བྱེད་དགོས་སོ།།
[9] གཙོ་བོ་ཡ་ཝཱེའི་ཕོ་བྲང་ནི་དཀར་མཆོད་དང་ཆང་མཆོད་ལས་བྲལ་པས། གཙོ་བོ་ཡ་ཝཱེར་ཞབས་ཞུ་བྱེད་མཁན་མཆོད་དཔོན་རྣམས་ཀྱང་སྡུག་གོ །
[10] ས་ཞིང་སྟོངས་ནས་ས་གཞི་ཡང་སྐྱོ། འབྲུ་རིགས་སྣ་ལྔ་བརླགས་པས། རྒུན་ཆང་གསར་པ་ནི་སྐམ། སྣུམ་གསར་ཡང་དཀོན།
[11] ཀྱེ་ཀྱེ་ཞིང་པ་རྣམས། ཁ་སྐྱེངས་ཤིག ཀྱེ་ཀྱེ་རྒུན་ཚལ་ར་བ་བདག་བྱེད་མཁན་རྣམས། ཁྱོད་ཚོས་ངུ་འབོད་བྱོས་དང་། གང་ལ་ཞེ་ན། སོ་བ་དང་གྲོ། ཞིང་ཁའི་སྟོན་ཐོག་ཐམས་ཅད་བརླགས་པའི་ཕྱིར།
[12] རྒུན་འབྲུམ་ཤིང་ནི་སྐམས་ཏེ། སེ་ཡབ་ཤིང་ནི་རྙིད། སེ་འབྲུ་དང་ཁ་སུར་ཤིང་དང་ཀུ་ཤུའི་ཤིང་མ་གཏོགས། ཞིང་ཁའི་ཤིང་སྡོང་ཐམས་ཅད་ཀྱང་སྐམས། དེའི་ཕྱིར་མི་རྣམས་ཀྱི་ཁྲོད་ན་དགའ་སྤྲོ་མེད་པར་གྱུར་ཏོ།།
[13] ཀྱེ་མཆོད་དཔོན་རྣམས། གཙོ་མ་དཀྲིས་ནས་མྱ་ངན་བྱོས་ཤིག ཀྱེ་མཆོད་ཁྲི་ལ་ཞབས་ཏོག་བྱེད་མཁན་རྣམས། ངུ་འབོད་བྱོས་ཤིག ཀྱེ་ངའི་དཀོན་མཆོག་གི་ཞབས་ཞུ་པ་རྣམས། ཁྱོད་ཚོ་ཡར་འོང་ནས་གཙོ་མ་གྱོན་ཏེ་མཚན་རོལ་ཞིག ། གང་ལ་ཞེ་ན། ཁྱོད་ཚོའི་དཀོན་མཆོག་གི་ཕོ་བྲང་དུ་དཀར་མཆོད་དང་ཆང་མཆོད་འབུལ་འཕྲོ་བཅད་པའི་ཕྱིར།
[14] ཁྱོད་ཚོས་སྨྱུང་གནས་ཀྱི་དུས་ནི་དམ་པར་རྩིས་ལ། ཚོགས་འདུ་གཟབ་ནན་ངང་ཡོངས་སུ་སྒྲོགས་དང་། ས་འདིའི་རྒན་པོ་རྣམས་དང་ཡུལ་མི་ཐམས་ཅད་ཡ་ཝཱེ་ཁྱོད་རང་གི་དཀོན་མཆོག་གི་ཕོ་བྲང་ནང་དུ་བསྡུས་ནས། གཙོ་བོ་ཡ་ཝཱེ་ལ་འོ་དོད་ཐོང་ཞིག
[15] ཉིན་མོ་དེའི་ཕྱིར་སྐྱོ་བ་ལ། གང་ལ་ཞེ་ན། གཙོ་བོ་ཡ་ཝཱེའི་ཉིན་མོ་དེ་ནི་ཉེ་སྟེ། ཡང་ཀུན་དབང་གི་ཕྱོགས་ནས་འཆི་བ་འོང་པ་འདྲ།
[16] འབྲུ་རིགས་ངེད་རྣམས་ཀྱི་མདུན་ནས་ཚར་བ་མ་ཡིན་ནམ། ངེད་ཀྱི་དཀོན་མཆོག་གི་ཕོ་བྲང་ནང་དུའང་དགའ་བ་དང་སྐྱིད་པ་མེད་པར་གྱུར་པ་མ་ཡིན་ནམ།
[17] ས་བོན་ས་འོག་ན་རུལ་ཏེ། འབྲུ་མཛོད་ཁང་སྟོངས་པར་འདུག འབྲུ་རིགས་སྐམས་པས་བང་ཁང་རྣམས་བརྟིབས།
[18] དུད་འགྲོས་སྨྲེ་སྔགས་འདོན། གླང་ཁྱུ་རྣམས་ཟང་ཟིང་དུ་གྱུར། གང་ལ་ཞེ་ན། རྩྭ་ས་མེད་པའི་ཕྱིར་ལུག་ཁྱུས་ཀྱང་སྡུག་མྱངས་སོ།།
[19] ཀྱེ་གཙོ་བོ་ཡ་ཝཱེ་ལགས། ངས་ཁྱེད་ལ་འོ་དོད་གཏོང་ངོ་། ཅི་ལ་ཞེ་ན། ཐང་རྒོད་ཀྱི་རྩྭ་ས་རྣམས་མེས་བསྲེགས་ཏེ། ཞིང་ཁའི་ཤིང་སྡོང་ཐམས་ཅད་མེ་ལྕེས་འཚིག་པར་བྱས།
[20] ཆུ་ཕྲན་རྣམས་སྐམས་ཏེ། ཐང་རྒོད་ཀྱི་རྩྭ་ས་རྣམས་མེས་བསྲེགས་པས། རི་ཐང་གི་རི་དྭགས་རྣམས་ཀྱིས་ཀྱང་ཁྱེད་ལ་ཡིད་སྨོན་བྱེད་དོ།།