[1] ཁྱོད་ཚོས་ཛ་ཡན་ན་དུང་ཕུས་ལ། ངའི་རི་དམ་པ་ནས་ཉེན་བརྡ་ཐོངས་དང་། ཡུལ་འདིའི་མི་ཀུན་འདར་དུ་ཆུག་ལ། གང་ལ་ཞེ་ན། གཙོ་བོ་ཡ་ཝཱེའི་ཉིན་མོ་ཐོན་ལ་ཉེ། ཐོན་བཞིན་པའི་ཕྱིར།
[2] དེ་ནི་མུན་ནག་དང་འཇིགས་རུང་གི་མིན་པ་འཐིབས་པའི་ཉིན་མོ། སྤྲིན་ནག་དང་མུན་ནག་འཐིབས་པའི་ཉིན་མོ་སྟེ། དེ་ནི་སྐྱ་རེངས་རི་རྒྱུད་ལ་ཤར་པ་དང་། ཆེ་ལ་སྟོབས་དང་ལྡན་པའི་ཆ་ག་པའི་དཔུང་ཚོགས་ཤིག་དང་འདྲ་བར། དེ་དང་འདྲ་བ་སྔར་ནམ་ཡང་མ་བྱུང་ལ། ཕྱིས་སུའང་མི་རབས་ནས་མི་རབས་སུ་ནམ་ཡང་འབྱུང་བར་མི་འགྱུར་རོ།།
[3] དེ་དག་གི་མདུན་ན་མེ་ཡིས་ཁྱུར་མིད་གཏོང་པ་དང་། རྒྱུབ་ན་སྲེག་བྱེད་ཀྱི་མེ་ལྕེ་འདུག དེ་དག་མ་ཡོང་སྔོན་དུ་ས་གཞི་ཨེ་དེན་ལྡུམ་ར་དང་མཚུངས། དེ་དག་སོང་རྗེས་ས་གཞི་ནི་དབེན་སྟོང་དུ་གྱུར་ཏེ། དེ་དག་ལས་གཅིག་ཡང་མ་ཐར་ཏོ།།
[4] དེ་དག་གི་དབྱིབས་ནི་རྟ་བཞིན་དང་། དམག་རྟ་བཞིན་དུ་དེ་རྣམས་རྒྱུག
[5] སྒྲ་ནི་ཤིང་རྟ་དེ་དག་རི་རྩེ་རྣམས་ལ་མཆོང་པ་དང་། མེ་ལྕེས་སོག་རོ་འབར་བ་དང་འདྲ་སྟེ། ཡང་སྟོབས་དང་ལྡན་པའི་དམག་དཔུང་གིས་འཐབ་མོ་བསྒྲིགས་པ་འདྲའོ།།
[6] དེ་དག་གི་མདུན་དུ་མི་རྣམས་སྡུག་ཅིང་ངོ་མདོག་ཡང་འགྱུར་རོ།།
[7] དེ་དག་ནི་དཔའ་བོ་ལྟར་རྒྱུག་ཅིང་། དམག་མི་བཞིན་དུ་རྩིག་པར་འཛེགས་ཏེ། རེ་རེ་རང་གི་ལམ་ནང་ཕྱིན་ཏེ་གྲལ་མི་འཆོལ།
[8] དེ་ཚོས་ཕན་ཚུན་མི་འཕུད་པར་རང་གི་ལམ་ནང་ཞུགས་ཏེ། འགོག་སྲུང་དག་ལས་བརྒལ་ཏེ་མཚམས་མ་ཆད།
[9] དེ་རྣམས་གྲོང་ཁྱེར་དུ་རྒྱུག་ཅིང་། རྩིག་པར་མཆོང་ཞིང་ཁང་པར་འཛེགས་ཏེ།རྐུན་མ་བཞིན་དུ་དཀར་ཁུང་ནང་ནས་འཛུལ།
[10] དེ་དག་གི་མདུན་དུ་ས་ནི་འགུལ་ཞིང་རི་ནི་འདར། ཉི་མ་དང་ཟླ་བ་འགྲིབ་པ་དང་། སྐར་ཚོགས་རྣམས་ལ་འོད་སྣང་ཟད།
[11] གཙོ་བོ་ཡ་ཝཱེས་ཉིད་ཀྱི་དམག་དཔུང་གྱི་མདུན་དུ་གསུང་སྐད་འདོན་པ་དང་། ཁོང་གི་དམག་དཔུང་རབ་ཏུ་རྒྱ་ཆེའོ།། དེ་ཅིའི་ཕྱིར་ཞེ་ན། ཁོང་གི་བཀའ་བཞིན་སྒྲུབ་མཁན་དེ་ནི་མཐུ་དང་ལྡན་པའོ།། གཙོ་བོ་ཡ་ཝཱེའི་ཉིན་མོ་རབ་ཏུ་ཆེ་ལ་ཤིན་ཏུ་འཇིགས་སུ་རུང་བ་ཡིན་པས། སུས་དེ་བཟོད་པར་ནུས་སམ།
[12] ཡིན་ཡང་ད་ལྟ་ཁྱོད་ཚོས་སྨྱུང་གནས་སྲུང་སྟེ། ངུ་ཞིང་འོ་དོད་བོས་དང་། སེམས་ཧྲིལ་པོས་བདག་གི་ཕྱོགས་སུ་སྒྱུར་ཞིག་ཅེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[13] ཡང་ཁྱོད་ཚོས་རང་གི་གོས་མི་གཤགས་པར། སེམས་ཁམས་འཁྲུག་པར་བྱས་ནས་ཁྱོད་ཅག་གི་དཀོན་མཆོག་ཡ་ཝཱེའི་ཕྱོགས་སུ་ལོག་ཅིག་ཅེས་གསུངས་སོ།། ཅི་ལ་ཞེ་ན། ཁོང་ནི་ཐུགས་རྗེ་ཅན་དང་སྙིང་རྗེ་ཆེན་པོ་མངའ་བ། རང་དགར་ཐུགས་མི་ཁྲོ་བ། བྱམས་བརྩེ་མཐའ་ཡས་པར་མ་ཟད། བློ་ཁ་བསྒྱུར་ནས་ཆག་སྒོ་མི་མཛད་པ་ཡིན་ནོ།།
[14] ཡ་ཝཱེ་ཁྱོད་རང་གི་དཀོན་མཆོག་ལ་འབུལ་པའི་དཀར་མཆོད་དང་ཆང་མཆོད་ལ། སུ་ཞིག་གིས་ཁོང་ཉིད་ཐུགས་བསྒྱུར་ཏེ་བྱིན་རླབས་གནང་མི་སྲིད་པ་ཤེས་སམ།
[15] ཁྱོད་ཚོས་ཛ་ཡན་ན་དུང་ཕུས་ལ། སྨྱུང་གནས་ཀྱི་དུས་ནི་དམ་པར་བྱོས་དང་། ཚོགས་འདུ་དམ་པོར་སྒྲོགས་ཤིག
[16] མི་སྡེ་སྡུས་ལ། ཆོས་ཚོགས་དམ་པར་བྱོས། རྒན་རབས་རྣམས་སྡུས་ལ། ཕྲུ་གུ་དང་མ་ལས་འོ་འཐུང་རྣམས་ཀྱང་སྡུས་ཤིག་དང་། ཡང་མག་པ་རང་གི་ནང་མིག་དང་། བག་མ་རང་གི་ཟུར་ཚང་དང་བྲལ་བར་བཅུག
[17] ཡ་ཝཱེའི་ཞབས་ཏོག་པ་མཆོད་དཔོན་རྣམས་སྒོ་ཁང་དང་མཆོད་ཁྲིའི་མཚམས་སུ་ངུ་ཞིང་ན་རེ། ཀྱེ་གཙོ་བོ་ཡ་ཝཱེ་ལགས། ཉིད་ཀྱི་མི་སྡེ་ལ་བརྩེ་བར་མཛོད་ཅིག ཉིད་ཀྱི་ནོར་སྐལ་ལ་སྨད་པར་མཛད་དེ། རྒྱལ་ཁབ་རྣམས་ཀྱི་ནང་དུ་བཞད་གད་དུ་མི་འགྱུར་བར་མཛོད་ཅིག ཅིའི་ཕྱིར་མི་རྒྱུད་ཀྱི་ནང་ན་དེ་དག་གི་དཀོན་མཆོག་གང་ན་ཡོད་ཅེས་སྨྲ་རུ་འཇུག་གམ།
[18] དེའི་ཚེ་གཙོ་བོ་ཡ་ཝཱེས་ཉིད་ཀྱི་ཡུལ་སྡེའི་ཕྱིར་སྙིང་རྗེ་སྐྱེས་ཏེ། ཉིད་ཀྱི་མི་སྡེ་ལ་སྙིང་རྗེ་དགོངས་ཏེ།
[19] གཙོ་བོ་ཡ་ཝཱེས་ཉིད་ཀྱི་མི་སྡེ་ལ་བཀའ་ལན་གནང་ཞིང་འདི་སྐད་དུ། ལྟོས་ཤིག བདག་གིས་ཁྱོད་རྣམས་ལ་འབྲུ་རིགས་དང་རྒུན་ཆང་། སྣུམ་གསར་བ་གནང་སྟེ། ཁྱོད་ཅག་དེར་ཚིམ་པར་འགྱུར་ལ། ཡང་བདག་གིས་ཁྱོད་ཅག་རྒྱལ་ཁབ་ནང་དུ་སྨད་པར་མི་མཛད་ཅིང་།
[20] བདག་གིས་བྱང་གི་དམག་དཔུང་ཁྱོད་ལས་རྒྱང་དུ་བསྐྲད་དེ། དེ་དག་ས་སྟོང་དང་དབེན་སྟོང་དུ་འདེད་ཅིང་། དེའི་ཁག་སྔོན་མ་ཤར་རྒྱ་མཚོ་དང་། ཁག་རྗེས་མ་ནུབ་རྒྱ་མཚོའི་ནང་དུ་འདེད་པ་དང་། དེ་ལས་དྲི་ངན་བྱུང་ནས་ནམ་མཁའ་ཡོངས་ལ་འཐིབས་པར་འགྱུར་ཏེ། ཅིའི་ཕྱིར་ཞེ་ན། ཡ་ཝཱེས་དོན་ཆེན་མཛད་པའི་ཕྱིར་རོ།།
[21] ཀྱེ་ཡུལ་ཁམས་མ་འཇིགས་པར་དགའ་བར་གྱིས་དང་། ཅི་ལ་ཟེར་ན། གཙོ་བོ་ཡ་ཝཱེས་དོན་ཆེན་མཛད་པའི་ཕྱིར།
[22] རི་ཐང་གི་དུད་འགྲོ་ཁྱོད་ཅག་མ་འཚབས་ཤིག ཅིའི་ཕྱིར་ཞེ་ན། དབེན་སྟོང་གི་རྩྭ་གཟན་ནི་སྐྱེ་ཞིང་། ཤིང་སྡོང་ལ་འབྲས་བུ་ཐོགས་པ་དང་། སེ་ཡབ་ཤིང་དང་རྒུན་ཤིང་གིས་ཀྱང་རང་ཤུགས་ཕྱི་རུ་འབྱིན་ནོ།།
[23] ཀྱེ་ཀྱེ་ཛ་ཡན་གྱི་མི་སྡེ་ཁྱོད་རྣམས་དགའ་བར་གྱུར་ཅིག ཡ་ཝཱེ་ཁྱོད་རང་གི་དཀོན་མཆོག་གི་ནང་ན་སྤྲོ་བར་གྱུར་ཅིག ཅིའི་ཕྱིར་ཞེ་ན། ཁོང་གིས་སྟོན་ཁའི་ཆར་པ་ཁྱོད་རྣམས་ལ་གནང་ཞིང་། ཁྱོད་ཚོའི་ཕྱིར་དུ་བདུད་རྩི་གནང་། སྔར་བཞིན་སྔ་ཕྱིའི་ཆར་ཆུ་གནང་པར་མཛད།
[24] གཡུལ་ཁ་གྲོ་ཡིས་བཀང་ཞིང་། ཆང་གཞོང་རྣམས་ལས་རྒུན་ཆང་དང་སྣུམ་གསར་གྱིས་བཀང་པར་མཛད།
[25] བདག་གིས་ཁྱོད་ཚོའི་གམ་དུ་མངགས་པའི་དམག་དཔུང་སྟེ། ཆ་ག་འབུ་དང་དེའི་འབུ་ཆུང་། དེ་མིད་མཁན་དང་ལྡག་མཁན་རྣམས་ཀྱིས་སྔོན་ལ་ཟོས་པ་ཡོད་ཚད། བདག་གིས་ཁྱོད་ཚོའི་ཚབ་ཏུ་ཡང་བསྐྱར་གནང་ངེས་ཡིན།
[26] ཡང་ཁྱོད་རྣམས་ཀྱིས་ཟོས་ཀྱང་ཡིད་ཚིམ་པར་འགྱུར་ཏེ། ཁྱོད་རྣམས་ལ་དོན་ངོ་མཚར་ཅན་མཛད་པའི་ཡ་ཝཱེ་རང་གི་དཀོན་མཆོག་གི་མཚན་ལ་སྟོད་བསྔགས་བརྗོད་ཅིག དེའང་ངའི་མི་སྡེ་ནམ་ཡང་སྐྱེངས་པར་མི་འགྱུར།
[27] དེ་ནས་བདག་ནི་ཡེས་ར་ཨེལ་གྱི་ཁྲོད་ན་བཞུགས་པ་དང་། ཁྱོད་ཀྱི་དཀོན་མཆོག་ལགས་པའི་ཡ་ཝཱེ་བདག་མ་གཏོགས་པར་གཞན་དཀོན་མཆོག་གང་ཡང་མེད་པ་ཁྱོད་རྣམས་ཀྱིས་ཤེས་པར་འགྱུར་ཞིང་། ངའི་མི་སྡེ་ནམ་ཡང་སྐྱེངས་པར་མི་འགྱུར་རོ།།
[28] དེའི་འོག་ཏུ། བདག་གིས་ཉིད་ཀྱི་ཐུགས་ཉིད་ནི་ཤ་ཁྲག་ཡོད་པ་ཐམས་ཅད་ཐོག་ཏུ་དབབ་པར་བྱ་བ་དང་། ཁྱོད་ཚོའི་བུ་དང་བུ་མོ་རྣམས་ཀྱིས་ལུང་བསྟན་ཞིང་། རྒན་པོ་རྣམས་ཀྱིས་རྨི་ལམ་ཡ་མཚན་རྨི་ཞིང་། གཞོན་ནུ་རྣམས་ཀྱིས་ཞལ་གཟིགས་རྣམས་མཐོང་བར་འགྱུར།
[29] ཉིན་མོ་དེ་རྣམས་ན་བདག་གིས་ཉིད་ཀྱི་ཐུགས་ཉིད་བྲན་པོ་དང་བྲན་མོ་རྣམས་ལའང་དབབ་པར་བྱའོ།།
[30] ཡང་བདག་གིས་ནམ་མཁའ་དང་ས་གཞི་རུ་དོན་ངོ་མཚར་ཅན་མངོན་དུ་འགྱུར་ཞིང་། ཁྲག་དང་མེ་དང་དུ་ཞག་གྱེན་འཕྱུར་བྱེད་དུ་འཇུག
[31] ཉི་མ་ནི་མུན་ནག་དང་ཟླ་བ་ནི་ཁྲག་ཏུ་འགྱུར་ཞིང་། དེ་ཡོད་ཚད་གཙོ་བོ་ཡ་ཝཱེའི་ཆེ་ལ་འཇིགས་སུ་རུང་བའི་ཉིན་མོ་མ་བསླེབ་སྔོན་དུ་འབྱུང་པར་འགྱུར།
[32] དུས་དེར། སུ་ཡིས་གཙོ་བོ་ཡ་ཝཱེའི་མཚན་བརྗོད་པ་དེ་ཐར་བར་འགྱུར་ལ། ཅིའི་ཕྱིར་ཞེ་ན། གཙོ་བོ་ཡ་ཝཱེས་གསུངས་པ་བཞིན་དུ། རི་བོ་ཛ་ཡན་དང་ཡེ་རུ་སཱ་ལེམ་ན་ཐར་པ་དང་། ལྷག་མའི་ནང་ནས་གཙོ་བོ་ཡ་ཝཱེས་འབོད་པར་མཛད་པ་རྣམས་ལུས་པར་འགྱུར་པའི་ཕྱིར་རོ།།