[1] ལྟོས་ཤིག ཉིན་མོ་དེ་རྣམས་དང་དུས་དེའི་ནང་དུ་བདག་གིས་ཡ་ཧུ་དཱ་དང་ཡེ་རུ་སཱ་ལེམ་གཉིས་ཀྱི་བཙོན་པ་རྣམས་སླར་འོང་པའི་དུས་དེ་ལ།
[2] བདག་གིས་མི་སྡེ་ཐམས་ཅད་བསྡུས་ནས། དེ་རྣམས་ཡེ་ཧོ་ཤ་ཕད་ཀྱི་ལུང་པར་ཁྲིད་དེ། གནས་དེར་བདག་གིས་ཉིད་ཀྱི་མི་སྡེ་དང་། བདག་གི་ནོར་སྐལ་ཡེས་ར་ཨེལ་གྱི་ཕྱིར་དུ་མི་སྡེ་རྣམས་ལ་ཉེས་ཆད་གཅད་ངེས་ཏེ། ཅིའི་ཕྱིར་ཞེ་ན། དེ་རྣམས་ཀྱིས་ངའི་མི་སྡེ་རྣམས་རྒྱལ་ཁབ་གཞན་དུ་ཁྱབ་པར་བཅུག་པ་དང་། ངའི་ཡུལ་ཐམས་ཅད་བགོས་པའི་ཕྱིར་རོ།།
[3] ཡང་ངའི་མི་སྡེ་ནང་ནས་རྒྱན་བརྒྱབ་སྟེ། སྨད་འཚོང་མ་ཞིག་གི་ཚབ་ཏུ་བུ་ཞིག་བཏང་། རྒུན་ཆང་གི་ཕྱིར་བུ་མོ་ཞིག་བཙོངས།
[4] ཀྱེ་ཐཱར་དང་ཚི་ཏུན། ཕེ་ལེ་ཤེད་ཀྱི་ཡུལ་འཁོར་གྱི་མི་རྣམས། ཁྱོད་རྣམས་བདག་དང་འབྲེལ་ཅི་ཡོད། ཁྱོད་རྣམས་ཀྱིས་བདག་ལ་འཁོན་ལན་སློག་གམ། གལ་ཏེ་བདག་ལ་འཁོན་ལན་སློག་ན། བདག་གིས་འབྲས་བུ་དེ་མྱུར་དུ་ཁྱོད་རང་གི་མགོ་ལ་ཕྱིར་ཟློག་པར་བྱའོ།།
[5] ཁྱོད་རྣམས་ཀྱིས་ངའི་དངུལ་དང་གསེར་ཁྱེར་ནས། ངའི་རྩ་ཆེན་རིན་པོ་ཆེ་རྣམས་ཁྱེར་ཏེ་རང་གི་ལྷ་ཁང་རྣམས་སུ་བཞག་པ་དང་།
[6] ད་དུང་ཡ་ཧུ་དཱ་དང་ཡེ་རུ་སཱ་ལེམ་གྱི་པ་རྣམས་རང་གི་ཡུལ་ལས་ཁ་བྲལ་པའི་ཕྱིར་གྷི་རི་སི་པ་རྣམས་ལ་བཙོངས།
[7] ལྟོས་ཤིག བདག་གིས་དེ་རྣམས་ལ་སྐུལ་ནས། ཁྱོད་རྣམས་ཀྱིས་དེ་དག་བཙོངས་པའི་གནས་དེ་ལས་བྲལ་པར་འཇུག་ལ། ཡང་དེའི་འབྲས་བུ་ནི་ཁྱོད་རང་གི་མགོ་ལ་ཕྱིར་ཟློག་པར་བྱའོ།།
[8] ཡང་བདག་གིས་ཁྱོད་ཀྱི་བུ་དང་བུ་མོ་རྣམས་ཡ་ཧུ་དཱ་པ་རྣམས་ཀྱི་ལག་ཏུ་བཙོང་པ་དང་། དེ་དག་གིས་དེ་རྣམས་རྒྱང་རིང་པོར་གནས་པའི་ཤ་བ་པ་རྣམས་ལ་བཙོང་བར་འགྱུར་རོ།། གང་ལ་ཞེ་ན། གཙོ་བོ་ཡ་ཝཱེས་དེ་སྐད་དུ་གསུངས་པའི་ཕྱིར།
[9] རྒྱབ་ཁབ་ནང་དུ་ཁྱབ་བསྒྲགས་བྱས་ཏེ། དམག་རྒྱག་པ་ལ་གྲ་སྒྲིག་བྱེད་པ་དང་། དཔའ་བོ་རྣམས་ལ་སྐུལ་ཏེ།དམག་ཐམས་ཅད་ཡར་ཡོང་པར་འཇུག་ལ།
[10] རང་གི་རྨོ་ལྕགས་བརྡུངས་ནས་རལ་གྲི་དང་། ཟོར་བ་རྣམས་ལས་མདུང་བཟོས་ལ། ཉམས་ཆུང་དག་གིས་ང་ནི་དཔའ་བོ་ཡིན་ཞེས་བརྗོད་ངེས།
[11] ཀྱེ་ཕྱོགས་བཞིའི་རྒྱབ་ཁབ་རྣམས། མྱུར་དུ་ཡར་འོང་སྟེ་མཉམ་དུ་འདུས་དང་། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་དཔའ་བོ་རྣམས་འོང་པར་མཛོད།
[12] རྒྱལ་ཁབ་རྣམས་འཕེལ་ཏེ། ཡེ་ཧོ་ཤ་ཕད་ཀྱི་ལུང་པར་ཡར་འོང་དུ་ཆུག་དང་། ཅིའི་ཕྱིར་ཞེ་ན། ཕྱོགས་བཞིའི་རྒྱལ་ཁབ་ཐམས་ཅད་ལ་ཉེས་ཆད་གཅད་པའི་ཕྱིར། བདག་ནི་གནས་དེར་བཞུགས།
[13] ཞིང་སྨིན་བས་ཟོར་བས་བྲེག་དང་། ཆང་གཞོང་བཀང་བས་ཤོག་ལ་རྫིས་ཤིག ཆང་རྫིང་ཡང་བཀང་སྟེ། རྒྱུ་མཚན་དེ་དག་གི་སྡིག་པ་ཆེ་པའི་ཕྱིར།
[14] ཐག་ཆོད་ལུང་པ་ན་མི་ཚོགས་ཤིན་ཏུ་མང་ལ། ཅིའི་ཕྱིར་ཞེ་ན། ཐག་ཆོད་ལུང་པར་གཙོ་བོ་ཡ་ཝཱེའི་ཉིན་མོ་དེ་ཉེ་པའི་ཕྱིར།
[15] ཉི་མ་དང་ཟླ་བ་འགྲིབ་ཅིང་། སྐར་ཚོགས་རྣམས་ལ་འོད་སྣང་ཟད།
[16] དེའང་གཙོ་བོ་ཡ་ཝཱེས་ཛ་ཡན་ན་གསུང་སྐད་སྒྲོག་ཅིང་། ཡེ་རུ་སཱ་ལེམ་ནས་གསུང་སྐད་བཏོན་ཏེ། ནམ་མཁའ་དང་ས་གཞི་འདར་ཡང་། གཙོ་བོ་ཡ་ཝཱེ་ནི་ཉིད་ཀྱི་མི་སྡེའི་སྦས་ས་དང་། ཡེས་ར་ཨེལ་པ་རྣམས་ཀྱི་བཙན་རྫོང་ཡིན།
[17] དེ་ནས་ཁྱོད་རྣམས་ཀྱིས་བདག་ནི་ཡ་ཝཱེ་སྟེ་ཁྱོད་རྣམས་ཀྱི་དཀོན་མཆོག་ཡིན་པ་རྟོགས་ཤིང་། བདག་ནི་ཛ་ཡན་ཏེ་བདག་གི་དམ་པའི་རི་བོར་བཞུགས་པ་དང་། ཡེ་རུ་སཱ་ལེམ་ཡང་དམ་པར་འགྱུར་ཞིང་། མི་ཆ་མེད་རྣམས་དེའི་ནང་ནས་ནམ་ཡང་རྒྱུ་བར་མི་འགྱུར་རོ།།
[18] ཉིན་དེ་ལ་རི་བོ་རྣམས་ལས་མངར་ཆང་འཛག་ཅིང་། རི་ཕྲན་རྣམས་ལས་འོ་མ་བཞུར་པ་དང་། ཡ་ཧུ་དཱའི་གྲོག་པོ་ཐམས་ཅད་ཆུ་རྣམས་ཀྱིས་བཀང་ཞིང་། གཙོ་བོ་ཡ་ཝཱེའི་ཕོ་བྲང་ལས་ཆུ་མིག་བཞུར་ཞིང་། སིད་ཏིམ་ལུང་པ་ཡང་རླན་པར་འགྱུར།
[19] ཨེ་ཅིབ་ནི་དབེན་སྟོང་དུ་འགྱུར་ངེས་ལ། ཨེ་དོམ་ནི་དབེན་སྟོང་གི་ཐང་རྒོད་དུ་འགྱུར་རོ།། ཅིའི་ཕྱིར་ཞེ་ན། དེ་རྣམས་ཀྱིས་ཡ་ཧུ་དཱ་པ་རྣམས་ལ་གདུག་རྩུབ་ཀྱི་ལས་བྱས་པ་དང་། ཡང་རང་གི་ཡུལ་ནང་ཉེས་མེད་པའི་ཁྲག་བཞུར་དུ་བཅུག་པའི་ཕྱིར།
[20] འོན་ཀྱང་ཡ་ཧུ་དཱ་ནི་རྒྱུན་དུ་དང་། ཡེ་རུ་སཱ་ལེམ་ནི་ཇི་སྲིད་བར་དུ་གནས་པར་འགྱུར།
[21] ཡང་བདག་གིས་ཁྲག་བཞུར་པར་བཅུག་པའི་མི་ཡི་སྡིག་པ་སེལ་ངེས་ལ། དེ་ནི་སྔོན་ན་སུས་ཀྱང་སེལ་བར་གྱུར་མེད་ལ། ཅིའི་ཕྱིར་ཞེ་ན། གཙོ་བོ་ཡ་ཝཱེ་ནི་ཛ་ཡན་ལ་བཞུགས་པའི་ཕྱིར་རོ།།