[1] དེར་ཨེ་ཕཱར་ཡིམ་པ་རྣམས་ཀྱིས་གིད་ཡོན་ལ་འདི་ལྟར་སྨྲས་པ་སྟེ། ཁྱོད་རང་མིད་ཡཱན་པ་རྣམས་ལ་འཐབ་འཛིང་བྱེད་དུ་འགྲོ་དུས་ངེད་ཅག་མ་བོས་ཤིང་། ངེད་ཅག་ལ་འདི་ལྟར་བྱེད་དོན་ཅི་ཞེས་ནས། དེ་རྣམས་ཀྱིས་གིད་ཡོན་དང་ཁ་རྩོད་དྲག་པོ་བྱས།
[2] གིད་ཡོན་གྱིས་དེ་རྣམས་ལ་འདི་ལྟར་སྨྲས་པ་སྟེ། བདག་གིས་ཅི་བྱས་པ་ནི་ཁྱོད་རྣམས་ཀྱིས་བྱས་པར་བསྡུར་ནུས་སམ། ཨེ་ཕཱར་ཡིམ་གྱིས་བཏུས་པའི་རྒུན་འབྲུམ་ལྷག་མ་དེ་ཨ་བི་ཨེ་ཟཱེར་གྱིས་བཏོགས་པའི་རྒུན་འབྲུམ་ལས་ལེགས་པ་མ་ཡིན་ནམ།
[3] དཀོན་མཆོག་གིས་མིད་ཡཱན་པའི་འགོ་དཔོན་ཨོ་རེབ་དང་ཟེབ་གཉིས་ཁྱོད་ཅག་གི་ལག་ཏུ་སྤྲད་ཅིང་། བདག་གིས་ཅི་བྱས་པ་ནི་ཁྱོད་རྣམས་ཀྱིས་བྱས་པར་བསྡུར་ནུས་སམ་ཞེས་པའོ། །གིད་ཡོན་གྱིས་དེ་སྐད་སྨྲས་པ་དང་ཨེ་ཕཱར་ཡིམ་པ་རྣམས་ཀྱི་ཁོང་ཁྲོ་ཞི་བར་གྱུར་ཏོ། །
[4] གིད་ཡོན་དང་ཁོའི་རྗེས་སུ་འབྲངས་པའི་མི་སུམ་བརྒྱ་བོ་ཡོར་དན་གཙང་པོར་བརྒལ་ཞིང་། ཐང་ཆད་ཀྱང་ད་དུང་ར་མདར་བརྒྱུགས་པའོ། །
[5] གིད་ཡོན་གྱིས་སོའུ་ཀོད་པ་རྣམས་ལ་འདི་ལྟར་སྨྲས་པ་སྟེ། ངའི་རྗེས་སུ་འབྲངས་པ་རྣམས་ནི་ཐང་ཆད་པས་ཁྱེད་ཀྱིས་ཁོ་ཚོར་བག་ལེབ་གནང་རོགས་ཞུ། ངེད་རྣམས་མིད་ཡཱན་པའི་རྒྱལ་པོ་ཟེ་བཱ་དང་ཚལ་མུན་ནཱ་གཉིས་ཀའི་ར་མདར་རྒྱུག་གིན་ཡོད་ཅེས་པ་ལ།
[6] སོའུ་ཀོད་པའི་འགོ་དཔོན་ན་རེ། ཟེ་བཱ་དང་ཚལ་མུན་ནཱ་གཉིས་ཁྱོད་ཀྱི་ལག་ཏུ་ཡོད་པ་མ་ཡིན་ནམ། ངེད་ཅག་གིས་ཁྱོད་ཀྱི་དམག་ལ་བག་ལེབ་སྟེར་རུང་ངམ་ཞེས་སྨྲས།
[7] གིད་ཡོན་གྱིས་འདི་ལྟར་སྨྲས་པ་སྟེ། གཙོ་བོ་ཡ་ཝཱེས་ཟེ་བཱ་དང་ཚལ་མུན་ནཱ་གཉིས་ངའི་ལག་ཏུ་སྤྲད་རྗེས། བདག་གིས་ས་རྒོད་ཀྱི་སྡོང་ཕྲན་ཡལ་ག་དང་ཚེར་མས་ཁྱོད་རྣམས་རྨས་པར་བྱ་ཞེས་པའོ། །
[8] གིད་ཡོན་ཡུལ་དེ་ནས་ཡར་ཕཱ་ནེ་ཨེལ་དུ་སོང་ཞིང་ཡུལ་དེའི་མི་རྣམས་ལའང་དེ་བཞིན་སྨྲས་པ་ལ། ཕཱ་ནེ་ཨེལ་པ་རྣམས་ཀྱིས་ཀྱང་སོའུ་ཀོད་པ་རྣམས་ཀྱིས་ཁོ་ལ་ཅི་ལྟར་ལན་བཏབ་པ་བཞིན་སྨྲས།
[9] ཁོས་ཕཱ་ནེ་ཨེལ་པ་རྣམས་ལ་འདི་ལྟར་སྨྲས་པ་སྟེ། ང་རང་བདེ་བར་ཕྱིར་ལོག་པའི་དུས་སུ། ངས་མཁར་འདི་བཤིག་པར་བྱ་ཞེས་པའོ། །
[10] དེའི་དུས་སུ་ཟེ་བཱ་དང་ཚལ་མུན་ནཱ་གཉིས་ཁོ་ཚོའི་རྗེས་སུ་འབྲངས་པའི་དམག་དཔུང་དང་བཅས་ཐམས་ཅད་ཀར་ཀོར་དུ་གནས་ཤིང་། ཧ་ལམ་མི་ཆིག་ཁྲི་ལྔ་སྟོང་ཙམ་ཡོད་དེ། ཤར་ཕྱོགས་པའི་དམག་ཡོངས་ལས་ལུས་པའི་གྲངས་ཡིན་ལ། རལ་གྲི་ཐོགས་མཁན་ཧ་ལམ་ཁྲི་བཅུ་གཉིས་བསད་པའོ། །
[11] དེ་ནས་གིད་ཡོན་ནི་ནོ་བ་དང་ཡོག་པེ་ཧ་ཡི་ཤར་ཕྱོགས་ནས། འཚེར་འཛིན་པའི་ལམ་ཁ་ནས་ཡར་སོང་སྟེ། མིད་ཡཱན་པའི་དམག་དཔུང་འཇིགས་སྣང་གང་ཡང་མེད་པར་གནས་པས། ཁོས་དེ་རྣམས་ཕམ་པར་བརྒྱབ།
[12] ཟེ་བཱ་དང་ཚལ་མུན་ནཱ་བྲོས་ཤིང་། གིད་ཡོན་གྱིས་ཁོ་གཉིས་བདས་ནས། མིད༌ཡཱན་གྱི་རྒྱལ་པོ་ཟེ་བཱ་དང་ཚལ་མུན་ནཱ་གཉིས་བཟུང་ཞིང་། དམག་ཡོངས་འདྲོགས་ནས་ཐོར་དུ་བཅུག
[13] ཡོ་ཨ་སིའི་བུ་གིད་ཡོན་ནི་ཧེ་རེ་སི་སྒང་བརྒྱུད་དེ་གཡུལ་ལས་ཕྱིར་ལོག་ཅིང་།
[14] སོའུ་ཀོད་པའི་གཞོན་ནུ་ཞིག་བཟུང་སྟེ་ཁོ་ལ་འདི་ལྟར། སོའུ་ཀོད་ཀྱི་འགོ་དཔོན་དང་རྒན་པོ་རྣམས་ནི་སུ་ཡིན་ཞེས་དྲིས་པ་ན། དེས་འགོ་དཔོན་དང་རྒན་པོ་མི་དོན་བདུན་གྱི་མིང་རྣམས་བྲིས།
[15] དེ་ནས་གིད་ཡོན་ནི་སོའུ་ཀོད་དུ་སླེབས་ཤིང་དེའི་མི་རྣམས་ལ་འདི་ལྟར། སྔར་ཁྱོད་རྣམས་ཀྱིས་བདག་ལ་འཕྱ་སྨོད་བྱེད་ཀྱིན། ཟེ་བཱ་དང་ཚལ་མུན་ནཱ་གཉིས་ཁྱོད་ཀྱི་ལག་ཏུ་ཡོད་པ་མ་ཡིན་ནམ། ངེད་ཅག་གིས་ཁྱོད་ཀྱི་རྗེས་སུ་འབྲངས་པའི་ཐང་ཆད་པའི་མི་རྣམས་ལ་བག་ལེབ་སྟེར་རུང་ངམ་ཞེས་པ་དང་། ད་ནི་ཟེ་བཱ་དང་ཚལ་མུན་ནཱ་གཉིས་འདི་རུ་ཡོད་ཅེས་སྨྲས་ཤིང་།
[16] དེ་ནས་དེས་གྲོང་ཁྱེར་དེའི་རྒན་པོ་རྣམས་བཟུང་བ་དང་། ས་རྒོད་ཀྱི་སྡོང་ཕྲན་ཡལ་ག་དང་ཚེར་མས་སོའུ་ཀོད་པ་རྣམས་ལ་བརྡེགས་སོ། །
[17] ཡང་ཕཱ་ནེ་ཨེལ་གྱི་མཁར་བཤིག་ནས་གྲོང་ཁྱེར་དེའི་མི་རྣམས་བསད་དོ། །
[18] དེར་གིད་ཡོན་གྱིས་ཟེ་བཱ་དང་ཚལ་མུན་ནཱ་གཉིས་ལ་འདི་ལྟར། ཁྱོད་ཅག་གིས་ཐ་བོར་རི་བོར་བསད་པའི་མི་ནི་ཅི་འདྲ་འདུག་ཅེས་དྲིས་པ་ལ། ལན་དུ། ཁོ་རྣམས་ཁྱེད་དང་མཚུངས་ཤིང་རེ་རེར་རྒྱལ་སྲས་ཀྱི་བཟོ་ལྟ་ཡོད་ཅེས་སྨྲས་པ་དང་།
[19] ཡང་གིད་ཡོན་ན་རེ། ཁོ་རྣམས་ནི་ངའི་མ་གཅིག་གི་སྤུན་ཡིན། བདག་གིས་རྒྱུན་ནས་རྒྱུན་དུ་གསོན་པོར་བཞུགས་པའི་གཙོ་བོ་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་སྟེ། གལ་ཏེ་ཁྱོད་ཅག་གིས་སྔར་ཁོ་རྣམས་ཀྱི་སྲོག་བསྐྱུར་བ་ཡིན་ན། བདག་གིས་ད་ལྟ་ཁྱོད་ཅག་གསོད་པ་མིན་ཞེས་སྨྲས་ཤིང་།
[20] ཁོའི་བུ་སྐྱེས་འགོ་ཡེ་ཐེར་ལ། ཁྱོད་ཡར་ལོངས་ལ་ཁོ་རྣམས་སོད་ཅིག་ཅེས་སྨྲས་ནའང་། ཡེ་ཐེར་ནི་ད་དུང་བྱིས་པ་ཡིན་པས་འཇིགས་ནས་རལ་གྲི་ཕྱུང་མ་ཕོད།
[21] ཟེ་བཱ་དང་ཚལ་མུན་ནཱ་གཉིས་ན་རེ། ཁྱོད་རང་ཉིད་ལོངས་ལ་ངེད་གཉིས་སོད་ཅིག ཅི་ལ་ཟེར་ན། མི་ཅི་ལྟ་བུ་ཡིན་ན་སྟོབས་ཀྱང་དེ་ལྟར་ཡིན་ཞེས་སྨྲས་པ་དང་། གིད་ཡོན་ཡར་ལངས་ཏེ་ཟེ་བཱ་དང་ཚལ་མུན་ནཱ་གཉིས་བསད་ཅིང་། ཁོ་ཚོའི་རྔ་མོང་རྣམས་ཀྱི་མཇིང་གི་རྒྱན་ཆ་རྣམས་བླངས་སོ། །
[22] ཡེས་ར་ཨེལ་པ་རྣམས་ཀྱིས་གིད་ཡོན་ལ། ཁྱེད་ཀྱིས་བདག་ཅག་མིད་ཡཱན་པའི་ལག་ནས་བསྐྱབས་ཤིང་ཐར་དུ་བཅུག་པས། ཁྱེད་དང་ཁྱེད་ཀྱི་བུ་རབས་ཚ་རྒྱུད་ཀྱིས་ངེད་རྣམས་ལ་དབང་སྒྱུར་ཅིག་ཅེས་སྨྲས་པ་ལ།
[23] གིད་ཡོན་གྱིས་འདི་ལྟར་སྨྲས་པ་སྟེ། བདག་གིས་ཁྱོད་རྣམས་ལ་དབང་སྒྱུར་བར་མི་བྱ་ཞིང་། བདག་གི་བུ་ཡིས་ཀྱང་ཁྱོད་རྣམས་ལ་དབང་སྒྱུར་བར་མི་བྱ་སྟེ། གཙོ་བོ་ཡ་ཝཱེ་གཅིག་པུས་ཁྱོད་རྣམས་ལ་དབང་སྒྱུར་བར་འགྱུར་ཞེས་པ་དང་།
[24] ཡང་གིད་ཡོན་གྱིས་དེ་རྣམས་ལ་འདི་ལྟར་སྨྲས་པ་སྟེ། བདག་ལ་ཁྱོད་ཅག་ལ་ཞུ་བའི་དོན་ཞིག་ཡོད་དེ། ཁྱོད་རྣམས་མི་རེ་རེས་ཕྲོགས་འོངས་པའི་རྣ་ཏོག་རྣམས་ང་ལ་སྟེར་རོགས་ཞེས་པ་ན། ༼མ་གཞི་དགྲ་བོ་ནི་ཡེས་མ་ཨེལ་པ་ཡིན་ཞིང་ཐམས་ཅད་ཀྱིས་རྣ་ཏོག་འདོགས་པ་ཡིན་ནོ།།༽
[25] ཡེས་ར་ཨེལ་པ་རྣམས་ཀྱིས་ངེད་རྣམས་ཁྱོད་ལ་སྟེར་བར་མོས་པ་ཡིན་ཞེས་སྨྲས་ཤིང་། ཕྱི་གོས་ཤིག་བཏིངས་ནས་མི་རེ་རེས་ཕྲོགས་འོངས་པའི་རྣ་ཏོག་དེའི་སྟེང་དུ་འཕངས་སོ། །
[26] གིད་ཡོན་ལ་ཐོབ་པའི་གསེར་གྱི་རྣ་ཏོག་རྣམས་གྱི་ལྗིད་ཚད་ནི་སྤྱི་རྒྱ་བཅུ་དགུ་དང་ཕྱེད་ཀ་ཡིན་པ་དང་། དེའི་མིན་ད་དུང་མིད༌ཡཱན་རྒྱལ་པོ་རྣམས་ཀྱིས་བཏགས་པའི་རྒྱན་ཆ་དང་རྣ་ཏོག གྱོན་པའི་གོས་རྒྱ་སྨུག ད་དུང་རྔ་མོང་མཇིང་གི་གསེར་ཐག་བཅས་ཡོད་པའོ། །
[27] གིད་ཡོན་གྱིས་ཨེ་ཕོད་ཅིག་རང་གི་གྲོང་ཁྱེར་ཨོབ་རཱ་ནས་བཟོས་ཏེ། ཕྱིས་སུ་ཡེས་ར་ཨེལ་པ་རྣམས་ཀྱིས་ཨེ་ཕོད་དེ་ལ་ཕྱག་བཙལ་ནས་ལོག་གཡེམ་བྱས་པས། དེ་ནི་གིད་ཡོན་དང་ཁོའི་ཁྱིམ་རྒྱུད་ཀྱི་རྙི་རུ་གྱུར་ཏོ། །
[28] དེ་བཞིན་མིད་ཡཱན་པ་རྣམས་ཡེས་ར་ཨེལ་པ་རྣམས་ཀྱིས་བཏུལ་ཞིང་མགོ་ཡར་འདེགས་མ་ཕོད་ལ། གིད་ཡོན་གསོན་པའི་དུས་སུ་ཡུལ་དེ་བགྲང་བྱ་བཞི་བཅུའི་རིང་ལ་བདེ་བར་གནས་སོ། །
[29] ཡོ་ཨ་སིའི་བུ་ཡེ་རུབ་པཱ་ཨལ་ཕྱིར་སོང་ནས་རང་གི་ཁྱིམ་དུ་གནས།
[30] གིད་ཡོན་ལ་ཆུང་མ་མང་པོ་ཡོད་པས་རང་སྐྱེས་ཀྱི་བུ་བདུན་ཅུ་ཡོད་པའོ། །
[31] ཁོའི་ཆུང་མ་སི་ཀེམ་དུ་གནས་ཤིང་དེ་ལས་ཀྱང་བུ་ཞིག་སྐྱེས་པ་ལ། གིད་ཡོན་གྱིས་བུ་དེའི་མིང་ལ་ཨ་བི་མེ་ལེག་ཅེས་བཏགས་སོ། །
[32] ཡོ་ཨ་སིའི་བུ་གིད་ཡོན་ལོ་ན་རྒས་ཏེ་ཚེ་ལས་འདས་ཤིང་། ཨ་བི་ཨེ་ཟེར་པ་རྣམས་ཀྱི་ཨོབ་རཱ་ཞེས་པའི་ཡུལ་དུ། རང་གི་ཕ་ཡོ་ཨ་སིའི་དུར་དུ་སྦས་སོ། །
[33] གིད་ཡོན་ཚེ་ལས་འདས་རྗེས། ཡེས་ར་ཨེལ་པ་རྣམས་ཀྱིས་ཡང་བསྐྱར་པཱ་ཨལ་རྣམས་ཀྱི་རྗེས་སུ་འབྲངས་ཏེ་ལོག་གཡེམ་བྱས་ཤིང་། པཱ་ཨལ་པེ་རིད་རང་གི་དཀོན་མཆོག་ཏུ་བཀུར།
[34] ཡེས་ར་ཨེལ་པ་རྣམས་ཀྱིས་ཁོ་རྣམས་ཕྱོགས་བཞིའི་དགྲ་ལག་ནས་ཐར་བར་མཛད་མཁན་ཏེ། ཁོ་ཚོའི་དཀོན་མཆོག་ཡ་ཝཱེ་མ་དྲན་ལ།
[35] ཡང་ཡེ་རུབ་པཱ་ཨལ་ཞེས་བྱ་བའི་གིད་ཡོན་གྱིས་ཁོ་རྣམས་དྲིན་གྱིས་བསྐྱངས་པ་བཞིན། དེའི་ཁྱིམ་རྒྱུད་དྲིན་གྱིས་མ་བསྐྱངས་སོ། །