[1] གཙོ་བོ་ཡ་ཝཱེའི་ཕོ་ཉ་ནི་གིལ་གལ་ནས་ཡར་པོ་ཀིམ་དུ་སླེབས་ཤིང་ཡ་ཧུ་དཱ་པ་རྣམས་ལ། བདག་གིས་ཁྱོད་རྣམས་ཨེ་ཅིབ་ཡུལ་ནས་ཐོན་ཏེ་ཁྱོད་ཅག་གི་མེས་པོ་རྣམས་ལ་མནའ་བསྐྱལ་ནས་ཞལ་བཞེས་གནང་བའི་ཡུལ་འདིར་ཁྲིད་འོངས་པ་ཡིན། ཡང་ངས་ཁྱོད་རྣམས་དང་བཞག་པའི་ཞལ་ཆད་ནི་ནམ་ཡིན་ཡང་འདོར་བར་མི་བྱ་ཞིང་།
[2] ཁྱོད་རྣམས་ཀྱིས་ཀྱང་ཡུལ་འདིའི་མི་རྣམས་དང་ཁ་ཆད་བཞག་མི་ཆོག་ལ། ཁོ་ཚོའི་མཆོད་ཁྲི་གཞིག་དགོས་ཞེས་གསུངས་ནའང་། ཁྱོད་ཚོས་ངའི་བཀའ་ལ་མ་ཉན་པར་འདི་ལྟར་བྱེད་དོན་ཅི་ཡིན་ནམ།
[3] དེའི་ཕྱིར་ངས་ཡང་ཁྱོད་ཅག་ལ། བདག་གིས་ཁོ་ཚོ་ནི་ཁྱོད་རྣམས་ཀྱི་མདུན་ནས་ཕྱིར་བསྐྲོད་པར་མི་བྱ་སྟེ། ཁོ་ཚོ་ནི་ཁྱོད་རྣམས་ཀྱི་རྩིབ་འོག་གི་ཚེར་མ་ལྟ་བུར་འགྱུར་ངེས་ཤིང་། ཁོ་ཚོའི་ལྷ་རྣམས་ནི་ཁྱོད་ཅག་གི་རྙི་རྒྱ་རུ་འགྱུར་ངེས་ཞེས་སྨྲའོ་ཞེས་གསུངས།
[4] གཙོ་བོ་ཡ་ཝཱེའི་ཕོ་ཉས་ཡེས་ར་ཨེལ་པ་རྣམས་ལ་འདི་ལྟར་སྨྲ་བའི་སྐབས་སུ། འབངས་རྣམས་སྐད་ཆེན་པོས་ངུས་སོ། །
[5] དེ་ནས་ཁོ་ཚོས་ཡུལ་དེའི་མིང་ལ་པོ་ཀིམ་ཞེས་བཏགས་པ་སྟེ། དེ་ནི་ངུ་བའི་དོན་ཡིན་ལ། མི་རྣམས་ཀྱིས་གནས་དེར་གཙོ་བོ་ཡ་ཝཱེ་ལ་མཆོད་པ་ཕུལ་ཏོ། །
[6] སྔར་ཡོ་ཤུ་ཨ་ཡིས་ཡེས་ར་ཨེལ་གྱི་འབངས་རྣམས་མངགས་པའི་དུས་སུ། ཁོ་ཚོ་རང་རང་གི་ས་སྐལ་དུ་སོང་ནས་ས་བཟུང་བའོ། །
[7] ཡོ་ཤུ་ཨ་ཡོད་ཐོག་དང་ཡོ་ཤུ་ཨ་ཚེ་ལས་འདས་རྗེས། གཙོ་བོ་ཡ་ཝཱེས་ཡེས་ར་ཨེལ་པ་རྣམས་ཀྱི་དོན་དུ་མཛད་པའི་དོན་ཆེན་རྣམས་མཇལ་བའི་རྒན་པོ་རྣམས་ད་དུང་ཡོད་ཐོག་ཏུ། འབངས་རྣམས་ཀྱིས་གཙོ་བོ་ཡ་ཝཱེ་ལ་བསྙེན་བཀུར་ཞུས་སོ། །
[8] གཙོ་བོ་ཡ་ཝཱེའི་ཞབས་ཕྱི་སྟེ་ནུན་གྱི་བུ་ཡོ་ཤུ་ཨ་དགུང་ལོ་བརྒྱ་དང་བཅུ་རུ་སོན་ནས་ཚེ་ལས་འདས་པ་དང་།
[9] ཡ་ཧུ་དཱ་པས་ཁོ་རང་གི་ས་སྐལ་གྱི་མངའ་ཁོངས་ཏེ། གཱ་ཨ་སི་ཤེས་རི་བོའི་བྱང་ཕྱོགས་སུ་ཨེ་ཕཱར་ཡིམ་རི་ཁུལ་གྱི་ཐིམ་ནད་ཧེ་རེ་སི་ལ་དུར་དུ་སྦས།
[10] དུས་རབས་དེའི་མི་ཐམས་ཅད་ཀྱང་རང་རང་གི་མེས་པོ་རྣམས་ཀྱི་དྲུང་དུ་ལོག་ཅིང་། རྗེས་སུ་དུས་རབས་གཞན་ཞིག་གསར་དུ་བྱུང་བ་ཡིས་གཙོ་བོ་ཡ་ཝཱེ་མི་ཤེས་ཞིང་། གཙོ་བོ་ཡ་ཝཱེས་ཡེས་ར་ཨེལ་པ་རྣམས་ཀྱི་ཕྱིར་མཛད་པའི་དོན་རྣམས་ཀྱང་མི་ཤེས་སོ། །
[11] ཡེས་ར་ཨེལ་པ་རྣམས་ཀྱིས་གཙོ་བོ་ཡ་ཝཱེས་ངན་པར་གཟིགས་པའི་དོན་རྣམས་བྱས་ཤིང་། པཱ་ཨལ་རྣམས་ལ་བསྙེན་བཀུར་བྱས་པ་དང་།
[12] ཁོ་ཚོ་ཨེ་ཅིབ་ཡུལ་ནས་ཕྱིར་ཁྲིད་མཁན་ཡ་ཝཱེ་སྟེ་ཁོ་ཚོའི་མེས་པོ་རྣམས་ཀྱི་དཀོན་མཆོག་བསྐྱུར་ཏེ། ལྷ་གཞན་པ་སྟེ་མཐའ་སྐོར་གྱི་མི་སྡེ་དག་གི་ལྷ་རྣམས་ལ་ཕྱག་བཙལ་ནས་གཙོ་བོ་ཡ་ཝཱེའི་ཐུགས་སེམས་དཀྲུགས་པར་མ་ཟད།
[13] གཙོ་བོ་ཡ་ཝཱེ་བསྐྱུར་ནས་པཱ་ཨལ་དང་ཨ་ཤཱ་ཏ་རོད་ལ་བསྙེན་བཀུར་བྱས་སོ། །
[14] གཙོ་བོ་ཡ་ཝཱེ་ཡེས་ར་ཨེལ་པ་རྣམས་ལ་ཐུགས་ཁྲོས་ནས། ཁོ་རྣམས་འཕྲོག་བཅོམ་བྱེད་མཁན་གྱི་ལག་ཏུ་སྤྲད་པ་དང་། ཡང་ཁོ་རྣམས་མཐའ་སྐོར་གྱི་དགྲ་ཟླའི་ལག་ཏུ་སྤྲད་ཅིང་། ཐ་ན་དེ་རྣམས་དགྲ་བོའི་མདུན་དུ་ཚུགས་མ་ཐུབ་བོ། །
[15] ཁོ་རྣམས་གང་དུ་སོང་ནའང་གཙོ་བོ་ཡ་ཝཱེས་བཀའ་ཅི་ལྟར་གསུངས་པ་དང་ཡང་ཁོང་གིས་ཁོ་རྣམས་ལ་ཅི་ལྟར་མནའ་བཞེས་པ་བཞིན་དུ། བགེགས་བར་ཆད་ཀྱིས་ཁོ་རྣམས་ལ་རྒོལ་བས། ཁོ་ཚོས་དཀའ་སྡུག་ཆེན་པོ་མྱངས།
[16] གཙོ་བོ་ཡ་ཝཱེས་ཁོ་ཚོའི་དོན་དུ་ཁྲིམས་དཔོན་བསྐོས་ཤིང་། ཁྲིམས་དཔོན་གྱིས་ཁོ་རྣམས་འཕྲོག་བཅོམ་བྱེད་མཁན་གྱི་ལག་ནས་ཐར་བར་བྱས།
[17] ཡིན་ནའང་ཁོ་ཚོས་ཁྲིམས་དཔོན་གྱི་བཀའ་ལ་མི་ཉན་པར་ལྷ་གཞན་གྱི་རྗེས་སུ་འབྲངས་ཏེ་དེར་ཕྱག་བཙལ་ཞིང་ལོག་གཡེམ་བྱས་པ་དང་། མྱུར་བ་མྱུར་ཏུ་ཁོ་ཚོའི་མེས་པོ་རྣམས་འགྲིམ་པའི་ལམ་དང་བྲལ་ཏེ། ཁོ་ཚོའི་མེས་པོ་རྣམས་ཀྱིས་གཙོ་བོ་ཡ་ཝཱེའི་བཀའ་བརྩི་སྲུང་བྱེད་པ་བཞིན་དུ་མ་ཡིན་ནོ། །
[18] གཙོ་བོ་ཡ་ཝཱེས་ཁོ་ཚོའི་དོན་དུ་ཁྲིམས་དཔོན་བསྐོས་ཤིང་དེ་རྣམས་དང་མཉམ་དུ་བཞུགས། ཁྲིམས་དཔོན་རྣམས་འཚོ་བཞུགས་ཡོད་པའི་སྐབས་སུ་གཙོ་བོ་ཡ་ཝཱེས་ཁོ་རྣམས་དགྲ་བོའི་ལག་ནས་ཐར་བར་མཛད་པ་སྟེ། ཅི་ལ་ཞེ་ན། ཁོ་རྣམས་ཀྱིས་མནར་གཅོད་དང་གནོད་འཚེ་འོག་ཏུ་སྨྲེ་སྔགས་བཏོན་པས་གཙོ་བོ་ཡ་ཝཱེ་ཐུགས་འགྱོད་སྐྱེས་པའོ། །
[19] དེ་ནས་ཁྲིམས་དཔོན་ཚེ་ལས་འདས་རྗེས་ཁོ་རྣམས་ཁ་འཁོར་ནས་ངན་པའི་ལས་བྱས་ཤིང་ཁོ་ཚོའི་མེས་པོ་རྣམས་ལས་ཀྱང་ཐུ་སྟེ། ལྷ་གཞན་རྣམས་ལ་བསྙེན་བཀུར་བྱས་ནས་ཕྱག་བཙལ་ཞིང་། ཨུ་ཚུགས་ཀྱི་སྤྱོད་ཚུལ་ངན་པ་ནམ་ཡང་རྒྱུན་མ་ཆད་དོ། །
[20] དེ་ནས་གཙོ་བོ་ཡ་ཝཱེ་ཡེས་ར་ཨེལ་པ་རྣམས་ལ་ཐུགས་ཁྲོས་ནས་འདི་སྐད་དུ། མི་རྒྱུད་འདིས་བདག་གིས་ཁོ་ཚོའི་མེས་པོ་རྣམས་ལ་བསྲུང་བར་བསྒོས་པའི་ཞལ་ཆད་དང་འགལ་ཞིང་ངའི་བཀའ་ལ་མི་ཉན་པས།
[21] ཡོ་ཤུ་ཨ་ཚེ་ལས་འདས་པའི་སྐབས་སུ་ལྷག་པའི་མི་རྒྱུད་རྣམས་བདག་གིས་ཁོ་ཚོའི་སྔུན་ནས་ཕྱིར་བསྐྲོད་པར་མི་བྱ་སྟེ།
[22] ཅི་ལ་ཞེ་ན། འདི་བརྒྱུད་ནས་ཡེས་ར་ཨེལ་པ་རྣམས་ལ་ཚོད་ལྟ་བྱེད་དེ། ཁོ་རྣམས་ཀྱིས་ཁོ་ཚོའི་མེས་པོ་རྣམས་བཞིན་དུ་ངའི་བཀའ་ལ་ཉན་མི་ཉན་བལྟ་བར་བྱའོ་ཞེས་གསུངས་སོ། །
[23] དེ་ལྟར་གཙོ་བོ་ཡ་ཝཱེས་མི་རྒྱུད་རྣམས་མྱུར་བ་མྱུར་ཏུ་ཕྱིར་མ་བསྐྲད་པར་བསྐྱུར་ཅིང་། ཡོ་ཤུ་ཨ་ཡི་ལག་ཏུ་ཡང་མ་སྤྲད་དོ། །