[1] ཡོ་ཤུ་ཨ་ཚེ་ལས་འདས་རྗེས། ཡེས་ར་ཨེལ་པ་རྣམས་ཀྱིས་གཙོ་བོ་ཡ་ཝཱེ་ལ་འདི་ལྟར་ཞུས་པ་སྟེ། ངེད་རྣམས་ལས་སུ་ཞིག་སྔོན་ལ་ཡར་སོང་སྟེ་ཀ་ན་ཨན་པ་རྣམས་ལ་རྒོལ་ཞིང་ཁོ་ཚོ་དང་འཐབ་འཛིང་བྱེད་འོས་སམ་ཞེས་པ་ལ།
[2] གཙོ་བོ་ཡ་ཝཱེས་འདི་སྐད་དུ། ཡ་ཧུ་དཱ་སྔོན་ལ་ཡར་འགྲོ་འོས་ཏེ། བདག་གིས་ཡུལ་དེ་ཁོའི་ལག་ཏུ་སྤྲད་ཟིན་པ་ཡིན་ཞེས་གསུངས།
[3] ཡ་ཧུ་དཱ་ཡིས་རང་གི་ཕུ་བོ་སི་མུ་ཨོན་ལ། ཀ་ན་ཨན་པ་རྣམས་དང་འཐབ་འཛིང་བྱེད་པའི་ཕྱིར་ཁྱེད་རང་ང་དང་མཉམ་དུ་རྒྱན་བླངས་ནས་ཐོབ་པའི་ཡུལ་དེར་འགྲོ་རོགས་ཞུ། རྗེས་སུ་ང་རང་ཡང་ཁྱེད་དང་མཉམ་དུ་ཁྱེད་ཀྱིས་རྒྱན་བླངས་ནས་ཐོབ་པའི་ཡུལ་དེར་འགྲོ་བར་བྱ་ཞེས་སྨྲས་པ་ལ། སོ་ལོ་ཁོ་དང་མཉམ་དུ་ཕྱིན་ཏོ། །
[4] དེར་ཡ་ཧུ་དཱ་ཡར་སོང་བ་དང་གཙོ་བོ་ཡ་ཝཱེས་ཀ་ན་ཨན་པ་དང་ཕེ་རེ་ཟི་པ་རྣམས་ཁོ་ཚོའི་ལག་ཏུ་སྤྲད་ཅིང་། ཁོ་ཚོས་པེ་ཟེག་ཏུ་མི་ཁྲི་གཅིག་བསད།
[5] ཡང་དེར་ཨ་དོ་ནི་པེ་ཟེག་ལ་འཕྲད་ནས་ཁོ་དང་འཐབ་ཅིང་ཀ་ན་ཨན་པ་དང་ཕེ་རེ་ཟི་པ་རྣམས་ཕམ་པར་བརྒྱབ།
[6] ཨ་དོ་ནི་པེ་ཟེག་བྲོས་པ་དང་། ཁོ་ཚོས་དེའི་རྗེས་དེད་ནས་བཟུང་ཞིང་རྐང་ལག་གཉིས་ཀའི་མཐེ་བོང་བཅད།
[7] ཨ་དོ་ནི་པེ་ཟེག་གིས། སྔར་རྒྱལ་པོ་བདུན་ཅུ་ཡོད་ཅིང་དེ་དག་གི་རྐང་ལག་གཉིས་ཀའི་མཐེ་བོང་རྣམས་བདག་གིས་བཅད་པ་དང་། ངའི་གསོལ་ཅོག་གི་འོག་ཏུ་ཁ་ཟས་ཙག་ཙིག་འཐུ་བ་ཡིན། ད་ནི་དཀོན་མཆོག་གིས་ངས་ཅི་ཞིག་བྱས་པ་བཞིན་དུ་ང་ལ་ལན་གནང་བྱུང་ཞེས་སྨྲས། དེ་ནས་ཁོ་ཚོས་ཨ་དོ་ནི་པེ་ཟེག་ཡེ་རུ་སཱ་ལེམ་དུ་ཁྲིད་པ་དང་ཁོ་དེ་རུ་ཤིའོ། །
[8] ཡ་ཧུ་དཱ་པ་རྣམས་ཀྱིས་ཡེ་རུ་སཱ་ལེམ་ལ་དམག་བརྒྱབ་ཅིང་གྲོང་ཁྱེར་བླངས་པ་དང་། གྲོང་ཁྱེར་ནང་གི་མི་རྣམས་གྲིས་བསད་པར་མ་ཟད་གྲོང་ཁྱེར་མེས་བསྲེགས།
[9] དེ་ནས་ཡ་ཧུ་དཱ་པ་རྣམས་མར་སོང་སྟེ་རི་ཁུལ་དང་ནེ་གུབ་ཡུལ། མཐོ་སྒང་བཅས་སུ་གནས་པའི་ཀ་ན་ཨན་པ་རྣམས་དང་འཐབ་འཛིང་བྱས།
[10] ཡ་ཧུ་དཱ་པ་རྣམས་སོང་ནས་ཧེབ་རོན་དུ་གནས་པའི་ཀ་ན་ཨན་པ་རྣམས་ལ་རྒོལ་ཞིང་། ཤེ་ཤཱ་ཨི་དང་ཨ་ཧི་མན། ཐལ་མ་ཨི་བཅས་བསད། ཧེབ་རོན་ལ་སྔོན་ཆད་ཀིར་ཡཱད་ཨར་པཱ་ཞེས་བྱའོ། །
[11] ཁོ་ཚོ་དེ་ནས་སོང་སྟེ་དི་བིར་དུ་གནས་པ་རྣམས་ལ་ཕར་རྒོལ་བྱས། དི་བིར་ལ་སྔོན་ཆད་ཀིར་ཡཱད་སེ་ཕེར་ཞེས་བྱ།
[12] ཀཱ་ལེབ་ཀྱིས། སུ་ཞིག་གིས་ཀིར་ཡཱད་སེ་ཕེར་ལ་བརྒྱབ་ནས་གྲོང་ཁྱེར་འཕྲོག་ནུས་ན། ངས་རང་གི་བུ་མོ་ཨག་ས་དེའི་ཆུང་མར་སྟེར་བར་བྱ་ཞེས་སྨྲས།
[13] ཀཱ་ལེབ་ཀྱི་སྤུན་ཀེ་ན༌ཟཱ་ཡི་བུ་ཨོད་ནི་ཨེལ་གྱིས་གྲོང་ཁྱེར་དེ་ཕྲོགས་པས། ཀཱ་ལེབ་ཀྱིས་བུ་མོ་ཨག་ས་དེར་ཆུང་མར་བྱིན།
[14] ཨག་ས་གནས་ལ་འགྲོ་བའི་ཚེ། སྐྱེས་པར་ཁོ་མོའི་ཕ་ལས་ཞིང་ས་ཞིག་སློང་དགོས་པར་བསྐུལ། ཨག་ས་བོང་བུ་ནས་བབས་མ་ཐག་ཀཱ་ལེབ་ཀྱིས་ཁོ་མོར། ཁྱོད་ལ་ཅི་དགོས་སམ་ཞེས་དྲིས་པ་ལ།
[15] ཁོ་མོས། ཁྱེད་ཀྱིས་ང་ལ་བྱིན་རླབས་གནང་བར་མཛོད། ཁྱེད་ཀྱིས་ང་རང་ནེ་གུབ་ཡུལ་དུ་བཀོད་སྒྲིག་མཛད་པས་ང་ལ་ཆུ་མིག་ཀྱང་གནང་བར་མཛོད་ཅེས་ཞུས་པ་ལ། ཀཱ་ལེབ་ཀྱིས་སྟོད་སྨད་གཉིས་ཀྱི་ཆུ་མིག་ཁོ་མོར་གནང་ངོ་། །
[16] མོ་ཤེའི་སྒྱུག་པོ་ནི་ཀེ་ནེ་པ་ཡིན་ཞིང་། ཁོའི་བུ་རྒྱུད་རྣམས་ཡ་ཧུ་དཱ་པ་རྣམས་དང་མཉམ་དུ་ཏ་ལ་ཤིང་གི་གྲོང་ཁྱེར་དང་བྲལ་ནས་ཨ་རད་ལྷོ་ཕྱོགས་ཀྱི་ཡ་ཧུ་དཱའི་དབེན་སྟོང་དུ་སོང་སྟེ་དམངས་ཁྲོད་དུ་བསྡད།
[17] ཡ་ཧུ་དཱ་དང་ཁོའི་ཕུ་བོ་སི་མུ་ཨོན་གཉིས་ཀ་མཉམ་དུ་སོང་ནས། ཚེ་པད་དུ་གནས་པའི་ཀ་ན་ཨན་པ་རྣམས་བསད་ཅིང་། གྲོང་ཁྱེར་མེད་པར་བཟོས་པ་དང་། གྲོང་ཁྱེར་དེའི་མིང་ལ་ཧོར་མཱ་ཞེས་བྱའོ། །
[18] ཡ་ཧུ་དཱས་གཱ་ཟཱ་དང་དེའི་མཐའ་སྐོར། ཨ་ཤཱ་ཀེ་ལོན་དང་དེའི་མཐའ་སྐོར། ཨེག་རོན་དང་དེའི་མཐའ་སྐོར་བཅས་ཀྱང་བླངས།
[19] གཙོ་བོ་ཡ་ཝཱེ་ནི་ཡ་ཧུ་དཱ་དང་མཉམ་དུ་བཞུགས་པས། ཡ་ཧུ་དཱས་རི་ཁུལ་གྱི་མི་རྣམས་ཕར་བསྐྲད་མོད། ཐང་གི་མི་རྣམས་ལ་ལྕགས་ཀྱི་འཁོར་ལོ་ཡོད་པས་དེ་རྣམས་ཕར་སྐྲོད་མ་ནུས་སོ། །
[20] ཡ་ཧུ་དཱ་པ་རྣམས་ཀྱིས་མོ་ཤེས་ཅི་ལྟར་གསུངས་པ་ནང་བཞིན་ཧེབ་རོན་ཡུལ་ནི་ཀཱ་ལེབ་ལ་སྤྲད་པ་དང་། ཀཱ་ལེབ་ཀྱིས་དེ་ནས་ཨ་ནག་རིགས་ཀྱི་འགོ་དཔོན་གསུམ་ཕར་བསྐྲད།
[21] པེན་ཡཱ་མེན་གྱི་མི་རྣམས་ཀྱིས་ཡེ་རུ་སཱ་ལེམ་དུ་གནས་པའི་ཡེ་བུ་སི་པ་རྣམས་ཕར་མ་བསྐྲད་ཅིང་། ད་ལྟའི་བར་དུ་ཡེ་བུ་སི་པ་རྣམས་སྔར་བཞིན་ཡེ་རུ་སཱ་ལེམ་དུ་པེན་ཡཱ་མེན་གྱི་མི་རྣམས་དང་མཉམ་དུ་གནས་སོ། །
[22] ཡོ་སེབ་ཚང་ཡང་ཡར་སོང་སྟེ་པེད་ཨེལ་ལ་རྒོལ་ཞིང་། གཙོ་བོ་ཡ་ཝཱེ་ཁོ་རྣམས་དང་མཉམ་དུ་བཞུགས་སོ། །
[23] ཡོ་སེབ་ཚང་གིས་མི་མངགས་ཏེ་པེད་ཨེལ་ལ་ལྐོག་ཞིབ་བྱེད་དུ་སོང་བ་དང་། སྔར་གྲོང་ཁྱེར་དེའི་མིང་ལ་ལོ་ཟི་ཞེས་བྱ།
[24] ལྟ་ཉུལ་པ་རྣམས་ཀྱིས་མི་ཞིག་གྲོང་ཁྱེར་ནས་ཕྱིར་ཐོན་འོང་བ་མཐོང་སྟེ་མི་དེ་ལ། ཁྱོད་ཀྱིས་གྲོང་ཁྱེར་དུ་འགྲོ་བའི་ལམ་སྟོན་དང་ངེད་རྣམས་ཀྱིས་ཁྱོད་རང་དྲིན་གྱིས་སྐྱོང་བར་བྱ་ཞེས་སྨྲས་པ་ལ།
[25] མི་དེས་གྲོང་ཁྱེར་དུ་འགྲོ་བའི་ལམ་ཁོ་རྣམས་ལ་བསྟན་ཅིང་། ཁོ་ཚོས་གྲོང་ཁྱེར་ནང་གི་མི་རྣམས་གྲིས་བརྒྱབ་ནས་བསད་མོད། འོན་ཀྱང་མི་དེ་དང་དེའི་ཁྱིམ་མི་གང་བོ་བཏང་ངོ་། །
[26] མི་དེ་ཧེད་པའི་ཡུལ་དུ་ཕྱིན་ཅིང་གྲོང་ཁྱེར་ཞིག་བརྩིགས་ནས་མིང་ལ་ལོ་ཟི་ཞེས་བཏགས་པ་དང་། གྲོང་ཁྱེར་དེའི་མིང་ལ་ད་ལྟའང་དེ་སྐད་འབོད་དོ། །
[27] མཱ་ན་ཤེས་པེད་ཤེ་ཨན་དང་དེའི་གྲོང་ཚོ་ལ་གཏོགས་པའི་མི་རྣམས་དང་། ཐ་ཨ་ནག་དང་དེའི་གྲོང་ཚོ་ལ་གཏོགས་པའི་མི་རྣམས། དཱོར་དང་དེའི་གྲོང་ཚོ་ལ་གཏོགས་པའི་མི་རྣམས། ཡིབ་ལེ་ཨམ་དང་དེའི་གྲོང་ཚོ་ལ་གཏོགས་པའི་མི་རྣམས། མེ་གིད་དོ་དང་དེའི་གྲོང་ཚོ་ལ་གཏོགས་པའི་མི་རྣམས་བཅས་ཕར་མ་བསྐྲད་མོད། འོན་ཀྱང་ཀ་ན་ཨན་པ་རྣམས་ཨུ་ཚུགས་ཀྱིས་ཡུལ་དེ་དག་ཏུ་བསྡད།
[28] དེ་ལྟར་ཡེས་ར་ཨེལ་སྟོབས་འབྱོར་ལྡན་པར་གྱུར་ཅིང་ཀ་ན་ཨན་པ་རྣམས་སྡུག་ལས་སུ་སྦྱར་ནས་དེ་དག་ཡོངས་སུ་མ་བསྐྲད་དོ། །
[29] ཨེ་ཕཱར་ཡིམ་གྱིས་གེ་ཟེར་དུ་གནས་པའི་ཀ་ན་ཨན་པ་རྣམས་ཕྱིར་མ་བསྐྲད་པས། ཀ་ན་ཨན་པ་རྣམས་སྔར་བཞིན་ཨེ་ཕཱར་ཡིམ་གྱི་ཁྲོད་དུ་གེ་ཟེར་དུ་གནས་སོ། །
[30] ཟེ་བུ་ལུན་གྱིས་ཀིད་རོན་གྱི་མི་རྣམས་དང་ན་ཧ་ལོལ་གྱི་མི་རྣམས་ཕྱིར་མ་བསྐྲད་པས། ཀ་ན་ཨན་པ་རྣམས་སྔར་བཞིན་ཟེ་བུ་ལུན་གྱི་ཁྲོད་དུ་གནས་ཤིང་སྡུག་ལས་བྱེད་མཁན་དུ་གྱུར་ཏོ། །
[31] ཨ་ཤེར་གྱིས་ཨག་ཀོ་དང་ཚི་ཏུན་གྱི་མི་རྣམས་དང་། ཨག་ལབ་དང་ཨག་སིབ་ཀྱི་མི་རྣམས། ཧེལ་པཱ་དང་ཨ་པིག རེ་ཧོབ་བཅས་ཀྱི་མི་རྣམས་བཅས་ཕྱིར་མ་བསྐྲད་ཅིང་།
[32] དེ་ནས་ཨ་ཤེར་པ་རྣམས་ཀྱིས་ཡུལ་དེའི་ཀ་ན་ཨན་པ་རྣམས་ཕྱིར་མ་བསྐྲད་པས་ཁོ་རྣམས་ཀྱི་ཁྲོད་དུ་གནས་སོ། །
[33] ནཱབ་ཐ་ལི་ཡིས་པེད་ཤེ་མེ་སི་དང་པེད་ཨ་ནད་ཀྱི་མི་རྣམས་ཕྱིར་མ་བསྐྲད་པས། ནཱབ་ཐ་ལི་ཡུལ་དེའི་ཀ་ན་ཨན་པ་རྣམས་ཀྱི་ཁྲོད་དུ་གནས། འོན་ཀྱང་པེད་ཤེ་མེ་སི་དང་པེད་ཨ་ནད་ཀྱི་མི་རྣམས་སྡུག་ལས་བྱེད་མཁན་དུ་གྱུར་ཏོ། །
[34] ཨེ་མོར་པ་རྣམས་ཀྱིས་དཱན་གྱི་མི་རྣམས་བཙན་གྱིས་རི་ཁུལ་དུ་དེད་ཅིང་ཁོ་ཚོ་བདེ་ཐང་ལ་འོང་དུ་མ་བཅུག
[35] ཨེ་མོར་པ་རྣམས་ཨུ་ཚུགས་ཀྱིས་ཧེ་རེ་སི་རི་དང་ཨ་ཡ་ལོན། ཤཱ་ཨལ་པིམ་བཅས་སུ་བསྡད་མོད། འོན་ཀྱང་ཡོ་སེབ་ཀྱི་བུ་རྒྱུད་ནི་ཁོ་རྣམས་ལས་རྒྱལ་བས་ཁོ་རྣམས་སྡུག་ལས་བྱེད་མཁན་དུ་གྱུར་ཏོ། །
[36] ཨེ་མོར་པ་རྣམས་ཀྱི་ས་མཚམས་ནི་ཨག་རབ་པིམ་དང་སེ་ལཱ་ནས་གོང་དུ་ཕྱིན་ཏོ། །