[1] གཙོ་བོ་ཡ་ཝཱེས་མི་རྒྱུད་འདི་རྣམས་བསྐྱུར་བ་ནི། ཀ་ན་ཨན་པ་རྣམས་དང་འཐབ་པའི་དོན་རྣམས་མི་ཤེས་པའི་ཡེས་ར་ཨེལ་པ་རྣམས་ལ་ཚོད་ལྟ་བྱེད་པ་དང་།
[2] ཡེས་ར་ཨེལ་པ་རྣམས་ཀྱི་མི་རབས་ཕྱི་མ་དག་གིས་སྔར་མ་ཤེས་པའི་དམག་འཁྲུག་དེ་ཤེས་པ་དང་སློབ་པར་འཇུག་པའི་ཕྱིར་ཡིན།
[3] ཤུལ་དུ་བསྐྱུར་བ་རྣམས་ནི་ཕེ་ལེ་ཤེད་པའི་འགོ་དཔོན་ལྔ་དང་། ཀ་ན་ཨན་པ་དང་ཚི་ཏུན་པ་རྣམས། དེ་མིན་ལེ་བ་ནོན་རི་བོར་སྡོད་པའི་ཧེ་བི་པ་བཅས་ཡིན་ལ། པཱ་ཨལ་ཧེར་མོན་རི་བོ་ནས་ཧ་མཱད་དུ་འགྲོ་བའི་ལམ་གྱི་བར་དུའོ། །
[4] མི་རྒྱུད་འདི་རྣམས་བསྐྱུར་བ་ནི་ཡེས་ར་ཨེལ་པ་རྣམས་ལ་ཚོད་ལྟ་བྱེད་པ་དང་། ཁོ་རྣམས་ཀྱིས་གཙོ་བོ་ཡ་ཝཱེས་མོ་ཤེ་བརྒྱུད་ནས་ཁོ་ཚོའི་མེས་པོ་རྣམས་ལ་བསྒོས་པའི་བཀའ་ལ་ཉན་ནམ་མི་ཉན་ཤེས་པའི་ཕྱིར་ཡིན།
[5] ཡེས་ར་ཨེལ་པ་རྣམས་ཀ་ན་ཨན་པ་དང་ཧེད་པ། ཨེ་མོར་པ། ཕེ་རེ་ཟི་པ། ཧེ་བི་པ། ཡེ་བུ་སི་པ་བཅས་ཀྱི་ཁྲོད་དུ་གནས་ཤིང་།
[6] ཁོ་རྣམས་ཀྱི་བུ་མོ་ཆུང་མར་བླངས་ནས། རང་གི་བུ་མོ་རྣམས་ཁོ་ཚོར་མནའ་མར་བྱིན་པར་མ་ཟད། ཁོ་ཚོའི་ལྷ་རྣམས་ལ་བསྙེན་བཀུར་བྱས་སོ། །
[7] ཡེས་ར་ཨེལ་པ་རྣམས་ཀྱིས་གཙོ་བོ་ཡ་ཝཱེས་ངན་པར་གཟིགས་པའི་ལས་བྱས་ཤིང་། ཁོ་རྣམས་ཀྱི་དཀོན་མཆོག་ཡ་ཝཱེ་བརྗེད་པར་གྱུར་ཅིང་པཱ་ཨལ་དང་ཨ་ཤེ་རཱ་རྣམས་ལ་བསྙེན་བཀུར་བྱས་པས།
[8] གཙོ་བོ་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་ཤིང་། ཁོ་རྣམས་ཨ་རམ་ཡུལ་གྱི་རྒྱལ་པོ་ཀུ་ཤན་རིས་ཨ་ཏ་ཡིམ་གྱི་ལག་ཏུ་སྤྲད་པ་དང་། ཡེས་ར་ཨེལ་པ་རྣམས་ཀྱིས་ཀུ་ཤན་རིས་ཨ་ཏ་ཡིམ་ལ་ལོ་ངོ་བརྒྱད་ཀྱི་རིང་དུ་གཡོག་བྱས་སོ། །
[9] ཡེས་ར་ཨེལ་པ་རྣམས་ཀྱིས་གཙོ་བོ་ཡ་ཝཱེ་ལ་ཞུ་འབོད་བྱས་པ་ན། གཙོ་བོ་ཡ་ཝཱེས་ཀཱ་ལེབ་ཀྱི་སྤུན་ཀེ་ན༌ཟཱ་ཡི་བུ་ཨོད་ནི་ཨེལ་ཁོ་རྣམས་སྐྱོབ་མཁན་དུ་བསྐོས།
[10] གཙོ་བོ་ཡ་ཝཱེའི་ཐུགས་ཉིད་ཁོའི་སྟེང་དུ་བབས་པས་ཁོ་རང་ཡེས་ར་ཨེལ་པའི་ཁྲིམས་དཔོན་བྱས་ཤིང་འཐབ་འཁྲུག་རྒྱག་པར་ཐོན། གཙོ་བོ་ཡ་ཝཱེས་ཨ་རམ་ཡུལ་གྱི་རྒྱལ་པོ་ཀུ་ཤན་རིས་ཨ་ཏ་ཡིམ་ཁོའི་ལག་ཏུ་སྤྲད་པས་ཁོས་དེ་ཕམ་པར་བརྒྱབ་ཏོ། །
[11] དེ་ནས་ཡུལ་དེ་ནི་ལོ་ངོ་བཞི་བཅུའི་རིང་ལ་བདེ་བར་གནས་པ་དང་། ཀེ་ན༌ཟཱ་ཡི་བུ་ཨོད་ནི་ཨེལ་ཚེ་ལས་འདས་སོ། །
[12] ཡེས་ར་ཨེལ་པ་རྣམས་ཀྱིས་ཡང་གཙོ་བོ་ཡ་ཝཱེས་ངན་པར་གཟིགས་པའི་ལས་བྱས་པས། གཙོ་བོ་ཡ་ཝཱེས་མོ་ཨབ་ཀྱི་རྒྱལ་པོ་ཨེག་ལོན་དར་བར་མཛད་ཅིང་ཡེས་ར་ཨེལ་པ་ལ་རྒོལ་ལོ། །
[13] ཨེག་ལོན་གྱིས་ཨམ་མོན་པ་དང་ཨ་མཱད་ལེག་པ་རྣམས་བསྡུས་ནས་ཡེས་ར་ཨེལ་པ་ལ་བརྒྱབ་སྟེ་ཤིང་ཏ་ལའི་གྲོང་ཁྱེར་བདག་ཏུ་བཟུང་ངོ་། །
[14] དེ་ནས་ཡེས་ར་ཨེལ་པ་རྣམས་ཀྱིས་མོ་ཨབ་ཀྱི་རྒྱལ་པོ་ཨེག་ལོན་ལ་ལོ་ངོ་བཅོ་བརྒྱད་རིང་དུ་གཡོག་བྱས།
[15] ཡེས་ར་ཨེལ་པ་རྣམས་ཀྱིས་གཙོ་བོ་ཡ་ཝཱེ་ལ་ཞུ་འབོད་བྱས་པ་ན། གཙོ་བོ་ཡ་ཝཱེས་པེན་ཡཱ་མེན་པ་གེ་རཱ་ཡི་བུ་ཨེ་ཧུད་ཁོ་རྣམས་སྐྱོབ་མཁན་དུ་བསྐོས་ཤིང་། ཁོ་ནི་གཡོན་ལག་ཅིག་ཡིན། ཡེས་ར་ཨེལ་པ་རྣམས་ཀྱིས་ཁོ་བརྒྱུད་དེ་མོ་ཨབ་ཀྱི་རྒྱལ་པོ་ཨེག་ལོན་ལ་ལག་རྟགས་ཕུལ་ཏོ། །
[16] ཨེ་ཧུད་ཀྱིས་རལ་གྲི་ཁ་གཉིས་མ་རིང་ཚད་ཁྲུ་གང་ཡིན་པ་ཞིག་བརྡུངས་ནས་བརླ་གཡས་པའི་གྱོན་གོས་འོག་ཏུ་བཏེགས།
[17] ཁོས་མོ་ཨབ་ཀྱི་རྒྱལ་པོ་ཨེག་ལོན་ལ་ལག་རྟགས་ཕུལ་ཞིང་། མ་གཞི་ཨེག་ལོན་ནི་ཤིན་ཏུ་ཤ་རྒྱག་པ་ཞིག་ཡིན་ལ།
[18] ཨེ་ཧུད་ཀྱིས་ལག་རྟགས་ཕུལ་ཚར་བ་དང་ལག་རྟགས་འཁུར་མཁན་རྣམས་སྐྱེལ་མ་བྱས་ཤིང་།
[19] རང་ཉིད་གིལ་གལ་ཉེ་འགྲམ་གྱི་སྐུ་འདྲ་རྣམས་ཡོད་ས་ནས་ཕྱིར་ལོག་སྟེ་ན་རེ། ཀྱེ་རྒྱལ་པོ་ལགས། ང་ཁྱེད་ལ་གསང་བ་ཞིག་ཞུ་རྒྱུ་ཡོད་ཅེས་སྨྲས་པ་ལ། རྒྱལ་པོས། ཟུར་བྱོལ་གྱིས་ཤིག་ཅེས་སྨྲས་པ་དང་། གཡས་གཡོན་གྱི་སྐུ་སྲུང་རྣམས་ཕྱི་རུ་བསྣུར།
[20] དེ་ནས་རྒྱལ་པོ་གཅིག་པུ་བསིལ་ཁང་ནང་དུ་བསྡད་ཡོད་པ་ལ། ཨེ་ཧུད་ཁོའི་མདུན་དུ་ཡོང་སྟེ་ན་རེ། བདག་གིས་དཀོན་མཆོག་གི་བཀའ་བཞིན་ཁྱེད་ལ་དོན་ཞིག་ཞུ་བར་བྱ་ཞེས་སྨྲས་པས། རྒྱལ་པོ་ནི་རང་གི་འདུག་ས་ནས་ཡར་ལངས་ཤིང་།
[21] ཨེ་ཧུད་ཀྱིས་གཡོན་ལག་བརྐྱངས་ཏེ་བརླ་གཡས་པ་ནས་རལ་གྲི་ཕྱུང་ཞིང་རྒྱལ་པོའི་ཁོག་པའི་ནང་བསྣུན་པ་དང་།
[22] གྲིའི་ཡུ་བའང་ཁོག་པའི་ནང་དུ་བསྣུན། རལ་གྲི་ཚིལ་གྱིས་བསྐུམས་ཤིང་ཁོས་དེ་རྒྱལ་པོའི་ཁོག་པ་ནས་ཕྱིར་མ་ཕྱུང་བར་མ་ཟད་རྒྱབ་ཀྱང་བརྟོལ་ལོ། །
[23] ཨེ་ཧུད་ཁྱམས་སྐོར་ལ་སླེབས་ནས་བསིལ་ཁང་གི་སྒོ་ཐམས་ཅད་ཟ་བརྒྱབ།
[24] ཨེ་ཧུད་ཕྱིར་བུད་རྗེས་རྒྱལ་པོའི་འཁོར་གཡོག་རྣམས་ཡོང་སྟེ་བསིལ་ཁང་གི་སྒོ་རྣམས་ཟ་བརྒྱབ་ཡོད་པ་མཐོང་ནས། ཁོ་རང་བསིལ་ཁང་ནང་དུ་སྒོ་ལ་བསྡད་ཡོད་པར་ངེས་ཞེས་སྨྲས་པ་དང་།
[25] དེ་དག་གིས་སྒུག་བསྲན་མི་ཚུགས་པའི་བར་དུ་སྒུག་ནའང་ད་དུང་བསིལ་ཁང་གི་སྒོ་འབྱེད་རྒྱུ་མེད་པ་མཐོང་ནས། ལྡེ་མིག་གིས་སྒོ་ཕྱེས་པ་ན། བསམ་ཡུལ་ལས་འདས་པ་ཞིག་ལ་ཁོ་ཚོའི་བདག་པོ་འདས་ཟིན་པ་དང་ས་རུ་འགྱེལ་འདུག་གོ །
[26] དེ་དག་གིས་འགོར་འགྱངས་བྱེད་པའི་དུས་སུ་ཨེ་ཧུད་ནི་སྐུ་འདྲ་རྣམས་ཡོད་ས་ནས་བརྒལ་ཞིང་སེ་ཨི་རཱ་ཞེས་པར་བྲོས་ཏེ།
[27] དེར་སླེབས་པ་དང་ཨེ་ཕཱར་ཡིམ་རི་ཁུལ་དུ་དུང་བུས་ཤིང་། ཡེས་ར་ཨེལ་པ་རྣམས་ཁོའི་རྗེས་འབྲངས་ཏེ་རི་ཁུལ་ནས་མར་བབས་པ་དང་ཁོས་མདུན་ནས་ལམ་ཁྲིད་དོ། །
[28] ཡང་དེ་རྣམས་ལ་འདི་ལྟར་སྨྲས་པ་སྟེ། བདག་གི་རྗེས་སུ་འབྲང་བར་གྱིས། ཅི་ལ་ཟེར་ན། གཙོ་བོ་ཡ་ཝཱེས་ཁྱོད་ཅག་གི་དགྲ་བོ་མོ་ཨབ་པ་རྣམས་ཁྱོད་ཅག་གི་ལག་ཏུ་སྤྲད་ཟིན་པས་སོ་ཞེས་པ་ལ། དེ་རྣམས་ཁོའི་རྗེས་སུ་འབྲངས་ཏེ་མར་སོང་ནས་ཡོར་དན་གཙང་པོའི་རབ་ཁ་བསྲུངས་ཤིང་མོ་ཨབ་པ་གཅིག་ཀྱང་དེར་བརྒལ་དུ་མ་བཅུག་གོ །
[29] དེའི་དུས་སུ་མོ་ཨབ་པ་ཧ་ལམ་མི་ཁྲི་གཅིག་ཡོད་པ་ཚང་མ་དཔའ་རྒོད་སྟོབས་ཅན་ཡིན་ལ། ཁོ་རྣམས་ཀྱིས་དེ་དག་ལས་གཅིག་ཀྱང་ཤོར་ཏུ་མ་བཅུག་པར་བསད་ཅིང་།
[30] མོ་ཨབ་ནི་དེ་བཞིན་ཡེས་ར་ཨེལ་པས་དབང་འོག་ཏུ་བསྡུས་ཤིང་། བགྲང་བྱ་བརྒྱད་ཅུའི་རིང་ལ་ཡུལ་དེ་བདེ་བར་གནས་སོ། །
[31] ཨེ་ཧུད་ཀྱི་རྗེས་སུ་ཨ་ནད་ཀྱི་བུ་ཤམ་གཱར་བྱུང་སྟེ། ཁོས་གླང་ལྕག་གིས་ཕེ་ལེ་ཤེད་པ་མི་དྲུག་བརྒྱ་ལ་བརྡུངས་ནས་བསད་ཅིང་། ཁོས་ཀྱང་ཡེས་ར་ཨེལ་པ་རྣམས་བསྐྱབས་པའོ། །