[1] དེའི་རྗེས་སུ་དཱ་བིད་ཀྱིས་ཕེ་ལེ་ཤེད་པ་རྣམས་དང་འཐབ་ནས་དེ་རྣམས་དབང་དུ་བསྡུས་པ་དང་། གཱད་དང་དེའི་གྲོང་སྡེ་དག་ཕེ་ལེ་ཤེད་པའི་ལག་ནས་བླངས།
[2] ཡང་མོ་ཨབ་པ་རྣམས་བཅོམ་ནས། མོ་ཨབ་པ་རྣམས་དཱ་བིད་ཀྱི་བྲན་དུ་གྱུར་ཏེ་ཁོང་ལ་འབུལ་ཚན་ཕུལ་ཏོ། །
[3] ཡང་ཙོ་བཱ་ཡི་རྒྱལ་པོ་ཧ་དད་ཨེ་ཟེར་ཞེས་པ་ཡུ་ཕ་རཱད་གཙང་པོའི་ཕྱོགས་སུ་རང་གི་རྒྱལ་སྲིད་བརྟན་པོར་འཛུགས་པར་འགྲོ་སྐབས་སུ། དཱ་བིད་ཀྱིས་དེ་ཡང་ཧ་མཱད་ཡུལ་གྱི་བར་དུ་ཕམ་པར་བརྒྱབ།
[4] དཱ་བིད་ཀྱིས་དེ་ལས་ཤིང་རྟ་ཆིག་སྟོང་དང་། སྐྱ་དམག་བདུན་སྟོང་དང་། རྐང་དམག་ཉིས་ཁྲི་བཅས་ཕྲོགས་ཏེ། ཤིང་རྟ་ཐམས་ཅད་ཀྱི་རྟ་ཡི་རྐང་རྒྱུས་བཅད་དེ། ཤིང་རྟ་བརྒྱ་ཡི་རྟ་འབའ་ཞིག་བཞག་གོ །
[5] དཱ་མེ་སེག་གི་ཨ་རམ་པ་རྣམས་ཙོ་བཱ་ཡི་རྒྱལ་པོ་ཧ་དད་ཨེ་ཟེར་གྱི་དཔུང་གྲོགས་སུ་འོངས་པ་དང་། དཱ་བིད་ཀྱིས་ཨ་རམ་པ་ཉིས་ཁྲི་ཉིས་སྟོང་བསད་དེ།
[6] དཱ་བིད་ཀྱིས་དཱ་མེ་སེག་གི་ཨ་རམ་ཡུལ་དུ་དམག་སྒར་བཙུགས་པ་དང་། ཨ་རམ་པ་རྣམས་དཱ་བིད་ཀྱི་བྲན་དུ་གྱུར་ནས་འབུལ་ཚན་ཕུལ་ཏོ། །དེ་ལྟར་དཱ་བིད་གང་དུ་སོང་ནའང་གཙོ་བོ་ཡ་ཝཱེས་ཁོང་རྒྱལ་བར་མཛད་དོ། །
[7] དཱ་བིད་ཀྱིས་ཧ་དད་ཨེ་ཟེར་གྱི་བློན་འཁོར་ལས་གསེར་གྱི་ཕུབ་ཐམས་ཅད་ཕྲོགས་ཏེ་ཡེ་རུ་སཱ་ལེམ་དུ་ཁྱེར།
[8] ཡང་དཱ་བིད་ཀྱིས་ཧ་དད་ཨེ་ཟེར་གྱི་གྲོང་ཁྱེར་ཏིབ་ཧད་དང་ཀུན་བྱ་བ་གཉིས་ལས་ལི་དཔག་མེད་ཕྲོགས་པ་དང་། སོ་ལོ་མོན་གྱིས་ཕྱིས་སུ་ལི་དེ་དག་གིས་རྒྱ་མཚོ་དང་ཀ་བ། ཡོ་བྱད་བཅས་བཟོས་པའོ། །
[9] ཧ་མཱད་ཀྱི་རྒྱལ་པོ་ཐོ་ཨུ་ཞེས་པ་དེས། དཱ་བིད་ཀྱིས་ཙོ་བཱ་ཡི་རྒྱལ་པོ་ཧ་དད་ཨེ་ཟེར་གྱི་དམག་ཐམས་ཅད་ཕམ་པར་བརྒྱབ་པ་ཐོས་པས།
[10] དེས་རང་གི་སྲས་ཧ་དོ་རམ་བྱ་བ་དེ་རྒྱལ་པོ་དཱ་བིད་ཀྱི་དྲུང་དུ་ཁོང་ལ་ཁམས་འདྲི་དང་ཤིས་པ་བརྗོད་དུ་བཏང་ངོ་། །ཅིའི་ཕྱིར་ཞེ་ན། དཱ་བིད་ཀྱིས་ཧ་དད་ཨེ་ཟེར་ལ་དམག་བརྒྱབ་ནས་དེ་ཕམ་པར་བྱས་པས་སོ། །མ་གཞི་ཐོ་ཨུ་དང་ཧ་དད་ཨེ་ཟེར་གཉིས་ཀྱི་བར་ལ་དུས་རྒྱུན་དུ་འཐབ་མོ་ཡོད་པ་རེད། ཧ་དོ་རམ་གྱིས་གསེར་དང་དངུལ་དང་ལི་བཅས་ཀྱི་སྣོད་ཆས་སྣ་ཚོགས་བསྐྱལ་ནས་འོངས།
[11] རྒྱལ་པོ་དཱ་བིད་ཀྱིས་སྣོད་ཆས་དེ་རྣམས་དང་ཡང་རྒྱལ་ཁམས་སོ་སོ་སྟེ་ཨེ་དོམ་དང་། མོ་ཨབ། ཨམ་མོན་པ། ཕེ་ལེ་ཤེད་པ། ཨ་མཱད་ལེག་པ་བཅས་ལས་ཕྲོགས་པའི་གསེར་དངུལ་ཐམས་ཅད་དམ་པར་བྱས་ནས་གཙོ་བོ་ཡ་ཝཱེ་ལ་ཕུལ་ཏོ། །
[12] ཡང་ཟེ་རུ་ཡཱ་ཡི་བུ་ཨ་བི་ཤཱ་ཨི་ཡིས་ཚྭའི་ལུང་པ་རུ་ཨེ་དོམ་པ་ཆིག་ཁྲི་བརྒྱད་སྟོང་བསད་པ་དང་།
[13] དཱ་བིད་ཀྱིས་ཨེ་དོམ་ཡུལ་དུ་དམག་སྒར་བཙུགས་ཤིང་། ཨེ་དོམ་པ་ཐམས་ཅད་ཁོང་གི་བྲན་དུ་གྱུར་ཏོ། །དེ་ལྟར་དཱ་བིད་གང་དུ་སོང་ནའང་གཙོ་བོ་ཡ་ཝཱེས་ཁོང་རྒྱལ་བར་མཛད་དོ། །
[14] དཱ་བིད་ཀྱིས་ཡེས་ར་ཨེལ་ཡུལ་ཐམས་ཅད་ལ་མངའ་མཛད་དེ། རང་གི་མི་རྒྱུད་ཡོངས་ལ་འདྲ་མཉམ་དྲང་གཞག་གི་ལྟ་སྟངས་བཟུང་བའོ། །
[15] ཟེ་རུ་ཡཱ་ཡི་བུ་ཡོ་ཨབ་ནི་དམག་དཔུང་གི་དམག་དཔོན་དང་། ཨ་ཧི་ལུད་ཀྱི་བུ་ཡེ་ཧོ་ཤ་ཕད་ནི་རྒྱལ་རབས་ཀྱི་ཡིག་དཔོན་དང་།
[16] ཨ་ཧི་ཏུབ་ཀྱི་བུ་ཟཱ་ཏོག་དང་ཨབ་ཡཱ་ཐར་གྱི་བུ་ཨ་བི་མེ་ལེག་ནི་མཆོད་དཔོན་དང་། ཤབ་ཤཱ་ནི་ཡིག་མཁན་དང་།
[17] ཡེ་ཧོ་ཡ་དཱ་ཡི་བུ་པེ་ནཱ་ཡ་ནི་ཀེ་རེད་པ་དང་ཕེ་ལེད་པ་རྣམས་ཀྱི་འགོ་དཔོན་དང་། དཱ་བིད་ཀྱི་སྲས་རྣམས་རྒྱལ་པོའི་གཡས་གཡོན་དུ་བཀའ་བློན་དུ་བཞག་གོ །