[1] དཱ་བིད་རང་གི་ཕོ་བྲང་ནང་དུ་བསྡད་པའི་རྗེས་སུ། ཁོང་གིས་ལུང་སྟོན་པ་ནཱ་ཐན་ལ་ན་རེ། ལྟོས་དང་། ང་ནི་ཐང་ཤིང་གིས་བཟོས་པའི་ཕོ་བྲང་དུ་སྡོད་མོད། གཙོ་བོ་ཡ་ཝཱེའི་ཞལ་ཆད་ཀྱི་ཤུར་སྒམ་ནི་གུར་མཆོག་ནང་དུ་མཆིས་སོ་ཞེས་སྨྲས་པར།
[2] ནཱ་ཐན་གྱིས་དཱ་བིད་ལ་ན་རེ། དཀོན་མཆོག་ཁྱེད་དང་མཉམ་དུ་བཞུགས་པས། ཁྱེད་ཀྱིས་རང་གི་འདོད་བློ་ལྟར་བསྒྲུབ་ཆོག་ཅེས་སྨྲས་ཤིང་།
[3] མཚན་མོ་དེར་དཀོན་མཆོག་གི་བཀའ་ནཱ་ཐན་ལ་བྱུང་ནས་འདི་སྐད་དུ།
[4] ཁྱོད་སོང་ནས་ངའི་ཞབས་ཕྱི་དཱ་བིད་ལ། ཡ་ཝཱེས་འདི་སྐད་དུ། ཁྱོད་ཀྱིས་ཁོ་བོ་བཞུགས་སའི་ཕོ་བྲང་བརྩིག་མི་རུང་།
[5] གང་ལ་ཞེ་ན། བདག་གིས་ཡེས་ར་ཨེལ་པ་རྣམས་ཡར་ཁྲིད་འོངས་པའི་ཉིན་ནས་དེ་རིང་བར་དུ། བདག་ནི་ཕོ་བྲང་དུ་བཞུགས་མ་མྱོང་སྟེ། བདག་ནི་གུར་མཆོག་གཅིག་ནས་གུར་མཆོག་གཞན་ཞིག་ལ་སྤར་ནས་གནས་པ་ཡིན།
[6] བདག་ནི་ཡེས་ར་ཨེལ་པ་རྣམས་དང་ལྷན་ཅིག་ཏུ་གང་སར་རྒྱུ་རུང་། ངས་རང་གི་མི་རྒྱུད་རྣམས་འཚོ་སྐྱོང་བྱེད་པར་བཀའ་བསྒོས་པའི་ཁྲིམས་དཔོན་སུ་ལ་ཡང་། ཁྱོད་ཚོས་ངའི་དོན་དུ་ཐང་ཤིང་གི་ཕོ་བྲང་ཅི་ལ་མི་བརྩིག་གམ་ཅེས་པའི་ཚིག་བསྒོས་མྱོང་བ་མེད་གསུངས་ཞེས་སྨྲོས་ཤིག
[7] ད་ལྟ་ཁྱོད་ཀྱིས་ངའི་ཞབས་ཕྱི་དཱ་བིད་ལ་འདི་ལྟར། དཔུང་ཚོགས་ཀྱི་ཡ་ཝཱེས་འདི་སྐད་དུ། ཁྱོད་འགོ་དཔོན་དུ་གྱུར་ནས་ངའི་མི་རྒྱུད་ཡེས་ར་ཨེལ་ལ་བདག་སྐྱོང་བྱེད་པའི་ཕྱིར། ངས་ཁྱོད་རང་ལུག་ར་ནས་ཕྱི་རུ་བླངས་པ་དང་ལུག་ཁྱུའི་རྗེས་སུ་མི་འདེད་པར་བྱས།
[8] ཁྱོད་གང་ལ་སོང་ཡང་ང་རང་ཁྱོད་དང་མཉམ་དུ་གནས་ཏེ། དགྲ་བོ་ཐམས་ཅད་ཁྱོད་ཀྱི་མདུན་ནས་མེད་པར་གཏོང་ཞིང་། ས་སྟེང་གི་མི་རླབས་ཆེན་དག་གི་མཚན་སྙན་དང་འདྲ་བར། ངས་ཁྱོད་ཀྱི་མཚན་སྙན་གྲགས་རྒྱས་པར་བྱའོ། །
[9] ཡང་ངས་རང་གི་མི་རྒྱུད་ཡེས་ར་ཨེལ་པ་རྣམས་ཀྱི་དོན་དུ་ས་ཆ་ཞིག་བདམས་ནས། ཁོ་རྣམས་དེར་ཚུགས་སུ་འཇུག་པ་དང་། ཁོ་རྣམས་རང་གནས་སུ་སྡོད་ཅིང་གཞན་གྱི་བར་ཆད་མི་འཕོག་ལ། བུ་རྒྱུད་ངན་པ་རྣམས་ཀྱིས་ཀྱང་སྔར་བཞིན་དེ་དག་ལ་འཚེ་བར་མི་འགྱུར་ཞིང་།
[10] ངས་རང་གི་མི་རྒྱུད་ཡེས་ར་ཨེལ་ལ་ཁྲིམས་དཔོན་བསྐོས་པའི་དུས་དང་འདྲ་བར་ཡང་མི་འགྱུར། བདག་གིས་ཁྱོད་ཀྱི་དགྲ་ཐམས་ཅད་འདུལ་བར་མ་ཟད་ངས་ཁྱོད་ལ་སྨྲ་བར་བྱ་སྟེ། ཡ་ཝཱེ་བདག་གིས་ཁྱོད་ཀྱི་དོན་དུ་ཁྱིམ་གཞིས་འཛུགས་པར་འགྱུར་རོ། །
[11] ཁྱོད་རང་ཚེ་ལོ་མཐར་ཕྱིན་ཏེ་རང་གི་མེས་པོ་རྣམས་ཀྱི་གྲས་སུ་ཚུད་པའི་དུས་སུ། བདག་གིས་ཁྱོད་ཀྱི་བུ་རྒྱུད་རྣམས་ལས་གཅིག་ཡར་འདེགས་ཤིང་ཁྱོད་ཀྱི་རྗེས་སྐྱོང་བར་བྱ་ཞིང་། དེའི་རྒྱལ་སྲིད་བརྟན་པར་བྱའོ། །
[12] དེས་བདག་ལ་ཕོ་བྲང་ཞིག་བཞེང་བ་དང་། བདག་གིས་དེའི་རྒྱལ་ཁྲི་ཇི་སྲིད་བར་དུ་བརྟན་པོར་འཛུགས་པར་བྱའོ། །
[13] བདག་ནི་དེའི་ཡབ་དང་དེ་ངའི་སྲས་སུ་འགྱུར་ཏེ། བདག་གིས་ཁྱོད་ཀྱི་གོང་མ་ལས་རང་གི་བྱམས་པ་བླངས་པ་ལྟར་དུ། དེ་ལས་ལེན་པར་མི་བྱ་བར།
[14] བདག་གིས་དེ་ནི་ཇི་སྲིད་བར་དུ་ངའི་ཕོ་བྲང་དང་རྒྱལ་སྲིད་བསྐྱང་བར་འཇོག་ཅིང་། དེའི་རྒྱལ་ཁྲི་ནི་རྟག་ཏུ་བརྟན་པར་འགྱུར་རོ་གསུངས་ཞེས་སྨྲོས་ཤིག་གསུངས་སོ། །
[15] ནཱ་ཐན་གྱིས་བཀའ་དེ་ཐམས་ཅད་དང་ཁོས་ཅི་མཐོང་བ་ཐམས་ཅད་ཇི་བཞིན་དུ་དཱ་བིད་ལ་སྨྲས་པའོ། །
[16] དེ་ནས་རྒྱལ་པོ་དཱ་བིད་ནང་ལ་སོང་ནས་གཙོ་བོ་ཡ་ཝཱེའི་དྲུང་དུ་བསྡད་དེ་འདི་ལྟར། ཀྱེ་དཀོན་མཆོག་ཡ་ཝཱེ་ལགས། བདག་ནི་སུ་ཡིན་ནམ། བདག་གི་ཁྱིམ་རྒྱུད་ནི་ཅི་ཡིན་ནམ། ཁྱེད་ཀྱིས་ད་དུང་བདག་འདི་ཙམ་གྱི་བར་དུ་བསྐྱངས་པའོ། །
[17] ཀྱེ་དཀོན་མཆོག་ལགས། དོན་འདི་ཁྱེད་ཀྱི་གཟིགས་ངོར་ཆུང་བར་སྣང་ཞིང་། ཁྱེད་ཀྱིས་ཉིད་ཀྱི་ཞབས་ཕྱི་བདག་གི་ཁྱིམ་རྒྱུད་ལ་མ་འོངས་པའི་དོན་དུ་ཞལ་བཞེས་གནང་བའོ། །ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་བདག་ནི་མི་མཆོག་ཏུ་གྱུར་པ་ཞིག་གི་ཚད་དུ་བཞག་གོ །
[18] ཁྱེད་ཀྱིས་ཉིད་ཀྱི་ཞབས་ཕྱི་ལ་བཀུར་སྟི་བསྩལ་བར་ངས་ཁྱེད་ལ་ད་དུང་ཅི་ཞིག་ཞུ་བར་བྱའམ། ཁྱེད་ཀྱིས་ཉིད་ཀྱི་ཞབས་ཕྱི་མཁྱེན་པའོ། །
[19] ཀྱེ་གཙོ་བོ་ཡ་ཝཱེ་ལགས། ཉིད་ཀྱི་ཞབས་ཕྱིའི་དོན་དུ་ཁྱེད་ཀྱི་ཐུགས་དགོངས་བཞིན་དུ། ཁྱེད་ཀྱིས་འཕྲིན་ལས་ཆེན་པོ་དེ་རྣམས་མཛད་ཅིང་ཡང་དོན་ཆེན་དེ་ཐམས་ཅད་མི་རྣམས་ལ་མངོན་པ་ཡིན་ནོ། །
[20] ཀྱེ་གཙོ་བོ་ཡ་ཝཱེ་ལགས། ངེད་རྣམས་ཀྱི་རྣ་བས་ཐོས་པ་བཞིན་ན་ཁྱེད་ལ་འགྲན་ཟླ་སུ་ཡང་མེད། ཁྱེད་མ་གཏོགས་དཀོན་མཆོག་གཞན་སུ་ཡང་མེད།
[21] ས་སྟེང་དུ་མི་རྒྱུད་གང་ཞིག་ཁྱེད་ཀྱི་མི་རྒྱུད་ཡེས་ར་ཨེལ་ལ་དོའམ། དཀོན་མཆོག་གིས་དངོས་སུ་ཁོ་རྣམས་བསྐྱབས་ཤིང་ཉིད་ཀྱི་མི་རྒྱུད་དུ་མཛད་པ་དང་། ཡང་ཁྱེད་ཀྱིས་ཨེ་ཅིབ་ནས་བསྐྱབས་པའི་མི་རྒྱུད་མདུན་ནས་མི་རྒྱུད་གཞན་རྣམས་བསྐྲད་ཅིང་། དོན་ཆེན་འཇིགས་རུང་རྣམས་ཀྱིས་ཉིད་ཀྱི་མཚན་ཚུགས་པར་མཛད་དོ། །
[22] ཁྱེད་ཀྱིས་ཉིད་ཀྱི་མི་རྒྱུད་ཡེས་ར་ཨེལ་ནི་ཇི་སྲིད་བར་དུ་ཉིད་ཀྱི་མི་རྒྱུད་དུ་མཛད། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱང་དེ་དག་གི་དཀོན་མཆོག་ཏུ་གྱུར་པ་ཡིན།
[23] ཀྱེ་གཙོ་བོ་ཡ་ཝཱེ་ལགས། ད་ནི་ཁྱེད་ཀྱིས་ཉིད་ཀྱི་ཞབས་ཕྱི་དང་དེའི་ཁྱིམ་རྒྱུད་ལ་གནང་བའི་ཞལ་བཞེས་རྣམས་བརྟན་པོར་མཛད་ཅིང་། ཅི་གསུངས་བཞིན་དུ་བསྒྲུབ་པར་མཛོད་ཅིག
[24] ཁྱེད་ཀྱི་མཚན་ནི་རྟག་ཏུ་བརྟན་ཞིང་རབ་ཏུ་འཕགས་པ་དང་། མི་ཐམས་ཅད་ཀྱིས་དཔུང་ཚོགས་ཀྱི་ཡ་ཝཱེ་ནི་ཡེས་ར་ཨེལ་གྱི་དཀོན་མཆོག་ཡིན་པ་དང་། དངོས་གནས་ཡེས་ར་ཨེལ་གྱི་དཀོན་མཆོག་ཡིན་ཞེས་བརྗོད་པར་ཤོག དེ་ནས་ཁྱེད་ཀྱི་ཞབས་ཕྱི་དཱ་བིད་ཀྱི་ཁྱིམ་རྒྱུད་ནི་ཁྱེད་ཀྱི་སྤྱན་སྔར་བརྟན་པོར་ཚུགས་པའོ། །
[25] ཀྱེ་བདག་གི་དཀོན་མཆོག་ལགས། ཁྱེད་ཀྱིས་ཉིད་ཀྱི་ཞབས་ཕྱི་ལ། ངས་ཁྱོད་ཀྱི་དོན་དུ་ཁྱིམ་གཞིས་འཛུགས་པར་བྱའོ་ཞེས་མངོན་པར་མཛད་པས། ཞབས་ཕྱི་བདག་གིས་ད་གཟོད་སེམས་ནས་གསོལ་བ་འདི་བཞིན་འདེབས་ཕོད་པ་ཡིན།
[26] ཀྱེ་གཙོ་བོ་ཡ་ཝཱེ་ལགས། ཁྱེད་ཁོ་ན་དཀོན་མཆོག་ཡིན་ལ། ཁྱེད་ཀྱིས་དེ་སྔར་ཉིད་ཀྱི་ཞབས་ཕྱི་ལ་གཡང་འདི་དག་གནང་བར་ཁས་བླངས་པ་ཡིན།
[27] ད་ནི་ཉིད་ཀྱི་ཞབས་ཕྱིའི་ཁྱིམ་རྒྱུད་ལ་བྱིན་རླབས་གནང་ནས་དེ་དུས་རྒྱུན་དུ་ཁྱེད་ཀྱི་ཞལ་ངོར་གནས་པར་མཛོད་ཅིག ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཁྱིམ་རྒྱུད་ལ་བྱིན་རླབས་གནང་བ་ཡིན་པས། དེ་ལ་ཇི་སྲིད་བར་དུ་བྱིན་རླབས་འཐོབ་པར་འགྱུར་རོ་ཞེས་ཞུས་སོ། །