[1] ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་པ་ལ་དམག་བརྒྱབས་ནས། ཡེས་ར་ཨེལ་པ་རྣམས་ཕེ་ལེ་ཤེད་པའི་མདུན་ནས་བྲོས་ཏེ། མི་མང་པོ་གིལ་བོ་ཨ་རི་བོར་འགྱེལ་ཏོ། །
[2] ཕེ་ལེ་ཤེད་པ་རྣམས་ཀྱིས་སོ་ལོ་དང་དེའི་བུ་རྣམས་ཀྱི་རྗེས་དེད་ཅིང་། སོ་ལོའི་བུ་ཡོ་ན་ཐན་དང་ཨ་བི་ནཱ་དབ། མལ་ཀི་ཤུ་ཨ་བཅས་བསད་དོ། །
[3] སོ་ལོ་ལ་རྒོལ་པའི་འཐབ་མོ་ཤིན་ཏུ་དྲགས་ཤིང་། མདའ་པས་སོ་ལོ་མཐོང་ནས་ཁོ་ལ་མདའ་ཡིས་བརྒྱབས་ནས་རྨས་པར་གྱུར་ཏོ། །
[4] དེ་ནས་སོ་ལོས་རང་གི་གོ་ཁྲབ་འཁུར་མཁན་ལ་བཀའ་བབས་ཏེ་ན་རེ། མཚན་སྐྱི་མ་བཅད་པ་དེ་དག་འོངས་ནས་ང་ལ་སྨད་ར་མི་གཏོང་བའི་ཕྱིར། ཁྱོད་ཀྱིས་རལ་གྲི་ཕྱུངས་ནས་ང་ལ་སྣུན་པར་གྱིས་ཞེས་བསྒོས་ཀྱང་། གོ་ཁྲབ་འཁུར་མཁན་དེ་ཤིན་ཏུ་འཇིགས་པས་དེ་ལྟར་མ་བྱས་པས། སོ་ལོས་རལ་གྲི་བླངས་ནས་དེའི་ཁར་ལྕེབས་སོ། །
[5] གོ་ཁྲབ་འཁུར་མཁན་གྱིས་སོ་ལོ་ཤི་ཟིན་པ་མཐོང་བ་དང་། ཁོ་ཡང་རལ་གྲིའི་ཁར་ལྕེབས་ནས་ཤིའོ། །
[6] དེ་ལྟར་སོ་ལོ་དང་ཁོའི་བུ་གསུམ་དང་། ཁྱིམ་མི་ཐམས་ཅད་མཉམ་དུ་ཤི་བའོ། །
[7] ལུང་པར་སྡོད་པའི་ཡེས་ར་ཨེལ་པ་ཐམས་ཅད་ཀྱིས་ཡེས་ར་ཨེལ་གྱི་དམག་རྣམས་བྲོས་པ་དང་། སོ་ལོ་དང་ཁོའི་བུ་རྣམས་ཤི་ཟིན་པ་མཐོང་བས། རང་གི་གྲོང་ཁྱེར་རྣམས་དོར་ནས་བྲོས་པ་དང་། ཕེ་ལེ་ཤེད་པ་རྣམས་འོངས་ནས་དེ་ཚོའི་གྲོང་ཁྱེར་ནང་དུ་བསྡད།
[8] དེའི་ཕྱི་ཉིན་ཕེ་ལེ་ཤེད་པ་རྣམས་བེམ་པོ་དག་གི་གོས་བཤུ་བར་འོངས་དུས་སུ། སོ་ལོ་དང་དེའི་སྲས་རྣམས་གིལ་བོ་ཨ་རི་བོར་ཤི་ཟིན་པ་མཐོང་ནས།
[9] དེ་ཚོས་ཁོའི་དམག་ཆས་བཤུས་ཤིང་། ཁོའི་མགོ་བླངས་ནས་གོ་ཁྲབ་བཤུས་ཏེ། ཕེ་ལེ་ཤེད་པའི་ཡུལ་ཕྱོགས་ཀུན་ཏུ་མི་མངགས་ནས་དེ་ཚོའི་ལྷ་སྐུ་དང་འབངས་མི་ལ་འཕྲིན་བསྐུར་ཏོ། །
[10] དེ་ཚོས་སོ་ལོའི་གོ་ཁྲབ་དེ་རང་གི་ལྷ་ཁང་དུ་བཞག་ཅིང་། ཁོའི་མགོ་ནི་དཱ་གོན་གྱི་ལྷ་ཁང་དུ་དཔྱངས།
[11] གིལ་ཨད་ཡཱ་བེ་སི་པ་རྣམས་ཀྱིས་ཕེ་ལེ་ཤེད་པས་སོ་ལོ་ལ་ཅི་བྱས་པ་ཐོས་ནས།
[12] དཔའ་རྒོད་ཐམས་ཅད་ཡར་སོང་ནས་སོ་ལོའི་སྤུར་དང་། ཁོའི་བུ་རྣམས་ཀྱི་བེམ་པོར་བདག་བྱས་ནས་ཡཱ་བེ་སི་ལ་ཁྱེར་འོངས་ཤིང་། ཁོ་རྣམས་ཀྱི་རུས་པ་ཡཱ་བེ་སིའི་བེ་ཤིང་འོག་ཏུ་བསྐུངས་ནས། ཉིན་བདུན་ལ་སྨྱུང་གནས་བསྲུངས་པའོ། །
[13] སོ་ལོས་གཙོ་བོ་ཡ་ཝཱེ་ལ་དད་ལོག་བྱས་པས་ཁོ་རང་ཤི་བ་སྟེ། ཁོས་གཙོ་བོ་ཡ་ཝཱེའི་གསུང་ལ་མ་ཉན་པ་དང་། བུད་མེད་ནག་ཆོས་མ་ནས་བརྟག་པ་ཞུས་པ་ལས།
[14] གཙོ་བོ་ཡ་ཝཱེ་ལ་མ་ཞུས་པས། གཙོ་བོ་ཡ་ཝཱེས་ཁོ་རང་གསོད་པར་མཛད་དེ། རྒྱལ་ཁྲི་ཡེ་སེའི་བུ་དཱ་བིད་ལ་གནང་ངོ་། །