[1] དེ་ནས་ཐཱར་གྱི་རྒྱལ་པོ་ཧི་རཱམ་གྱིས་དཱ་བིད་ཀྱི་དྲུང་དུ་བང་ཆེན་རྣམས་མངགས་ཤིང་། དཱ་བིད་ལ་ཕོ་བྲང་ཞིག་བཞེང་བའི་དོན་དུ་ཐང་ཤིང་དང་རྡོ་བཟོ། ཤིང་བཟོ་བཅས་བསྐྱལ་ཡོང་།
[2] དུས་དེར་དཱ་བིད་ཀྱིས་གཙོ་བོ་ཡ་ཝཱེས་ཁོང་ནི་ཡེས་ར་ཨེལ་གྱི་རྒྱལ་པོར་བསྐོས་པ་དང་། ཡེས་ར་ཨེལ་གྱི་དོན་དུ་ཁོང་གི་རྒྱལ་སྲིད་བརྟན་པོར་མཛད་པ་ཤེས་སོ། །
[3] དཱ་བིད་ཀྱིས་ཡེ་རུ་སཱ་ལེམ་དུ་ཡང་བཙུན་མོ་མང་དུ་བཞེས་ནས། སྲས་དང་སྲས་མོ་རྣམས་སྐྱེས་པ་སྟེ།
[4] འདི་རྣམས་ནི་ཡེ་རུ་སཱ་ལེམ་དུ་སྐྱེས་པའི་བུ་ཕྲུག་རྣམས་ཀྱི་མིང་སྟེ། ཤམ་མུ་ཨ་དང་ཤོ་བབ། ནཱ་ཐན། སོ་ལོ་མོན།
[5] ཡིབ་ཧར། ཨེ་ལི་ཤུ་ཨ། ཨེལ་ཕེ་ལེད།
[6] ནོ་གཱ། ནེ་ཕེག ཡཱ་ཕི་ཨ།
[7] ཨེ་ལི་ཤ་མཱ། པེ་ཨེལ་ཡ་དཱ། ཨེ་ལི་ཕེ་ལེད་བཅས་སོ། །
[8] ཕེ་ལེ་ཤེད་པ་རྣམས་ཀྱིས་དཱ་བིད་ནི་ཡེས་ར་ཨེལ་གྱི་རྒྱལ་པོར་བྱུགས་པར་ཐོས་པ་དང་། ཡོངས་རྫོགས་དཱ་བིད་འཚོལ་དུ་ཡར་ཕྱིན་པ་ལ། དཱ་བིད་ཀྱིས་དེ་ཐོས་པ་ཙམ་གྱིས། དེ་རྣམས་ལ་རྒོལ་ལན་སྤྲོད་དུ་སོང་ངོ་། །
[9] ཕེ་ལེ་ཤེད་པ་རྣམས་འོངས་ནས་རེ་པཱ་པའི་ལུང་པར་དཔུང་འཇུག་བྱས།
[10] དཱ་བིད་ཀྱིས་དཀོན་མཆོག་ལ་འདི་ལྟར། ང་རང་ཕེ་ལེ་ཤེད་པ་རྣམས་ལ་ཡར་རྒོལ་དུ་འགྲོ་བར་བྱའམ། ཁྱེད་ཀྱིས་དེ་རྣམས་བདག་གི་ལག་ཏུ་གཏོད་དམ་ཞུས་པས། གཙོ་བོ་ཡ་ཝཱེས་དེ་ལ་འདི་སྐད་དུ། ཁྱོད་རང་ཡར་སོང་དང་ངས་དེ་རྣམས་ཁྱོད་ཀྱི་ལག་ཏུ་གཏོད་པར་བྱ་ཞེས་གསུངས་སོ། །
[11] ཕེ་ལེ་ཤེད་པ་རྣམས་ཡར་པཱ་ཨལ་ཕེ་ར་ཙིམ་དུ་སླེབས་པ་དང་། དེར་དཱ་བིད་ཀྱིས་ཁོ་རྣམས་ཕམ་པར་བརྒྱབ་ཅིང་། དཱ་བིད་ན་རེ། ཆུ་ཡིས་ཆུ་རགས་ཁུར་བ་ལྟར་དུ་དཀོན་མཆོག་གིས་ང་རང་བརྒྱུད་ནས་དགྲ་བོ་རྣམས་ཕམ་པར་བརྒྱབ་བོ་ཞེས་སྨྲས་ཏེ། ས་ཆ་དེའི་མིང་དུ་པཱ་ཨལ་ཕེ་ར་ཙིམ་ཞེས་བཏགས་སོ། །
[12] ཕེ་ལེ་ཤེད་པ་རྣམས་ཀྱིས་ལྷ་སྐུ་རྣམས་དེ་རུ་དོར་བས། དཱ་བིད་ཀྱིས་མི་རྣམས་ལ་དེ་དག་མེར་བསྲེག་པའི་བཀའ་བབས་སོ། །
[13] དེ་ནས་ཕེ་ལེ་ཤེད་པ་རྣམས་ཀྱིས་སླར་ཡང་ལུང་པ་དེར་དཔུང་འཇུག་བྱས་པ་དང་།
[14] དཱ་བིད་ཀྱིས་ཡང་དཀོན་མཆོག་ལ་ཞུས་པ་ན། དཀོན་མཆོག་གིས་ཁོང་ལ་འདི་སྐད་དུ། ཁྱོད་དེ་རྣམས་ཀྱི་ར་མདར་མ་རྒྱུག་པར། ལམ་བསྐོར་ནས་ཁོ་ཚོ་དང་བྲལ་ཏེ་སྤོས་ཤིང་རྣམས་ཀྱི་ཕྱོགས་ནས་དེ་རྣམས་ལ་རྒོལ་བར་གྱིས།
[15] ཁྱོད་ཀྱིས་སྤོས་ཤིང་གི་རྩེ་མོར་གོམ་སྒྲ་ཐོས་པ་ཙམ་གྱིས་དམག་རྒྱོབ་དང་། གང་ལ་ཞེ་ན། དེའི་དུས་སུ་དཀོན་མཆོག་ནི་ཁྱོད་ཀྱི་མདུན་དུ་ཕེ་ལེ་ཤེད་པའི་དམག་དཔུང་དེ་གསོད་པར་གཤེགས་པ་ཡིན་ཞེས་གསུངས་པར།
[16] དཱ་བིད་ཀྱིས་དཀོན་མཆོག་གི་བཀའ་བཞིན་དུ་བྱས་ཏེ། གིབ་ཡོན་ནས་གེ་ཟེར་གྱི་བར་དུ་ཕེ་ལེ་ཤེད་པའི་དམག་ཚོགས་བསད།
[17] དེ་ནས་དཱ་བིད་ཀྱི་མིང་ཡུལ་ཕྱོགས་ཀུན་ཏུ་གྲགས་ཤིང་། གཙོ་བོ་ཡ་ཝཱེས་མི་རྒྱུད་ཐམས་ཅད་དཱ་བིད་ལ་འཇིགས་པར་མཛད་དོ། །