[1] Mga kapatid ko, huwag maging guro ang marami sa inyo dahil alam natin na tayo ay tatanggap ng lalong higit na kahatulan
[2] sapagkat tayong lahat ay natitisod sa maraming paraan. Kung ang sinuman ay hindi natitisod sa salita, ang taong ito ay ganap at kaya rin niyang pigilin ang buong katawan.
[3] Narito, naglalagay tayo ng bokado sa bibig ng mga kabayo upang sumunod sila sa atin at inililiko natin ang kanilang buong katawan.
[4] Narito, maging ang mga barko na bagaman ang mga ito ay malalaki at itinutulak ng malalakas na hangin, ang mga ito ay naililiko ng napakaliit na timon saan man nanaisin ng tagatimon.
[5] Gayundin naman, ang dila ay maliit na bahagi ngunit ito ay nagyayabang ng mga dakilang bagay. Narito kung paano napapaningas ng maliit na apoy ang malawak na kagubatan.
[6] At ang dila ay isang apoy, ang sanlibutan ng kalikuan. Sa gayong paraan ang dila ay nakasama sa mga bahagi ng katawan natin na siyang dumudungis sa buong katawan at pinaliliyab nito ang takbo ng kalikasan at ito ay pinagliliyab ng impiyerno,
[7] sapagkat ang bawat uri ng mga hayop at ng mga ibon at ng mga hayop na gumagapang at ng mga nilalang sa dagat ay napapaamo at napaamo na sa pamamagitan ng likas ng tao.
[8] Ngunit walang sinuman ang nakakapagpaamo sa dila na hindi napipigilan sa kasamaan at puno ng kamandag na nakakamatay.
[9] Sa pamamagitan nito ay pinupuri natin ang Diyos at Ama, at sa pamamagitan nito ay sinusumpa natin ang mga tao na mga ginawa ayon sa wangis ng Diyos.
[10] Sa bibig ding iyon ay lumalabas ang papuri at sumpa. Mga kapatid ko, ang mga bagay na ito ay hindi dapat maging ganito.
[11] Ang bukal ba ay naglalabas ng matamis at ng mapait na tubig sa isang butas?
[12] Mga kapatid ko, ang puno ba ng igos ay makakapamunga ng olivo, o ang puno ba ng ubas ay makakapamunga ng igos? Sa gayunding paraan, walang bukal na makapaglabas ng maalat at matamis na tubig.
[13] Sino sa inyo ang matalino at nakakaunawa? Hayaang ipakita niya ang kaniyang mga gawa mula sa mabuting pamumuhay sa pamamagitan ng kaamuan ng karunungan.
[14] Ngunit kung mayroon kayong mapait na inggitan at pakikipagtunggali sa inyong puso, huwag kayong magmapuri at magsinungaling laban sa katotohanan.
[15] Ang karunungang ito ay hindi bumababa mula sa itaas kundi ito ay makalupa, makalaman at mula sa demonyo
[16] sapagkat kung saan may inggitan at pakikipagtunggali ay naroroon ang kaguluhan at lahat ng masamang gawa.
[17] Ngunit una nga sa lahat, ang karunungang nagmula sa itaas ay dalisay, pagkatapos ay mapagpayapa, mahinahon, mapagpasakop, puspos ng kahabagan at mabubuting bunga, walang pagtatangi at walang pagkukunwari.
[18] At ang bunga ng katuwiran ay itinatanim sa kapayapaan sa kanila na gumagawa ng kapayapaan.