[1] Wa be fajur badri, Yachuuʼ wa kulla Bani Israaʼiil gammo min fariighum fi Chittiim wa nazalo fi khachum bahar al-Urdun. Wa humman gaʼado fi l-bakaan da gubbaal ma yagtaʼo.
[2] Wa fi muddit talaata yoom, chuyuukh al-chaʼab gaaʼidiin yuruukhu fi l-fariig
[3] wa anto amur wa gaalo : «Wakit tichiifu sanduug muʼaahadat Allah Ilaahku wa rujaal al-diin al-Laawiyiin al-yichiiluuh, khalaas gummu min bakaanku al-gaaʼidiin foogah wa taabuʼuuh.
[4] Wa be da, taʼarfu al-derib al-tichiiluuh achaan awwal intu ma addeetu be l-derib da. Wa waajib tikhallu beenku wa been al-sanduug faraga tisaawi waahid kiilomitir wa abadan ma tigarrubu leyah.»
[5] Wa Yachuuʼ gaal le l-chaʼab : «Khassusu nufuusku achaan ambaakir Allah yisawwi ajaayib fi usutku.»
[6] Wa Yachuuʼ gaal le rujaal al-diin : «Chiilu sanduug muʼaahadat Allah wa amchu giddaam al-chaʼab.» Wa khalaas humman chaalo sanduug al-muʼaahada wa macho giddaam al-chaʼab.
[7] Wa Allah gaal le Yachuuʼ : «Al-yoom, ana nisawwiik kabiir fi uyuun kulla Bani Israaʼiil achaan yaʼarfu kadar ana nukuun maʼaak misil kunt maʼa Muusa.
[8] Wa anti al-amur da le rujaal al-diin al-chaayliin sanduug al-muʼaahada wa guul leehum : ‹Kan wassaltu khachum bahar al-Urdun wa dasseetu rijleeku fi almiih, agiifu.›»
[9] Wa Yachuuʼ gaal le Bani Israaʼiil : «Taʼaalu gariib hini wa asmaʼo kalaam Allah Ilaahku.»
[10] Wa battaan Yachuuʼ gaal : «Wakit tichiifu sanduug muʼaahadat Allah Rabb kulla l-ard yagtaʼ bahar al-Urdun, khalaas fi l-wakit da, taʼarfu kadar Allah al-Hayy gaaʼid fi usutku. Wa taʼarfu kadar hu yaglaʼ giddaamku ard al-Kanʼaaniyiin wa l-Hittiyiin wa l-Hiwwiyiin wa l-Firizziyiin wa l-Girgaachiyiin wa l-Amuuriyiin wa l-Yabuusiyiin.
[12] Wa hassaʼ, aʼazulu raajil waahid min ayyi gabiila min gabaayil Bani Israaʼiil al-atnaachar.
[13] Wa rujaal al-diin yichiilu sanduug Allah Rabb kulla l-ard yadkhulu fi l-bahar. Wa wakit butuun rijleehum yadkhulu fi almi bahar al-Urdun, khalaas almi al-bahar da yinhajiz min almi al-jaari min al-een wa yagiif misil al-durdur.»
[14] Wa wakit al-chaʼab gammo min khiyamhum le yagtaʼo bahar al-Urdun, rujaal al-diin al-chaayliin sanduug al-muʼaahada macho giddaamhum.
[15] Wa da fi wakt al-gatiʼ al-foogah bahar al-Urdun malaan marra waahid lahaddi faat huduudah. Wa laakin wakit rujaal al-diin al-chaayliin sanduug muʼaahadat Allah wassalo fi khachum bahar al-Urdun wa dasso rijleehum fi l-almi,
[16] tawwaali al-almi al-jaari min al-een wagaf wa bigi misil durdur fi masaafa tawiile fi hillit Adam al-gaaʼide jamb Sartaan. Wa l-almi al-naazil ale l-bahar al-Mayyit wagaf marra waahid. Wa l-chaʼab gataʼo al-bahar mugaabil hillit Ariiha.
[17] Wa rujaal al-diin al-chaayliin sanduug muʼaahadat Allah wagafo saabtiin fi l-turaab al-yaabis fi usut bahar al-Urdun. Wa kulla Bani Israaʼiil gaaʼidiin yagtaʼo fi l-turaab al-yaabis da, lahaddi kulla l-umma gataʼat bahar al-Urdun.