[1] Wa khalaas, Muusa gaal le Allah : «Nisawwi chunu kan Bani Israaʼiil ma yisadduguuni wa la yasmaʼo kalaami wa yuguulu : ‹Allah ma baan leek !›»
[2] Wa Allah gaal leyah : «Indak chunu fi iidak ?» Wa Muusa gaal : «Indi asa.»
[3] Wa Allah gaal leyah : «Azgulha fi l-turaab.» Wa Muusa zagalha fi l-turaab wa l-asa bigat daabi wa hu jara minnah.
[4] Wa Allah gaal leyah : «Midd iidak wa akurbah min danabah.» Khalaas, Muusa gamma karabah wa l-daabi gabbal bigi asa.
[5] Wa Allah gaal : «Da bas al-cheyy al-tisawwiih le Bani Israaʼiil yisaddugu kadar Allah Rabb juduudhum Ibraahiim wa Ishaakh wa Yaakhuub baan leek.»
[6] Wa battaan Allah gaal leyah : «Diss iidak fi sadrak be daakhal le khalagak.» Wa Muusa khatta iidah fi sadrah be daakhal le khalagah. Wa wakit marag iidah min khalagah, iidah bigat barsa wa indaha gichir.
[7] Wa battaan gaal leyah : «Gabbil iidak fi sadrak.» Hu gabbal iidah fi sadrah wa battaan maragha wa gabbalat fi haalha misil awwal.
[8] Wa Allah gaal leyah : «Kan Bani Israaʼiil ma simʼo kalaamak wa la saddago be l-ajab al-awwal da, yisaddugu be l-ajab al-taani.
[9] Wa kan ma saddago be l-ajaayib al-itneen dool wa la simʼo kalaamak, chiil almi min bahar al-Niil wa subbah fi l-ard. Wa khalaas, al-almi da yichaglib damm.»
[10] Wa laakin Muusa gaal le Allah : «Ya Rabb, ana ma naadum al-yagdar yihajji adiil wa la min awwal wa la min inta naadeetni ana abdak. Ana khachmi tagiil wa ma nagdar nihajji ajala.»
[11] Wa Allah gaal leyah : «Yaatu anta khachum le l-insaan ? Wa yaatu yisawwi naadum abkam walla tarchaan ? Wa yaatu yanti choof le naadum walla yisawwiih amyaan ? Da ma ana Allah walla ?
[12] Khalaas amchi. Ana nukuun maʼaak wakit tihajji wa niʼooriik al-kalaam al-tuguulah.»
[13] Wa Muusa gaal : «Nachhadak, ya Rabb. Rassil naadum aakhar !»
[14] Khalaas fi l-bakaan da, Allah khidib min kalaam Muusa wa gaal : «Akhuuk Haaruun al-Laawi ma gaaʼid walla ? Ana naʼarif kadar hu yagdar yihajji adiil. Wa hassaʼ, hu jaayi fi l-derib le yilaagiik. Wa wakit yichiifak, yafrah bilheen.
[15] Wa inta tihajji leyah be l-cheyy al-waajib yuguulah. Wa ana zaati nukuun maʼaak inta wa maʼa Haaruun. Wa niʼooriiku be l-cheyy al-waajib tisawwuuh.
[16] Wa hu bas yihajji le l-chaʼab fi badalak wa yabga leek khachum al-kalaam. Wa kalaamak inta yabga leyah misil kalaam ilaahah.
[17] Wa kan le l-asa di, chiilha fi iidak wa beeha hi bas tisawwi al-ajaayib.»
[18] Wa wakit Muusa gaaʼid fi balad Midyaan, Allah gaal leyah : «Gabbil amchi fi Masir achaan kulla l-naas al-dawwaro yaktuluuk maato.» Wa khalaas, Muusa gamma macha le Yasruun nasiibah wa gaal leyah : «Antiini izin namchi nichiif ahali fi Masir le naʼarif kan humman gaaʼidiin hayyiin.» Wa Yasruun gaal le Muusa : «Amchi be l-salaam.»
[20] Wa Muusa chaal martah wa awlaadah wa rakkabaahum fi humaarah wa gamma maachi le balad Masir. Wa chaal fi iidah asaat Allah.
[21] Wa battaan Allah gaal le Muusa : «Daahu inta maachi le Masir. Wa kan wassalt, wassif le Firʼoon malik Masir kulla l-ajaayib al-ana anteetak gudra le tisawwiihum. Wa ana nigawwi raasah wa hu ma yikhalli Bani Israaʼiil yamurgu.
[22] Wa baʼad da, inta tuguul le l-malik : ‹Daahu Allah gaal : “Bani Israaʼiil humman misil wileedi al-bikir.
[23] Wa ana amartak tikhalli wileedi yamrug min baladak achaan yaʼabudni. Wa kan inta abeet ma tikhalliih yamrug, khalaas ana naktul wileedak al-bikir.”›»
[24] Fi l-derib fi l-bakaan al-Muusa raagid foogah, Allah garrab leyah le yaktulah.
[25] Wa tawwaali, martah Siffuura chaalat hajar tariin wa tahharat wileedha. Wa limsat rijileen Muusa be l-farwa al-gataʼatah min wileedha wa gaalat : «Inta bigiit leyi zooj hana damm.»
[26] Wa be da, Allah ma katal Muusa. Wa fi chaan al-tahuura di, khalaas Siffuura gaalat : «Inta bigiit leyi zooj hana damm.»
[27] Wa awwal, Allah gaal le Haaruun : «Amchi khaadi le l-sahara achaan tilaagi Muusa.» Wa Haaruun macha laaga akhuuh Muusa fi jabal Allah wa sallamah wa habbaah.
[28] Wa Muusa khabbar Haaruun be l-kalaam al-kallafah beyah Allah le yuguulah wa be kulla l-ajaayib al-amarah beehum Allah le yisawwiihum.
[29] Wa wakit Muusa wa Haaruun wislo fi Masir, lammo kulla chuyuukh Bani Israaʼiil.
[30] Wa Haaruun kallamaahum be kulla kalaam Allah al-gaalah le Muusa wa sawwo al-ajaayib giddaam al-chaʼab.
[31] Wa Bani Israaʼiil saddago. Wa wakit irfo kadar Allah chaaf taʼabhum wa dawwar yinajjiihum, khalaas kulluhum dangaro wa sajado.