[1] Wa Allah hajja le Muusa wa gaal :
[2] «Guul le Bani Israaʼiil : ‹Ayyi naadum minku al-galbah kariim khalli yijiib leyi hadiiye.
[3] Wa dool al-hadaaya al-intu takhbaloohum min Bani Israaʼiil. Humman dahab wa fudda wa nahaas
[4] wa gumaach zahri wa garadi wa ahmar wa gumaach kattaan wa suuf inze
[5] wa firaaw kubaach madbuukhiin // wa mulawwaniin be loon ahmar wa farwa hint ijil al-bahar wa hatab hana chadar al-sunt
[6] wa dihin le l-faanuus wa itir le dihin al-masahaan wa itir le l-bakhuur al-muʼattar
[7] wa hajar al-usmah agiig wa hujaar aakhariin khaaliyiin le yijammulu beehum al-farmala // wa l-sideeriiye hana kabiir rujaal al-diin.
[8] «‹Abnu leyi bakaan mukhaddas le nagood fi usutku.
[9] Wa asnaʼo al-kheema di wa muʼiddaatha sawa sawa min al-nizaam al-ana niwassifah leek.
[10] «‹Asnaʼ sanduug min khachab al-sunt tuulah duraaʼeen wa nuss wa urdah duraaʼ wa nuss wa tuulah foog kula duraaʼ wa nuss.
[11] Wa amsahah be dahab saafi min daakhal lahaddi barra. Wa darris khachmah kula be dahab.
[12] Wa asnaʼ arbaʼa khawaatim hana dahab wa lassighum fi l-koonyaat al-arbaʼa hana l-sanduug. Wa da itneen fi l-nuss al-waahid wa itneen fi l-nuss al-aakhar.
[13] Wa addil iidaan itneen min hatab al-sunt wa amsahhum be dahab.
[14] Wa dakhkhilhum fi l-khawaatim al-arbaʼa al-mulassagiin fi l-sanduug achaan yichiiluuh beehum.
[15] Wa l-iidaan dool khalliihum yagoodu fi l-khawaatim, ma yisilluuhum minhum abadan.
[16] Wa khutt fi lubb al-sanduug al-liihaan al-fooghum kalimaat al-muʼaahada al-ana nantiihum leek.
[17] «‹Wa asnaʼ sidaade le l-sanduug min dahab saafi. Tuul al-sidaade di yukuun duraaʼeen wa nuss wa urdaha duraaʼ wa nuss.
[18] Asnaʼ min al-dahab makhluugiin samaawiyiin itneen wa khuttuhum ayyi waahid fi taraf al-sidaade mulgaabiliin.
[19] Khutt ayyi waahid fi taraf al-sidaade yaʼni al-waahid be hini wa l-aakhar be hinaak mulassagiin fi l-sidaade.
[20] Wa l-makhluugiin al-samaawiyiin dool mumattitiin janaaheehum giddaam wa mukhattiyiin beehum al-sidaade. Ayyi waahid mugaabil al-aakhar wa mudangiriin ale l-sidaade.
[21] «‹Wa khutt al-sidaade fi khachum al-sanduug. Wa fi daakhal al-sanduug, khutt al-liihaan al-fooghum kalimaat al-muʼaahada al-ana nantiihum leek.
[22] Wa hinaak foog le sidaadit al-sanduug ambeen al-makhluugiin al-samaawiyiin al-itneen, ana nigaabilak. Wa nikallim leek be kulla l-awaamir al-nantiihum le Bani Israaʼiil.
[23] «‹Asnaʼ tarabeeza be khachab al-sunt. Tuulha duraaʼeen wa urdaha duraaʼ wa tuulha foog duraaʼ wa nuss.
[24] Wa amsahha be dahab saafi. Wa darris khachumha be dahab.
[25] Wa hawwig khachum al-tarabeeza be hatab urdah yukuun arbaʼa usbaʼ wa darrisah be dahab.
[26] Wa asnaʼ arbaʼa khawaatim min dahab wa lassighum fi l-koonyaat al-arbaʼa hana l-tarabeeza. Kulla khaatim yagood muwaafig le rijil waahide min al-tarabeeza.
[27] Wa l-khawaatim yabgo gariibiin le khachum al-tarabeeza. Wa be da, yagdaro yidissu fooghum iidaan itneen wa yichiilu beehum al-tarabeeza.
[28] Wa l-iidaan dool sawwiihum be hatab al-sunt wa amsahhum be dahab le yichiilu beehum al-tarabeeza.
[29] Wa l-tarabeeza di sawwi leeha sufar wa kharaariif wa abaariig wa kiisaan min dahab saafi al-yistaʼmaloohum wakit yigaddumu hadaaya charaab.
[30] Wa khutt fi l-tarabeeza al-khubza al-yigaddumuuha leyi. Wa hi tukuun giddaami daayman.
[31] «‹Wa asnaʼ leyi faanuus min dahab saafi. Al-faanuus da wa gaʼarah wa saagah wa kiyeesaatah wa dakaarmah wa zuhuurah kulla ke sunʼa waahide bas.
[32] Wa yilfarraʼ min saag al-faanuus da sitte furuuʼ, talaata furuuʼ min nuss waahid wa talaata min nuss aakhar.
[33] Wa fi ayyi firiʼ, sawwi talaata kiyeesaat yichaabuhu zahrat al-looz be dukrumitha wa waragha. Wa da fi kulla firiʼ min al-furuuʼ al-sitte.
[34] Wa fi saag al-faanuus kula, sawwi arbaʼa kiyeesaat yichaabuhu zahrat al-looz be dukrumitha wa waragha.
[35] Wa tihit ayyi machbak hana furuuʼ itneen, sawwi dukrume.
[36] Wa kulla l-dakaarim wa l-furuuʼ yukuunu madguugiin sunʼa waahide bas min dahab saafi.
[37] Wa sawwi sabʼa tiyeesaat le l-naar wa khuttuhum fi l-faanuus da achaan wakit yiwalluʼuuhum, niiraanhum yidawwu kulla l-bakaan al-giddaamhum.
[38] Sawwi kalaaliib wa taffaayaat min dahab saafi.
[39] Wa l-dahab al-saafi al-tasnaʼ beyah al-faanuus wa kulla muʼiddaatah, waznah yabga 34 kiilo.
[40] Wa khalaas, chiif wa asnaʼ kulla cheyy hasab al-nizaam al-ana wassaftah leek fi l-jabal da.