[1] Wa Muusa lamma kulla mujtamaʼ Bani Israaʼiil wa gaal leehum : «Dool humman al-churuut al-Allah amaraaku le takhdumu beehum.
[2] Fi sitte yoom sawwu khidmitku. Wa laakin fi l-yoom al-saabiʼ, da sabt hana raaha wa hu mukhassas le Allah. Wa kan naadum sawwa ayyi amal fi l-yoom al-saabiʼ da, waajib yaktuluuh.
[3] Wa fi yoom al-sabt, naar kula ma tiʼooguduuha fi buyuutku.»
[4] Wa Muusa gaal le kulla mujtamaʼ Bani Israaʼiil : «Da bas al-cheyy al-Allah amaraaku beyah.
[5] Gaddumu hadiiye le Allah. Wa ayyi naadum minku al-galbah kariim khalli yijiib hadiiye le Allah. «Al-hadaaya dool humman dahab wa fudda wa nahaas
[6] wa gumaach zahri wa garadi wa ahmar wa gumaach kattaan wa suuf inze
[7] wa firaaw kubaach madbuukhiin // wa mulawwaniin be loon ahmar wa farwa hint ijil al-bahar wa hatab hana chadar al-sunt
[8] wa dihin le l-faanuus wa itir le dihin al-masahaan wa itir le l-bakhuur al-muʼattar
[9] wa hajar al-usmah agiig wa hujaar aakhariin khaaliyiin // le yijammulu beehum al-farmala // wa l-sideeriiye hana kabiir rujaal al-diin.
[10] «Wa khalli kulla l-sinaaʼiyiin minku yaju le yasnaʼo al-cheyy al-amar beyah Allah.
[11] Wa dool al-achya al-yasnaʼoohum. Al-achya al-yabnu beehum al-kheema min daakhal wa min barra wa khita al-kheema wa fangarha wa khachabha wa maraadiisha // wa amadha wa asaasha
[12] wa l-sanduug wa iidaanah wa sidaadtah wa l-sitaar al-yidaarig al-sanduug
[13] wa l-tarabeeza wa iidaanha // wa kulla muʼiddaatha wa l-khubza al-yigaddumuuha le Allah
[14] wa l-faanuus wa muʼiddaatah // wa niiraanah wa dihnah
[15] wa mukhbar al-bakhuur wa iidaanah wa dihin al-masahaan // wa l-bakhuur al-muʼattar wa l-sitaar le baab al-kheema
[16] wa l-madbah hana l-dahaaya al-muharragiin wa tachaachtah // min nahaas wa iidaanah // wa kulla muʼiddaatah wa hoot le l-wadu wa gaʼarah
[17] wa l-sataayir al-muhawwigiin beehum al-fadaay wa amadhum // wa asaashum wa sitaar hana baab al-fadaay
[18] wa wutaad al-kheema wa wutaad sataayir al-fadaay // wa hubaalhum
[19] wa khulgaan le l-khidme fi l-bakaan al-mukhaddas. Wa dool khulgaan al-khaassiin le Haaruun raajil al-diin wa khulgaan le awlaadah wakit yakhdumu misil rujaal diin.»
[20] Wa baʼad Muusa kammal kalaamah khalaas, kulla mujtamaʼ Bani Israaʼiil gammo macho minnah
[21] wa kulla insaan indah niiye wa galbah kariim jaab hadiiye le Allah achaan yisawwu beeha kheemat al-ijtimaaʼ wa kulla muʼiddaatha wa khulgaan khaassiin.
[22] Wa kulla l-naas jo awiin wa rujaal anto hadiiye be juud wa karam. Wa ayyi naadum indah galib kariim anta khuruus aw chinif aw khaatim aw hafiide aw ayyi cheyy aakhar hana dahab. Ayyi naadum minhum gaddam dahab hadiiye marfuuʼa le Allah.
[23] Wa ayyi naadum al-indah gumaach zahri aw garadi aw ahmar aw gumaach hana kattaan aw suuf inze aw firaaw kubaach madbuukhiin wa mulawwaniin be loon ahmar aw farwa hana ijil al-bahar kula jaabah hadiiye.
[24] Wa naas waahidiin jaabo hadiiye hana fudda aw nahaas wa antooha le Allah. Wa ayyi naadum al-indah khachab al-sunt al-yanfaʼ le ayyi khidme jaabah hadiiye.
[25] Wa ayyi mara al-indaha khibra fi khiyaatit al-gumaach khayyatat be iidha wa jaabatah hadiiye. Wa l-gumaach da hana kattaan wa loonah zahri aw garadi aw ahmar.
[26] Wa ayyi mara al-indaha niiye wa indaha khibra tarrat suuf inze.
[27] Wa chuyuukh al-chaʼab jaabo hujaar agiig wa hujaar aakhariin khaaliyiin le yurussuuhum fi l-farmala hana raajil al-diin wa fi l-sideeriiye.
[28] Wa anto battaan aryaah wa dihin le l-faanuus wa dihin le l-masahaan wa itir le l-bakhuur al-muʼattar.
[29] Wa kulla insaan min Bani Israaʼiil al-indah niiye, kan raajil walla mara kula, jaab cheyy le l-khidme al-amaraahum beeha Allah be waasitat Muusa.
[30] Wa Muusa gaal le Bani Israaʼiil : «Asmaʼo. Daahu Allah azal Basaliil wileed Uuri wileed Huur min gabiilat Yahuuza.
[31] Wa hu nazzal Ruuhah foogah wa antaah khibra wa fihim wa maʼrafa le yasnaʼ kulla cheyy
[32] wa da, le yasnaʼ achya be dahab wa fudda wa nahaas
[33] wa le yagtaʼ al-hujaar al-khaaliyiin wa yanguchhum wa yanjur al-khachab wa yasnaʼ kulla cheyy.
[34] Wa be da, Allah anta ilim le Basaliil wa Uhuliyaab wileed Akhisamaak min gabiilat Daan le yiʼallumu naas aakhariin.
[35] Wa hu antaahum khibra achaan yanguchu wa yarsumu wa yikhayyutu gumaach kattaan al-loonah zahri wa garadi wa ahmar wa yitirru gabag wa yikhayyutu wa yasnaʼo kulli cheyy.»