[1] Wa fi sanit 36 hana hukum Aasa malik mamlakat Yahuuza, Baʼaacha malik mamlakat Israaʼiil gamma yihaarib mamlakat Yahuuza. Wa gawwa hillit al-Raama le yadhar al-derib le Aasa wa naasah ma yamurgu wa la yadkhulu be l-derib da.
[2] Wa khalaas Aasa chaal min al-fudda wa l-dahab al-gaaʼidiin fi makhaazin hana beet Allah wa gasir al-malik wa rassalaahum le Banhadaad malik balad Araam al-gaaʼid fi madiinat Dimachkh. Wa rassal leyah wa gaal :
[3] «Khalli nisawwu alaakha beeni wa beenak misil al-alaakha al-bigat ambeen abuuyi wa abuuk. Daahu nirassil leek fudda wa dahab wa natlub minnak tagtaʼ alaakhtak maʼa Baʼaacha malik mamlakat Israaʼiil. Wa be da, yiwaggif al-harba al-gamma beeha diddi.»
[4] Wa Banhadaad khassad be kalaam al-malik Aasa. Wa khalaas, hu rassal khuyyaad askarah wa hajamo hillaal mamlakat Israaʼiil wa chaalo Iyuun wa Daan wa Abil Maayim wa kulla l-makhaazin hana hillaal gabiilat Naftaali.
[5] Wa min Baʼaacha simiʼ be l-khabar da, khalla minnah gawiyiin hillit al-Raama.
[6] Wa khalaas fi l-bakaan da, al-malik Aasa lamma kulla naas mamlakat Yahuuza le yangulu al-hajar wa l-hatab al-Baʼaacha lammaahum le yigawwi beehum hillit al-Raama. Wa hu astaʼmal al-hajar wa l-hatab dool le yigawwi beehum hillit Gabaʼ wa hillit Misfa.
[7] Wa fi l-wakit da, al-nabi Hanaani ja le Aasa malik mamlakat Yahuuza wa gaal leyah : «Inta atwakkal ale malik Araam wa ma atwakkal ale Allah Ilaahak wa be l-sabab da, askar balad Araam marago min iidak.
[8] Al-Liibiyiin wa l-Habachiyiin humman askar chudaad wa jo be arabaat al-harib wa siyaad kheel katiiriin marra waahid. Wa be da kula, Allah sallamaahum leek fi iidak wakit inta atwakkalt aleyah.
[9] Achaan Allah gaaʼid yiraakhib fi l-ard le yisaaʼid al-naas al-yitaabuʼuuh be galib mukhlis. Wa inta sawweet amal ma yanfaʼ wa be sabab da, min al-yoom inta tiwaajih al-harib.»
[10] Wa Aasa ziʼil fi l-nabi wa gayyadah fi l-sijin wa hu khidib ziyaada be sabab al-kalaam da. Wa fi l-wakit da, hu gamma yitaʼʼib waahidiin min al-chaʼab kula.
[11] Wa daahu kulla amal Aasa min al-bidaaya le l-nihaaya maktuub fi kitaab muluuk Bani Yahuuza wa Bani Israaʼiil.
[12] Wa fi sanit 39 hana hukmah, Aasa mirid wa karabah marad chadiid fi rijileenah. Wa wakit hu mardaan, ma fattach al-chifa min Allah laakin hu fattach al-dakaatiir le yiʼaalujuuh.
[13] Wa Aasa maat wa lihig abbahaatah fi sanit 41 hana hukmah.
[14] Wa dafanooh fi l-khabur al-nakatah le nafsah fi madiinat Dawuud. Wa khatto janaaztah fi sariir al-sabbo foogah riihe wa itir al-khalbatooh naas al-mutakhassisiin. Wa humman harrago leyah riihe katiire le yicharrufuuh.