[1] Wa Abiiya maat wa lihig abbahaatah wa dafanooh fi madiinat Dawuud. Wa wileedah Aasa hakam fi badalah. Wa fi wakit hukmah, al-balad gaaʼide fi raaha le muddit achara sana.
[2] Wa Aasa sawwa al-zeen wa l-adiil giddaam Allah Ilaahah.
[3] Hu haddam al-madaabih hana l-ilaahaat al-aakhariin wa l-bakaanaat al-aaliyiin wa rama al-hujaar al-khazzoohum wa kassar al-iidaan al-khazzoohum le ibaadat Achiira.
[4] Wa Aasa amar naas mamlakat Yahuuza le yitaabuʼu Allah Rabb juduudhum wa yitabbugu wasaaya Allah wa gawaaniinah.
[5] Wa hu haddam al-bakaanaat al-aaliyiin wa l-bakaanaat al-yiharrugu fooghum al-bakhuur fi kulla hillaal balad Yahuuza. Wa fi wakit hukmah, al-mamlaka gaaʼide be l-salaama.
[6] Wa hu bana mudun gawiyiin fi balad Yahuuza achaan fi l-wakit da, al-balad gaaʼide fi raaha. Wa fi l-siniin dool, ma kaan harib diddah achaan Allah antaah al-raaha.
[7] Wa Aasa gaal le naas mamlakat Yahuuza : «Khalli nabnu al-mudun dool wa nihawwuguuhum be durdur wa buyuut tuwaal hana muraakhaba wa biibaan be hawaadirhum, al-balad gaaʼide fi l-raaha fi iideenah da, achaan aniina taabaʼna Allah Ilaahna. Aywa, aniina taabaʼnaah wa hu antaana al-raaha min kulli jiihe.» Wa humman najaho fi bunaahum.
[8] Wa Aasa indah 300 000 askar min gabiilat Yahuuza chaayliin darag kubaar wa huraab wa 280 000 askar min gabiilat Banyaamiin chaayliin darag dugaag wa nachaachiib. Wa kulluhum rujaal furraas.
[9] Wa yoom waahid, Zaarah al-min balad al-Habacha ja be malyuun askar wa 300 arabaat harib wa hajamhum. Wa wassal lahaddi madiinat Mariicha.
[10] Wa Aasa marag leyah wa rasso le l-harib fi waadi Safaata gariib le madiinat Mariicha.
[11] Wa Aasa saʼal Allah Ilaahah wa gaal : «Ya Allah, balaak inta ma fi naadum al-yagdar yafzaʼ al-gaadir wa l-daʼiif. Afzaʼna, ya Allah Ilaahna, achaan aniina mutawakkiliin aleek inta ! Wa be usmak inta bas, aniina jiina nigaabulu al-malaayiin dool. Ya Allah, inta Ilaahna. Ma tikhalli al-insaan yinnasir foogak !»
[12] Wa Allah haarab al-Habachiyiin wa humman arrado giddaam Aasa wa askar mamlakat Yahuuza.
[13] Wa Aasa wa askarah taradoohum lahaddi hillit Garaar wa kataloohum wa waahid kula min al-Habachiyiin ma faddal. Achaan askarhum addammaro giddaam Allah wa giddaam chaʼabah. Wa askar mamlakat Yahuuza chaalo khaniime katiire.
[14] Wa humman chaalo kulla l-hillaal al-hawaale Garaar achaan khoof Allah karabaahum. Wa askar mamlakat Yahuuza nahabo al-hillaal dool wa chaalo minhum khaniime katiire.
[15] Wa humman hajamo zaraayib al-bahaayim wa chaalo khanam wa jumaal katiiriin. Wa baʼad da, gabbalo Madiinat al-Khudus.