[1] Wa battaan al-naas al-saakniin fi kadaadit Ziif jo ligooh le Chaawuul fi hillit Gibeeʼa wa gaalo leyah : «Inta ma taʼarfah kadar Dawuud mullabbid fi raas hajar Hakiila mugaabil nagaʼat Yachiimuun ?»
[2] Wa Chaawuul chaal 3 000 raajil min ahsan al-muhaaribiin hana Bani Israaʼiil wa gamma macha le kadaadit Ziif le yifattich Dawuud.
[3] Wa Chaawuul khatta muʼaskarah fi raas hajar Hakiila mugaabil Yachiimuun gariib le l-derib. Wa Dawuud kamaan gaaʼid fi l-kadaade. Wa wakit hu irif kadar Chaawuul ja wa gaaʼid yifattich foogah fi l-kadaade,
[4] hu rassal naas le yiʼakkudu min jayyit Chaawuul.
[5] Wa khalaas, Dawuud gamma macha chaaf al-muʼaskar hana Chaawuul wa akkad min al-bakaan al-Chaawuul wa Abniir wileed Niir khaayid deechah naaymiin foogah. Wa Chaawuul ragad fi ust al-muʼaskar wa askarah hawwagooh.
[6] Wa Dawuud naadaah le Akhiimalik al-Hitti wa le Abichaay akhu Yuwaab wileedha le Saruuya wa gaal : «Yaatu yamchi maʼaayi fi muʼaskar Chaawuul ?» Wa Abichaay gaal leyah : «Ana namchi maʼaak.»
[7] Wa khalaas, Dawuud wa Abichaay macho dakhalo be l-leel fi l-muʼaskar. Wa chaafo Chaawuul raagid wa naayim fi ust al-muʼaskar wa haribtah ale raasah. Wa Abniir wa askarah hawwagooh wa raagdiin.
[8] Wa Abichaay gaal le Dawuud : «Al-yoom, al-Rabb sallam leek aduuk ! Khalliini natʼanah be haribti marra waahide bas wa nilassigah fi l-turaab ! Wa ma nitanniih leyah !»
[9] Wa Dawuud gaal le Abichaay : «La, ma taktulah ! Achaan Allah ma yajʼal bari al-naadum al-yaktul al-malik al-hu masahah wa darrajah.»
[10] Wa Dawuud gaal : «Nahlif leek be Allah al-Hayy. Allah bas yigassir ajalah wa yumuut moot aadi walla yaktuluuh fi l-harib.
[11] Allah yasturni ma nukhutt iidi foogah, hu al-Allah masahah wa darrajah malik ! Hassaʼ da, khalli nichiilu haribtah al-gaaʼide ale raasah wa girbitah hint al-almi wa namchu.»
[12] Wa khalaas, Dawuud chaal al-harba wa l-girbe hint al-almi al-gaaʼidiin ale raas Chaawuul wa faato. Wa naadum waahid kula ma chaafaahum wa la hassa beehum wa la gamma. Kulluhum naaymiin achaan Allah nazzal fooghum noom chadiid.
[13] Wa Dawuud dalla min muʼaskar Chaawuul wa talaʼ fi raas hajar aakhar al-chiyya baʼiid minhum.
[14] Wa gamma yinaadi ale l-muʼaskar wa le Abniir wa gaal : «Ya Abniir wileed Niir ! Ya Abniir ! Ma turudd leyi walla ?» Wa Abniir gaal : «Inta ke yaatu al-tiʼiit le l-malik ?»
[15] Wa Dawuud gaal le Abniir : «Inta ma raajil al-mislak ma fiih fi Bani Israaʼiil walla ? Wa maala ma harast siidak al-malik ? Achaan naadum waahid min al-chaʼab ja wa yidoor yaktul siidak al-malik !
[16] Al-cheyy al-hassaʼ inta sawweetah, da ma adiil ! Wa nahlif leek be Allah al-Hayy, intu dool waajib leeku al-katil achaan intu ma harastu siidku, hu al-Allah masahah wa darrajah malik. Chiif ! Ween al-harba wa l-girbe hana l-malik al-gaʼado ale raasah ?»
[17] Wa Chaawuul irif hiss Dawuud. Wa gaal : «Ya wileedi Dawuud, da hissak inta walla ?» Wa Dawuud gaal : «Aywa, da hissi ana, ya siidi al-malik.»
[18] Wa Dawuud gaal : «Maala siidi yitaarid abdah ? Ana sawweet leek chunu ? Wa chunu al-fasaala al-ana sawweetha ?
[19] Wa hassaʼ da, min fadlak ya siidi, asmaʼ kalaami ana abdak. Kan Allah bas lazzaak achaan titaaridni, waajib ana nigaddim leyah dahiiye. Laakin kan min naas bas, khalli Allah yalʼanhum ! Achaan al-yoom humman taradooni min al-balad al-antaaha Allah warasa le chaʼabah wa da misil humman gaalo leyi : ‹Amchi wa aʼabud ilaahaat aakhariin.›
[20] Wa hassaʼ da, khalli dammi ma yidaffig baʼiid min giddaam Allah. Achaan malik Israaʼiil gamma yitaaridni misil gaaʼid yitaarid gamulaay walla jidaadit khala fi raas al-hajar.»
[21] Wa Chaawuul gaal : «Ana aznabt. Gabbil, ya wileedi Dawuud ! Ana battaan ma nisawwi leek cheyy fasil. Achaan fi l-yoom da, inta chift hayaati indaha khiima giddaamak. Wa ana khitiit ziyaada wakit gammeet diddak misil naadum ma indah fikir.»
[22] Wa Dawuud radda wa gaal : «Di hi harbit al-malik ! Khalli waahid min subyaanak yaji yichiilha.
[23] Wa Allah yikaafi ayyi naadum saalih wa amiin. Achaan al-yoom, Allah sallamaak leyi wa laakin ana ma dawwart nimidd iidi didd al-raajil al-Allah masahah wa darrajah malik.
[24] Wa misil al-yoom ana jaʼalt hayaatak muhimme, Allah kula yajʼal hayaati muhimme wa yinajjiini min ayyi masiibe.»
[25] Wa khalaas, Chaawuul gaal le Dawuud : «Allah yibaarikak, ya wileedi Dawuud ! Akiid inta tisawwi achya katiiriin wa tanjah !» Wa baʼad da, Dawuud chaal derbah wa faat. Wa Chaawuul gabbal beetah.