[1] Wa yoom waahid, jo khabbaro Dawuud wa gaalo leyah : «Daahu al-Filistiyiin hajamo hillit Khaʼiila wa nahabo al-makhaazin hana l-gameh.»
[2] Wa Dawuud saʼal Allah wa gaal : «Ya Rabb, namchi nihaarib al-Filistiyiin walla ?» Wa Allah gaal leyah : «Amchi haaribhum wa inta tinajji Khaʼiila.»
[3] Laakin al-rujaal al-maʼa Dawuud gaalo leyah : «Wakit aniina hini fi balad Yahuuza kula, aniina khaayfiin ! Wa kan macheena fi Khaʼiila le nihaarubu deech al-Filistiyiin, da ma yabga leena gaasi walla ?»
[4] Wa battaan Dawuud saʼal Allah. Wa Allah radda leyah wa gaal : «Gumm ! Amchi wa anzil fi Khaʼiila wa ana nisallim al-Filistiyiin leek fi iidak.»
[5] Wa khalaas, Dawuud chaal naasah wa gamma macha Khaʼiila wa haarab al-Filistiyiin. Wa annasar fooghum nasur kabiir wa chaal bahaayimhum wa najja sukkaan Khaʼiila.
[6] Wa gabul da, wakit Abiyaatar wileed Akhiimalik arrad wa macha lihig Dawuud fi hillit Khaʼiila, chaal sideeriiyit al-kharaar wa waddaaha maʼaayah.
[7] Wa wakit Chaawuul simiʼ kadar Dawuud gaaʼid fi hillit Khaʼiila, hu gaal : «Al-yoom, al-Rabb sallamah leyi fi iidi ! Achaan hu ja dakhal fi hille al-indaha biibaan yilgaffalo.»
[8] Wa khalaas, Chaawuul lamma kulla askarah le yamchu Khaʼiila yihaasuru Dawuud wa naasah.
[9] Wa Dawuud simiʼ kadar Chaawuul khattat al-fasaala diddah wa gaal le raajil al-diin Abiyaatar : «Jiib al-sideeriiye achaan nasʼalo Allah.»
[10] Wa Dawuud saʼal wa gaal : «Ya Allah Ilaah Bani Israaʼiil, ana abdak simiʼt kadar Chaawuul indah niiye yaji fi Khaʼiila wa yidammir al-hille di fi chaani ana.
[11] Wa kubaaraat Khaʼiila yisallumuuni leyah walla ? Wa hu yaji misil ana abdak simiʼtah walla ? Ya Allah Ilaah Bani Israaʼiil, khabbirni ana abdak !» Wa Allah gaal : «Aywa, Chaawuul yaji.»
[12] Wa Dawuud gaal battaan : «Wa kubaaraat Khaʼiila yisallumuuni le Chaawuul, ana wa naasi walla ?» Wa Allah gaal : «Aywa, humman yisallumuuku leyah kulluku.»
[13] Wa tawwaali, Dawuud wa naasah al-adadhum hawaale 600 marago min hillit Khaʼiila wa faato bakaan aakhar. Wa Chaawuul simiʼ khabar Dawuud arrad min hillit Khaʼiila wa khalaas, khalla mutaaradatah.
[14] Wa Dawuud macha fi kadaadit Ziif wa sakan fi jibaalha fi l-waʼar. Wa fi tuul al-wakit, Chaawuul gaaʼid yifattichah wa laakin al-Rabb ma sallamah leyah fi iidah.
[15] Wa Dawuud gaaʼid fi l-khaaba fi kadaadit Ziif wa simiʼ kadar Chaawuul gaaʼid yifattichah wa yidoor yaktulah.
[16] Wa Yuunataan wileed Chaawuul macha le Dawuud fi l-khaaba le yichajjiʼah fi iimaanah be l-Rabb.
[17] Wa gaal leyah : «Ma takhaaf achaan abuuyi Chaawuul ma yalgaak le yaktulak. Wa inta tahkim fi Israaʼiil wa ana nabga naaybak. Wa da abuuyi zaatah yaʼarfah !»
[18] Wa khalaas, humman al-itneen jaddado alaakhithum giddaam Allah. Wa baʼad da, Yuunataan gabbal beetah wa Dawuud gaʼad fi l-khaaba.
[19] Wa l-naas al-saakniin fi kadaadit Ziif macho le Chaawuul fi hillit Gibeeʼa wa gaalo leyah : «Dawuud mullabbid fi baladna fi l-khaaba fi raas hajar Hakiila, wati le Yachiimuun.
[20] Hassaʼ da, ya l-malik, kan tidoor taji leena, taʼaal ! Wa aniina nisallumuuh leek fi iidak.»
[21] Wa Chaawuul gaal leehum : «Allah yibaarikku achaan intu hanneetu foogi !
[22] Hassaʼ da, amchu akkudu adiil min al-bakaan al-hu gaaʼid foogah wa min al-naadum al-chaafah achaan ana simiʼt hu najiid bilheen.
[23] Chiifu wa aʼarfu kulla l-bakaan al-yillabbad foogah. Akkudu minnah wa taʼaalu leyi wa ana namchi maʼaaku. Wa khalaas, kan hu gaaʼid fi lubb al-balad di, ana nalgaah kan nifattichah fi lubb kulla khuchuum buyuut Yahuuza kula !»
[24] Wa l-naas al-saakniin fi kadaadit Ziif gaddamo le Chaawuul. Wa Dawuud wa naasah kamaan gaaʼidiin fi saharat Maaʼoon, wati le Yachiimuun.
[25] Wa Chaawuul chaal askarah wa macha yifattich Dawuud wa jo khabbaro Dawuud. Wa hu dalla min raas al-hajar wa gaʼad fi saharat Maaʼoon. Wa Chaawuul simiʼ wa bada yitaaridah le Dawuud fi saharat Maaʼoon.
[26] Wa Chaawuul maachi be l-nuss al-waahid hana l-hajar wa Dawuud wa naasah maachiin be l-nuss al-aakhar. Wa Dawuud maachi ajala le yiʼarrid min Chaawuul wa Chaawuul wa naasah kamaan yidooru yihawwuguuhum le Dawuud wa naasah le yikarrubuuhum.
[27] Wa laakin mursaal waahid ja wa gaal le Chaawuul : «Taʼaal ajala ! Al-Filistiyiin hajamo al-balad !»
[28] Wa khalaas, Chaawuul gabbal wa khalla mutaaradat Dawuud wa macha le yihaarib al-Filistiyiin. Wa achaan da, sammo al-bakaan da hajar al-Mufaaraga.
[29] Wa Dawuud marag min al-mantaga di wa macha sakan fi l-waʼar hana Een Jidi.