[1] Wa yoom waahid, al-Filistiyiin lammo deechhum le l-harib fi hillit Suuku al-gaaʼide fi balad Yahuuza wa gaʼado been Suuku wa hillit Aziikha, fi hillit Afas Dammiim.
[2] Wa Chaawuul kamaan lamma Bani Israaʼiil wa gaʼado fi waadi al-Butum wa jahhazo le muhaarabat al-Filistiyiin.
[3] Wa l-Filistiyiin gaʼado fi l-hajar al-be hini wa Bani Israaʼiil fi l-hajar al-aakhar be hinaak. Wa l-waadi ambeenaathum.
[4] Wa fiyah raajil waahid faaris marag min ust al-Filistiyiin. Wa usmah Jaaluut, min hillit Gaat. Wa tuulah ziyaada min 6 duraaʼ.
[5] Wa fi raasah taagiiye min nahaas wa jildah kula mukhatta be direʼ hana nahaas madfuur al-yawzin hawaale 60 kiilo.
[6] Wa siigaanah kula khattaahum be safaayih hana nahaas. Wa muʼallag fi kitfah tabiig hana nahaas.
[7] Wa uud haribtah misil uud murdaas al-ligdaabe wa sinnaha kamaan tawzin hawaale 7 kiilo. Wa l-khaddaam al-yichiil leyah daragatah maachi giddaamah.
[8] Wa Jaaluut wagaf wa naada Bani Israaʼiil wa gaal leehum : «Maalku rasseetu le l-harib ? Ana ma Filisti walla ? Wa intu abiid Chaawuul. Aʼazulu raajil minku wa khalli yanzil leyi.
[9] Wa kan haarabaani wa gidir katalaani, aniina nabgo leeku abiid. Wa laakin kan ana bas annasart foogah wa kataltah kamaan, intu tabgo leena abiid wa takhdumu leena.»
[10] Wa battaan al-Filisti gaal : «Wa daahu ana ! Nichammit foogku intu, ya Bani Israaʼiil ! Amurgu leyi raajil wa maʼaayah nilhaarabo !»
[11] Wa wakit Chaawuul wa kulla Bani Israaʼiil simʼo kalaam al-Filisti da, khaafo khoof chadiid wa anbahato.
[12] Wa Dawuud da, hu wileed raajil waahid min gabiilat Afraayim al-usmah Yassa wa hu min hillit Beet Laham fi turaab Yahuuza. Wa Yassa da indah tamaane awlaad. Wa fi wakit hukum Chaawuul, hu chayyab wa bigi kabiir ziyaada.
[13] Awlaad Yassa al-talaata al-kubaar, al-bikir usmah Aliyaab wa l-taani usmah Abinadaab wa l-taalit usmah Chamma, wa kulluhum taabaʼo Chaawuul fi bakaan al-harib.
[14] Wa Dawuud hu al-sakhayyar minhum. Wa l-talaata al-kubaar gaaʼidiin maʼa Chaawuul
[15] wa laakin Dawuud gaaʼid yamchi le Chaawuul wa yigabbil bakaan abuuh le yasrah be l-khanam fi Beet Laham.
[16] Wa Jaaluut al-Filisti gaaʼid yamrug wa yinaadi Bani Israaʼiil fajur wa achiiye lahaddi 40 yoom.
[17] Wa yoom waahid, Yassa gaal le wileedah Dawuud : «Chiil al-achara kooro hana l-gameh al-fariik da wa l-khubza al-achara dool wa waddiihum ajala le akhwaanak fi l-muʼaskar.
[18] Wa haak al-jibna al-achara dool wa waddiihum le khaayid al-alif. Wa alʼakkad min aafiyit akhwaanak wa jiib leyi minhum cheyy al-yiwassif kadar humman aafe.
[19] Talgaahum humman wa kulla rujaal Bani Israaʼiil maʼa Chaawuul fi waadi al-Butum gaaʼidiin yihaarubu al-Filistiyiin.»
[20] Wa Dawuud gamma be fajur badri wa khalla al-khanam maʼa l-haras wa chaal khumaamah wa macha misil abuuh Yassa amarah beyah. Wa wisil fi l-muʼaskar wakit al-askar kulluhum marago wa rasso le l-duwaas wa gaaʼidiin yichajjuʼu nufuushum be hiss aali.
[21] Wa Bani Israaʼiil maʼa l-Filistiyiin algaabalo le l-duwaas.
[22] Wa Dawuud khalla khumaamah le l-haras hana l-khumaam wa jara bakaan al-harib wa sallam akhwaanah.
[23] Wa wakit Dawuud gaaʼid yikallim maʼa akhwaanah, tawwaali al-raajil al-Filisti al-faaris al-usmah Jaaluut min hillit Gaat marag min ust al-Filistiyiin wa gaal kalaamah al-awwal gaaʼid yuguulah. Wa Dawuud simiʼ kalaamah da.
[24] Wa wakit Bani Israaʼiil chaafo al-raajil da, kaskaso minnah wa khaafo khoof chadiid.
[25] Wa rujaal Bani Israaʼiil gaalo : «Chiifu al-raajil al-gaaʼid yamrug da ! Hu yichchammat le Bani Israaʼiil ! Al-raajil al-yamrug leyah wa yaktulah, al-malik yisawwiih khani marra waahid. Wa yizawwijah bittah kula ! Wa le ahalah kula, ma yichiil minhum al-miiri.»
[26] Wa Dawuud saʼal al-rujaal al-gaaʼidiin jambah wa gaal : «Yantu chunu le l-naadum al-yaktul al-Filisti da wa yarfaʼ al-eeb min Bani Israaʼiil ? Al-Filisti al-ma mutahhar da, hu yaatu achaan yichchammat fi deech Allah al-Hayy ?»
[27] Wa humman hajjo leyah al-kalaam battaan wa gaalo : «Aywa ! Al-naadum al-yaktulah yalga kulla l-cheyy da !»
[28] Wa wakit Aliyaab akhuuh al-kabiir simiʼ kalaam Dawuud al-gaaʼid yikallim maʼa l-rujaal dool, hu ziʼil zaʼal chadiid wa gaal leyah : «Chunu jaabak hini ? Wa l-khanam khalleethum maʼa yaatu fi l-kadaade ? Ana naʼarfak ! Inta mutakabbir wa galbak murr wa jiit le tichiif al-harib bas !»
[29] Wa Dawuud gaal : «Ana sawweet chunu ? Mamnuuʼ leyi ma nikallim walla ?»
[30] Wa Dawuud anlafat min akhuuh wa saʼal naadum aakhar min al-kalaam da. Wa hu radda leyah nafs al-kalaam al-gaalah al-malik.
[31] Wa naas waahidiin simʼo kalaam Dawuud wa kallamooh le Chaawuul. Wa tawwaali, hu rassal leyah wa naadaah.
[32] Wa Dawuud gaal le Chaawuul : «Khalli naadum waahid kula galbah ma yakhaaf min al-Filisti da ! Ana abdak namchi leyah wa nihaaribah.»
[33] Wa Chaawuul gaal le Dawuud : «La ! Inta ma tagdar tihaarib al-Filisti da achaan inta wileed sakhayyar wa hu raajil kabiir wa muhaarib min hu sakhayyar.»
[34] Wa Dawuud radda le Chaawuul wa gaal : «Ya siidi ! Wakit ana gaaʼid nasrah be khanam abuuyi, kan duud aw dubb ja khataf waahide min khanami,
[35] ana najri waraayah nadurbah wa naglaʼha minnah. Wa kan natta foogi, nakurbah min dignah wa nuduggah lahaddi naktulah.
[36] Wa misil al-duud wa l-dubb al-abdak katalaahum, al-Filisti al-ma mutahhar da, hu kula ma yufuuthum. Achaan hu achchammat fi deech Allah al-Hayy !»
[37] Wa Dawuud gaal : «Allah al-najjaani min al-duud wa l-dubb, hu yagdar yinajjiini min al-Filisti da.» Wa Chaawuul gaal le Dawuud : «Amchi ! Allah maʼaak.»
[38] Wa Chaawuul labbasah le Dawuud khulgaanah wa dassa leyah taagiiye hana nahaas fi raasah wa labbasah dirʼah.
[39] Wa Dawuud rabat seefah fi sulbah min foog le khulgaanah wa dawwar yamchi. Wa laakin ma gidir yamchi achaan hu ma muwaalif beyah. Wa gaal le Chaawuul : «Ana ma nagdar namchi be kulla l-khumaam da achaan ana ma muwaalif beyah.» Wa khalaas, hu salla kulla l-khumaam da minnah.
[40] Wa chaal asaatah fi iidah wa azzal khamsa hajar amlas min al-waadi wa dassaahum fi mukhlaatah hint al-raaʼi. Wa chaal miglaaʼah fi iidah wa macha le l-Filisti.
[41] Wa l-Filisti zahaf lahaddi ja gariib le Dawuud wa l-khaddaam al-yichiil leyah daragatah maachi giddaamah.
[42] Wa l-Filisti chaafah le Dawuud wa hagarah achaan hu sakhayyar wa jamiil wa indah loon sameh.
[43] Wa l-Filisti gaal le Dawuud : «Ana kalib walla, inta taji leyi be asa ?» Wa laʼanah le Dawuud be ilaahaatah.
[44] Wa gaal battaan : «Taʼaal giddaam ! Khalli nanti lahamak le tuyuur al-sama wa le wuhuuch al-kadaade.»
[45] Wa Dawuud gaal le l-Filisti : «Inta jiit leyi be seef wa harba wa tabiig. Wa laakin ana jiit leek be usum Allah al-Gaadir Ilaah askar Bani Israaʼiil al-inta gaaʼid tichammit fooghum.
[46] Al-yoom Allah yarmiik fi iidi wa ana naktulak wa nagtaʼ raasak. Wa nanti jisas al-Filistiyiin le tuyuur al-sama wa haywaanaat al-ard. Wa be da, kulla l-dunya taʼarif kadar Bani Israaʼiil induhum Ilaah al-yihaarib leehum.
[47] Wa kulla l-naas al-gaaʼidiin hini yaʼarfu kadar Allah ma yansur be seef wa la be harba achaan Allah hu bas siid al-harib wa l-yoom yisallimku fi iideenna.»
[48] Wa wakit al-Filisti gamma macha le yilaagi Dawuud, Dawuud kula tawwaali jara macha leyah le yilaagiih.
[49] Wa Dawuud dassa iidah fi mukhlaatah wa chaal hajar wa zaragah be l-miglaaʼ wa darab al-Filisti fi buguchtah. Wa l-hajar da dakhal fi raasah. Wa l-Filisti wagaʼ be wijhah fi l-ard.
[50] Wa be da, Dawuud annasar fi l-Filisti be l-miglaaʼ wa l-hajar bas. Hu darabah le l-Filisti wa katalah bala seef.
[51] Wa Dawuud jara le l-Filisti wa salla seefah minnah wa tammamah. Wa beyah gataʼ raasah. Wa wakit al-Filistiyiin chaafo naadumhum al-faaris maat, humman arrado.
[52] Wa rujaal Bani Israaʼiil wa gabiilat Yahuuza aato wa taarado al-Filistiyiin lahaddi gariib le khachum al-waadi wa lahaddi khachum baab madiinat Akhruun. Wa jisas al-Filistiyiin muchattatiin fi derib hillit Chaʼaraayim lahaddi hillaal Gaat wa Akhruun.
[53] Wa Bani Israaʼiil gabbalo min mutaaradat al-Filistiyiin wa nahabo muʼaskarhum.
[54] Wa Dawuud chaal raas Jaaluut wa waddaah fi madiinat Uruchaliim. Wa silaahah kamaan, khattaahum fi kheemtah.
[55] Wa wakit Dawuud macha le yilaagi al-Filisti, Chaawuul chaafah wa saʼal Abniir khaayid al-deech wa gaal : «Ya Abniir, al-wileed da hana yaatu ?» Wa Abniir gaal : «Allah yansurak, ya l-malik ! Ana ma naʼarfah.»
[56] Wa l-malik gaal : «Amchi asʼal ! Al-sabi da wileed yaatu ?»
[57] Wa baʼad Dawuud katal al-Filisti wa gabbal, Abniir chaalah wa waddaah giddaam Chaawuul. Wa raas Jaaluut fi iidah.
[58] Wa Chaawuul saʼalah le Dawuud wa gaal : «Inta wileed yaatu ?» Wa Dawuud gaal : «Ana wileed abdak Yassa al-min hillit Beet Laham.»