[1] وَ وَكِتْ كُلَّ الْأُمَّةْ قَطَعَتْ بَحَرْ الْأُرْدُنْ خَلَاصْ، اللّٰهْ قَالْ لِيَشُوعْ:
[2] «شِيلُوا 12 رَاجِلْ مِنْ الشَّعَبْ. وَ دَا يَبْقَى رَاجِلْ وَاحِدْ مِنْ أَيِّ قَبِيلَةْ.
[3] وَ آمُرُوهُمْ وَ قُولُوا لَيْهُمْ: ‹شِيلُوا 12 حَجَرْ مِنْ أُسُطْ بَحَرْ الْأُرْدُنْ، مِنْ الْبَكَانْ الْوَقَفَوْا فَوْقَهْ رُجَالْ الدِّينْ. وَ وَدُّوهُمْ مَعَاكُو وَ خُطُّوهُمْ فِي الْبَكَانْ التِّدَلُّوا وَ تُنُومُوا فَوْقَهْ.›»
[4] وَ خَلَاصْ، يَشُوعْ نَادَى الْأَتْنَا عَشَرْ رُجَالْ الْعَزَلَاهُمْ مِنْ بَنِي إِسْرَائِيلْ وَ الرُّجَالْ دَوْل أَيِّ وَاحِدْ مِنْ قَبِيلَةْ.
[5] وَ قَالْ لَيْهُمْ: «أَمْشُوا قِدَّامْ صَنْدُوقْ اللّٰهْ إِلٰـهْكُو فِي أُسُطْ بَحَرْ الْأُرْدُنْ وَ أَيِّ وَاحِدْ مِنْكُو يِشِيلْ حَجَرْ وَاحِدْ فِي كِتْفَهْ عَلَيْ حَسَبْ عَدَدْ قَبَايِلْ بَنِي إِسْرَائِيلْ.
[6] أَشَانْ يَبْقَى عَلَامَةْ أَمْبَيْنَاتْكُو. أَكُونْ فِي الْمُسْتَقْبَلْ، عِيَالْكُو يَسْأَلَوْكُو وَ يُقُولُوا: ‹الْحُجَارْ دَوْل يِمَثُّلُوا شُنُو؟›
[7] وَ إِنْتُو تُقُولُوا لَيْهُمْ: ‹دَا أَشَانْ أَلْمِي هَنَا بَحَرْ الْأُرْدُنْ وَقَفْ وَكِتْ صَنْدُوقْ مُعَاهَدَةْ اللّٰهْ قَاعِدْ يَقْطَعْ الْبَحَرْ. وَ الْحُجَارْ دَوْل هُمَّنْ ذِكْرَةْ لِبَنِي إِسْرَائِيلْ إِلَى الْأَبَدْ كَدَرْ أَلْمِي بَحَرْ الْأُرْدُنْ وَقَفْ.›»
[8] وَ خَلَاصْ، بَنِي إِسْرَائِيلْ سَوَّوْا مِثِلْ يَشُوعْ أَمَرَاهُمْ بَيَّهْ. هُمَّنْ شَالَوْا 12 حَجَرْ مِنْ أُسُطْ بَحَرْ الْأُرْدُنْ فِي عَدَدْ قَبَايِلْ بَنِي إِسْرَائِيلْ، مِثِلْ اللّٰهْ قَالَهْ لِيَشُوعْ. وَ هُمَّنْ شَالَوْا الْحُجَارْ دَوْل وَ وَدَّوْهُمْ مَعَاهُمْ لَحَدِّي الْبَكَانْ النَّامَوْا فَوْقَهْ وَ خَطَّوْهُمْ هِنَاكْ.
[9] وَ بَعَدْ دَا، يَشُوعْ أَمَرْ يِشِيلُوا 12 حُجَارْ آخَرِينْ وَ يُرُصُّوهُمْ فِي أُسُطْ بَحَرْ الْأُرْدُنْ فِي بَكَانْ رِجْلَيْ رُجَالْ الدِّينْ الشَّايْلِينْ صَنْدُوقْ الْمُعَاهَدَةْ. وَ الْحُجَارْ دَوْل قَاعِدِينْ لَحَدِّي الْيَوْم.
[10] وَ رُجَالْ الدِّينْ الشَّايْلِينْ صَنْدُوقْ مُعَاهَدَةْ اللّٰهْ وَقَفَوْا فِي أُسُطْ بَحَرْ الْأُرْدُنْ لَحَدِّي تَمَّ كُلَّ الْكَلَامْ الْاللّٰهْ أَمَرْ بَيَّهْ يَشُوعْ لِيُقُولَهْ لِلشَّعَبْ. وَ دَا حَسَبْ الْكَلَامْ الْمُوسَى أَمَرْ بَيَّهْ يَشُوعْ. وَ الشَّعَبْ مَشَوْا عَجَلَةْ لِيَقْطَعَوْا الْبَحَرْ.
[11] وَ وَكِتْ كُلَّ الشَّعَبْ قَطَعَوْه خَلَاصْ، رُجَالْ الدِّينْ شَالَوْا صَنْدُوقْ اللّٰهْ وَ مَشَوْا قِدَّامْ الشَّعَبْ.
[12] وَ الْمَشَوْا أَوَّلْ مِنْ بَنِي إِسْرَائِيلْ هُمَّنْ قَبِيلَةْ رَأُوبِينْ وَ قَبِيلَةْ قَادْ وَ نُصّ قَبِيلَةْ مَنَسَّى. وَ هُمَّنْ مَشَوْا بِنِظَامْ هَنَا حَرِبْ قِدَّامْ بَنِي إِسْرَائِيلْ مِثِلْ أَوَّلْ مُوسَى قَالَهْ لَيْهُمْ.
[13] وَ حَوَالَيْ 40 000 رُجَالْ مُسَلَّحِينْ قَطَعَوْا الْبَحَرْ جَاهِزِينْ لِلْحَرِبْ وَ اللّٰهْ مَعَاهُمْ. وَ هُمَّنْ مُتَوَجِّهِينْ عَلَيْ كَدَادَةْ أَرِيحَا.
[14] وَ فِي الْيَوْم دَا، اللّٰهْ كَبَّرْ يَشُوعْ فِي عُيُونْ كُلَّ بَنِي إِسْرَائِيلْ وَ هُمَّنْ كَرَّمَوْه مِثِلْ أَوَّلْ كَرَّمَوْا مِنْ مُوسَى فِي حَيَاتَهْ.
[15] وَ خَلَاصْ، اللّٰهْ قَالْ لِيَشُوعْ:
[16] «آمُرْ رُجَالْ الدِّينْ الشَّايْلِينْ الصَّنْدُوقْ الْفَوْقَهْ لِيحَانْ الْمُعَاهَدَةْ، يَمُرْقُوا مِنْ لُبّ بَحَرْ الْأُرْدُنْ.»
[17] وَ يَشُوعْ أَمَرْ رُجَالْ الدِّينْ وَ قَالْ لَيْهُمْ: «أَمُرْقُوا مِنْ لُبّ بَحَرْ الْأُرْدُنْ.»
[18] وَ رُجَالْ الدِّينْ الشَّايْلِينْ صَنْدُوقْ مُعَاهَدَةْ اللّٰهْ مَرَقَوْا مِنْ لُبّ بَحَرْ الْأُرْدُنْ. وَ وَكِتْ خَطَّوْا رِجْلَيْهُمْ فِي التُّرَابْ الْيَابِسْ، خَلَاصْ أَلْمِي الْبَحَرْ قَبَّلْ فِي بَكَانَهْ وَ قَاعِدْ يَجْرِي وَ سَالْ مِثِلْ أَوَّلْ.
[19] وَ فِي الْيَوْم الْعَاشِرْ هَنَا الشَّهَرْ الْأَوَّلْ، الشَّعَبْ قَطَعَوْا بَحَرْ الْأُرْدُنْ. وَ سَكَنَوْا فِي قِلْقَالْ، صَبَاحْ مِنْ حِلَّةْ أَرِيحَا.
[20] وَ كَنْ لِلْحُجَارْ الشَّالَوْهُمْ مَعَاهُمْ مِنْ بَحَرْ الْأُرْدُنْ، يَشُوعْ رَصَّاهُمْ فِي قِلْقَالْ.
[21] وَ قَالْ لِبَنِي إِسْرَائِيلْ: «أَكُونْ فِي الْمُسْتَقْبَلْ، عِيَالْكُو يَسْأَلَوْكُو وَ يُقُولُوا لَيْكُو: ‹الْحُجَارْ دَوْل يِمَثُّلُوا شُنُو؟›
[22] خَلَاصْ، فَسُّرُوا لَيْهُمْ وَ قُولُوا: ‹بَنِي إِسْرَائِيلْ قَطَعَوْا بَحَرْ الْأُرْدُنْ دَا فِي التُّرَابْ الْيَابِسْ.
[23] وَ دَا أَشَانْ اللّٰهْ إِلٰـهْكُو يَبَّسْ أَلْمِي بَحَرْ الْأُرْدُنْ قِدَّامْكُو لَحَدِّي إِنْتُو قِدِرْتُوا قَطَعْتُوهْ. وَ دَا مِثِلْ اللّٰهْ إِلٰـهْكُو سَوَّاهْ لَيْنَا زَمَانْ وَكِتْ هُو يَبَّسْ الْبَحَرْ الْأَحْمَرْ قِدَّامْنَا وَ أَنِحْنَ قَطَعْنَاهْ.
[24] وَ بَيْدَا، كُلَّ شُعُوبْ الْأَرْض يَعَرْفُوا كَدَرْ إِيدْ اللّٰهْ شَدِيدَةْ وَ إِنْتُو عِيَالْنَا كُلَ تَخَافَوْا مِنْ اللّٰهْ إِلٰـهْكُو دَايْماً.›»