[1] وَ بَعَدْ خَطَّوْا كُلَّ الْبَلَدْ تِحِتْ حُكُمْهُمْ، كُلَّ مُجْتَمَعْ بَنِي إِسْرَائِيلْ لَمَّوْا فِي شِيلَوْه وَ بَنَوْا خَيْمَةْ الْإِجْتِمَاعْ.
[2] وَ مِنْ بَنِي إِسْرَائِيلْ، فِي سَبْعَةْ قَبَايِلْ اللِّسَّاعْ مَا لِقَوْا وَرَثَتْهُمْ.
[3] وَ يَشُوعْ قَالْ لِبَنِي إِسْرَائِيلْ: «لِمَتَى تَابَوْا مَا تَمْشُوا تِشِيلُوا الْبَلَدْ الْأَنْطَاهَا لَيْكُو اللّٰهْ رَبّ جُدُودْكُو؟
[4] أَعَزُلُوا تَلَاتَةْ رُجَالْ مِنْ أَيِّ قَبِيلَةْ وَ أَنَا نِرَسِّلْهُمْ يَمْشُوا يُرُوغُوا الْبَلَدْ. وَ يَكْتُبُوا رَسِمْ حُدُودْ أَرْض الْوَرَثَةْ الْمُوَافْقَةْ لِأَيِّ قَبِيلَةْ وَ يِقَبُّلُوا لَيِّ.
[5] وَ هُمَّنْ يِقَسُّمُوا الْبَلَدْ الْفَضَّلَتْ عَلَيْ سَبْعَةْ قِسِمْ. وَ قَبِيلَةْ يَهُوذَا يَقْعُدُوا فِي تُرَابْهُمْ فِي الْوَطِي وَ ذُرِّيَّةْ يُوسُفْ يَقْعُدُوا فِي تُرَابْهُمْ فِي الْمُنْشَاقْ.
[6] أَمْشُوا وَ أَكْتُبُوا رَسِمْ حُدُودْ الْبَلَدْ حَسَبْ السَّبْعَةْ قِسِمْ وَ جِيبُوهْ لَيِّ هِنِي قِدَّامِي. وَ أَنَا نِسَوِّي أَمْ عِيَيْدَاتْ قِدَّامْ اللّٰهْ إِلٰـهْنَا أَشَانْ نَعَرْفُوا الْقِسِمْ لِأَيِّ قَبِيلَةْ.
[7] وَ لَاكِنْ مَا فِي قِسِمْ أَمْبَيْنَاتْكُو لِلَّاوِيِّينْ أَشَانْ هُمَّنْ وَرَثَتْهُمْ خِدْمَةْ رُجَالْ الدِّينْ. وَ قَبِيلَةْ قَادْ وَ قَبِيلَةْ رَأُوبِينْ وَ نُصّ قَبِيلَةْ مَنَسَّى هُمَّنْ لِقَوْا قِسِمْهُمْ صَبَاحْ غَادِي لِبَحَرْ الْأُرْدُنْ. وَ دَا الْقِسِمْ الْأَنْطَاهْ لَيْهُمْ مُوسَى عَبْد اللّٰهْ.»
[8] وَ الرُّجَالْ الْعَزَلَوْهُمْ جَهَّزَوْا لِلْمَشِي. وَ قُبَّالْ مَا يَمْشُوا، يَشُوعْ قَالْ لَيْهُمْ: «أَمْشُوا رُوغُوا الْبَلَدْ وَ أَكْتُبُوا رَسِمْهَا وَ قَبُّلُوا لَيِّ هِنِي. وَ أَنَا نِسَوِّي أَمْ عِيَيْدَاتْ قِدَّامْ اللّٰهْ هِنِي فِي شِيلَوْه أَشَانْ نَعَرْفُوا الْقِسِمْ لِأَيِّ قَبِيلَةْ.»
[9] وَ الرُّجَالْ دَوْل مَشَوْا شَقَّوْا الْبَلَدْ وَ كَتَبَوْا رَسِمْ الْحِلَّالْ حَسَبْ السَّبْعَةْ قِسِمْ. وَ قَبَّلَوْا لِيَشُوعْ فِي الْفَرِيقْ فِي شِيلَوْه.
[10] وَ يَشُوعْ سَوَّى لَيْهُمْ أَمْ عِيَيْدَاتْ قِدَّامْ اللّٰهْ فِي شِيلَوْه. وَ بَيْدَا، يَشُوعْ قَسَّمْ الْبَلَدْ لِبَنِي إِسْرَائِيلْ حَسَبْ الْقِسِمْ الْوَقَعْ لِأَيِّ قَبِيلَةْ.
[11] وَ الْقِسِمْ الْأَوَّلْ أَنْطَوْه لِقَبِيلَةْ بَنْيَامِينْ حَسَبْ خُشُومْ بُيُوتْهُمْ. وَ التُّرَابْ اللِّقَوْه قَاعِدْ أَمْبَيْن تُرَابْ قَبِيلَةْ يَهُوذَا وَ تُرَابْ ذُرِّيَّةْ يُوسُفْ.
[12] وَ مِنْ جِيهَةْ الْمُنْشَاقْ، حُدُودْهُمْ يَمْشُوا مِنْ بَحَرْ الْأُرْدُنْ لَحَدِّي الدِّلَّيَّةْ هَنَا أَرِيحَا فِي الْمُنْشَاقْ وَ لَحَدِّي بَلَدْ الْجِبَالْ الْفِي الْغَرِبْ وَ يَقِيفُوا فِي صَحَرَاء بَيْت آوَنْ.
[13] وَ مِنْ الْبَكَانْ دَا، الْحُدُودْ يَمْشُوا لَحَدِّي لُوزْ وَ يِعَدِّي جَنْب الدِّلَّيَّةْ الْفِي جُنُوبْ لُوزْ يَعْنِي بَيْت إِيلْ. وَ الْحُدُودْ يِدَّلَّوْا عَلَيْ عَطَرُوتْ أَدَّارْ وَ يَمْشُوا عَلَيْ الْجَبَلْ الْقَاعِدْ جُنُوبْ مِنْ بَيْت حُرُونْ التِّحِتْ.
[14] وَ الْحُدُودْ يِقَبُّلُوا عَلَيْ الْغَرِبْ وَ يَمْشُوا عَلَيْ الْجُنُوبْ مِنْ الْجَبَلْ الْمُقَابِلْ بَيْت حُرُونْ. وَ يَمْشُوا لِقَرْيَةْ بَعَلْ يَعْنِي قَرْيَةْ يَعَرِيمْ الْهِي حِلَّةْ هِنْت قَبِيلَةْ يَهُوذَا. وَ دَوْل الْحُدُودْ مِنْ جِيهَةْ الْغَرِبْ.
[15] وَ مِنْ جِيهَةْ الْجُنُوبْ حُدُودْهُمْ يَبْدَوْا مِنْ قَرْيَةْ يَعَرِيمْ وَ يَمْشُوا عَلَيْ الْغَرِبْ لَحَدِّي عَيْن نِفْتُوحْ.
[16] وَ الْحُدُودْ يَمْشُوا طَرَفْ الْجَبَلْ الْمُقَابِلْ وَادِي بَنِي هِنُّومْ الْقَاعِدْ مُنْشَاقْ لِوَادِي رَفَايِينْ. وَ الْحُدُودْ يَمْشُوا مِنْ وَادِي بَنِي هِنُّومْ بِالدِّلَّيَّةْ الْجُنُوبِيِّةْ هَنَا جَبَلْ الْيَبُوسِيِّينْ وَ يِدَّلَّوْا عَلَيْ عَيْن رُوقِلْ.
[17] وَ الْحُدُودْ يِقَبُّلُوا مُنْشَاقْ لَحَدِّي عَيْن شَمْس وَ لَحَدِّي قَلِيلُوتْ الْمُقَابِلَةْ الْقَوْز هَنَا الْأَدُومِيمْ. وَ الْحُدُودْ يَمْشُوا عَلَيْ الْحَجَرْ هَنَا بُوهَنْ وِلَيْد رَأُوبِينْ.
[18] وَ الْحُدُودْ يِعَدُّوا بِالدِّلَّيَّةْ التِّدَلِّي فِي وَادِي الْأُرْدُنْ وَ يَمْشُوا عَلَيْ الْجُنُوبْ فِي وَادِي الْأُرْدُنْ.
[19] وَ الْحُدُودْ يِعَدُّوا عَلَيْ مُنْشَاقْ لِلدِّلَّيَّةْ هَنَا بَيْت حُقْلَةْ وَ يَمْشُوا لَحَدِّي مُنْشَاقْ لِلْبَحَرْ الْمَيِّتْ بَكَانْ الْيُصُبّ فَوْقَهْ بَحَرْ الْأُرْدُنْ. وَ دَوْل الْحُدُودْ مِنْ الْجُنُوبْ.
[20] وَ الْحُدُودْ مِنْ صَبَاحْ هُو بَحَرْ الْأُرْدُنْ. وَ دَا بَسْ أَرْض وَرَثَةْ هَنَا قَبِيلَةْ بَنْيَامِينْ حَسَبْ خُشُومْ بُيُوتْهُمْ بِحُدُودْهُمْ مِنْ كُلِّ جِيهَةْ.
[21] وَ الْمُدُنْ هَنَا قَبِيلَةْ بَنْيَامِينْ حَسَبْ خُشُومْ بُيُوتْهُمْ هُمَّنْ أَرِيحَا وَ بَيْت حُقْلَةْ وَ عِمَقْ قَصِيصْ
[22] وَ بَيْت عَرَبَةْ وَ صَمَرَايِمْ وَ بَيْت إِيلْ
[23] وَ عَوِيمْ وَ فَارَةْ وَ عُفْرَةْ
[24] وَ كَفَرْ عَمُّونَةْ وَ عُفْنِي وَ قَبَعْ. وَ بِالْجُمْلَةْ 12 مُدُنْ وَ الْحِلَّالْ التَّابْعِينْ لَيْهُمْ.
[25] وَ بَتَّانْ قِبْعُونْ وَ الرَّامَةْ وَ بِيرُوتْ
[26] وَ مِصْفَةْ وَ كَفِيرَةْ وَ مُصَّا
[27] وَ رَاقِمْ وَ يِرْفِيلْ وَ تَرَالَةْ
[28] وَ صِيلَعْ وَ أَلِفْ وَ مَدِينَةْ الْيَبُوسِيِّينْ يَعْنِي أُورُشَلِيمْ وَ قِبَيْعَةْ وَ قَرْيَةْ يَعَرِيمْ. وَ بِالْجُمْلَةْ 14 مُدُنْ وَ حِلَّالْهُمْ التَّابْعِينْ لَيْهُمْ. وَ دَا كُلَّ أَرْض وَرَثَةْ هِنْت قَبِيلَةْ بَنْيَامِينْ حَسَبْ خُشُومْ بُيُوتْهُمْ.