[1] وَ دَاهُو الْأَرْض اللِّقَوْهَا بَنِي إِسْرَائِيلْ مِثِلْ وَرَثَةْ فِي بَلَدْ كَنْعَانْ. وَ النَّاسْ الْقَسَّمَوْهَا لَيْهُمْ هُمَّنْ رَاجِلْ الدِّينْ أَلِعَازَرْ وَ يَشُوعْ وِلَيْد نُونْ وَ شُيُوخْ عَايِلَاتْ قَبَايِلْ بَنِي إِسْرَائِيلْ.
[2] وَ الْوَرَثَةْ دِي بِقَتْ لِتِسْعَةْ قَبَايِلْ وَ نُصّ قَبِيلَةْ مَنَسَّى بِأَمْ عِيَيْدَاتْ مِثِلْ اللّٰهْ أَمَرْ بَيَّهْ بِوَاسِطَةْ مُوسَى.
[3] أَوَّلْ، مُوسَى أَنْطَى لِإِتْنَيْن قَبِيلَةْ وَ نُصّ قَبِيلَةْ مَنَسَّى وَرَثَةْ صَبَاحْ لِبَحَرْ الْأُرْدُنْ. وَ لَاكِنْ لِلَّاوِيِّينْ مَا أَنْطَاهُمْ وَرَثَةْ مَعَ الْقَبَايِلْ الْآخَرِينْ.
[4] أَشَانْ عِيَالْ يُوسُفْ بِقَوْا إِتْنَيْن قَبِيلَةْ وَ هُمَّنْ قَبِيلَةْ مَنَسَّى وَ قَبِيلَةْ أَفْرَايِمْ. وَ مَا أَنْطَوْا أَرْض وَرَثَةْ لِقَبِيلَةْ لَاوِي فِي الْبَلَدْ إِلَّا أَنْطَوْهُمْ حِلَّالْ الْيَسْكُنُوا فَوْقهُمْ وَ أَرْض هَنَا سَرْحَةْ لِبَهَايِمْهُمْ وَ مَالْهُمْ.
[5] وَ بَنِي إِسْرَائِيلْ سَوَّوْا مِثِلْ اللّٰهْ أَمَرْ بَيَّهْ مُوسَى وَ هُمَّنْ أَلْقَاسَمَوْا الْبَلَدْ.
[6] وَ يَوْم وَاحِدْ، نَاسْ مِنْ قَبِيلَةْ يَهُوذَا جَوْا لِيَشُوعْ فِي قِلْقَالْ. وَ كَالِبْ وِلَيْد يَفُونَى الْقِنَازِي قَالْ لَيَّهْ: «إِنْتَ تَعَرِفْ تَمَامْ كَلَامْ اللّٰهْ الْقَالَهْ لِلنَّبِي مُوسَى فِي سَبَبِي أَنَا وَ فِي سَبَبَكْ إِنْتَ وَكِتْ أَنِحْنَ فِي قَادِشْ بَرْنِيعَ.
[7] أَنَا عُمْرِي 40 سَنَةْ وَكِتْ مُوسَى عَبْد اللّٰهْ رَسَّلَانِي مِنْ قَادِشْ بَرْنِيعَ لِنُرُوغْ الْبَلَدْ وَ أَنَا كَلَّمْت لَيَّهْ بِكُلَّ شَيّءْ الشِّفْتَهْ حَسَبْ مَعْرَفَتِي.
[8] وَ أَخْوَانِي الْمَشَوْا مَعَايِ جَوْا وَ بِكَلَامْهُمْ خَوَّفَوْا الشَّعَبْ. وَ لَاكِنْ أَنَا تَابَعْت اللّٰهْ إِلٰـهِي بِكُلَّ نِيّتِي.
[9] وَ فِي الْيَوْم دَا، مُوسَى حَلَفْ لَيِّ وَ قَالْ: ‹الْبَلَدْ الْإِنْتَ رُغْت فَوْقهَا تَبْقَى دَايْماً وَرَثَةْ لَيْك إِنْتَ وَ لِذُرِّيّتَكْ أَشَانْ إِنْتَ تَابَعْت اللّٰهْ إِلٰـهِي بِكُلَّ نِيّتَكْ.›
[10] «وَ هَسَّعْ، دَاهُو اللّٰهْ أَنْطَانِي عُمُرْ طَوِيلْ حَسَبْ كَلَامَهْ وَ مِنْ اللّٰهْ قَالْ الْكَلَامْ دَا لِمُوسَى، عِنْدَهْ 45 سَنَةْ. وَ فِي كُلَّ الْوَكِتْ دَا، بَنِي إِسْرَائِيلْ قَاعِدِينْ فِي الصَّحَرَاء. وَ الْيَوْم، دَاهُو عِنْدِي 85 سَنَةْ.
[11] وَ الْيَوْم، عِنْدِي نَفْس الْقُدْرَةْ وَكِتْ مُوسَى رَسَّلَانِي نَمْشِي نُرُوغْ الْبَلَدْ. وَ الْقُدْرَةْ الْهَسَّعْ عِنْدِي، هِي مِثِلْ الْقُدْرَةْ الْعِنْدِي وَكِتْ نِحَارِبْ أَوْ وَكِتْ نَمْشِي وَ نَجِي مِنْ الْحَرِبْ.
[12] وَ خَلَاصْ، أَنْطِينِي أَرْض فِي الْجِبَالْ مِثِلْ اللّٰهْ قَالَهْ فِي الْيَوْم دَا. أَشَانْ فِي الْيَوْم دَا، إِنْتَ عِرِفْت كَدَرْ بَنِي عَنَقْ قَاعِدِينْ فِي الْأَرْض دِي فِي مُدُنْ قَوِيِّينْ. وَ لَاكِنْ كَنْ اللّٰهْ يُكُونْ مَعَايِ، أَنَا نِشِيلْ مِنْهُمْ الْأَرْض دِي مِثِلْ اللّٰهْ قَالَهْ.»
[13] وَ يَشُوعْ بَارَكْ كَالِبْ وِلَيْد يَفُونَى وَ أَنْطَاهْ حِلَّةْ حِبْرُونْ مِثِلْ وَرَثَةْ.
[14] وَ بِسَبَبْ دَا، كَالِبْ وِلَيْد يَفُونَى الْقِنَازِي لِقِي حِبْرُونْ مِثِلْ وَرَثَةْ لَحَدِّي الْيَوْم أَشَانْ هُو تَابَعْ اللّٰهْ إِلٰـهْ بَنِي إِسْرَائِيلْ بِكُلَّ نِيّتَهْ.
[15] وَ قَبُلْ دَا، حِبْرُونْ أُسُمْهَا قَرْيَةْ أَرْبَعَةْ. وَ أَرْبَعَةْ دَا هُو رَاجِلْ مَعْرُوفْ فِي بَنِي عَنَقْ. وَ خَلَاصْ، الْحَرِبْ وَقَفْ وَ الْبَلَدْ لِقَتْ الرَّاحَةْ.