[1] وَ بَتَّانْ بَنِي إِسْرَائِيلْ قَمَّوْا يِسَوُّوا الْفَسَالَةْ قِدَّامْ اللّٰهْ. وَ بَيْدَا، اللّٰهْ سَلَّمَاهُمْ لِلْفِلِسْطِيِّينْ لِمُدَّةْ 40 سَنَةْ.
[2] وَ فِي الْوَكِتْ دَاكْ، فِيَّهْ رَاجِلْ وَاحِدْ مِنْ قَبِيلَةْ دَانْ الْيَسْكُنْ فِي حِلَّةْ صَرْعَةْ وَ أُسْمَهْ مَنُوحْ. وَ الرَّاجِلْ دَا، مَرْتَهْ عَاقْرَةْ مَا جَابَتْ عِيَالْ.
[3] وَ يَوْم وَاحِدْ، مَلَكْ اللّٰهْ بَانْ لِمَرْتَهْ وَ قَالْ لَيْهَا: «أَنَا نَعَرِفْ كَدَرْ إِنْتِ عَاقْرَةْ مَا عِنْدِكِ عِيَالْ. وَ لَاكِنْ هَسَّعْ، إِنْتِ تَبْقَيْ غَلْبَانَةْ وَ تِجِيبِي وِلَيْد.
[4] مِنْ هِنِي لِقِدَّامْ، فَكِّرِي مَا تَشَرْبَيْ خَمَرْ وَ لَا أَيِّ شَرَابْ الْبِسَكِّرْ وَ مَا تَاكُلِي أَكِلْ نِجِسْ،
[5] أَشَانْ إِنْتِ تَبْقَيْ غَلْبَانَةْ وَ تَلْدَيْ وِلَيْد. وَ كَنْ وِلِدْتِيهْ، مَا تِزَيِّنِي رَاسَهْ أَشَانْ الْوِلَيْد دَا مُخَصَّصْ لِلرَّبّ مِنْ هُو فِي بَطُنْكِ. وَ هُو بَسْ الْيَبْدَا يِنَجِّي بَنِي إِسْرَائِيلْ مِنْ الْفِلِسْطِيِّينْ.»
[6] وَ خَلَاصْ، الْمَرَةْ قَبَّلَتْ فِي الْبَيْت وَ قَالَتْ لِرَاجِلْهَا: «فِيَّهْ رَاجِلْ صَالِحْ هَنَا اللّٰهْ جَاءْ لَيِّ وَ الرَّاجِلْ دَا شَوْفتَهْ تِخَوِّفْ زِيَادَةْ. أَكُونْ هُو دَا مَلَكْ اللّٰهْ. وَ أَنَا مَا سَأَلْتَهْ هُو مِنْ وَيْن وَ هُو كُلَ مَا أَوْرَانِي أُسْمَهْ.
[7] وَ هُو قَالْ لَيِّ: ‹إِنْتِ تَبْقَيْ غَلْبَانَةْ وَ تَلْدَيْ وِلَيْد. وَ مِنْ هِنِي لِقِدَّامْ، مَا تَشَرْبَيْ خَمَرْ وَ لَا أَيِّ شَرَابْ الْبِسَكِّرْ وَ مَا تَاكُلِي أَكِلْ نِجِسْ أَشَانْ الْوِلَيْد دَا مُخَصَّصْ لِلرَّبّ مِنْ هُو فِي بَطُنْكِ لَحَدِّي يُمُوتْ.›»
[8] وَ مَنُوحْ سَأَلْ اللّٰهْ وَ قَالْ: «يَا رَبّ، خَلِّي الرَّاجِلْ الصَّالِحْ الْإِنْتَ رَسَّلْتَهْ دَا، يَجِينَا بَتَّانْ وَ خَلِّي يِوَصِّفْنَا الشَّيّءْ النِّسَوُّوهْ وَكِتْ الْوِلَيْد دَا يَلْدَوْه.»
[9] وَ خَلَاصْ، اللّٰهْ قِبِلْ سُؤَالْ مَنُوحْ وَ مَلَكْ اللّٰهْ جَاءْ بَتَّانْ لِمَرْتَهْ وَكِتْ هِي قَاعِدَةْ تِحِتْ فِي الزَّرَعْ. وَ رَاجِلْهَا مَنُوحْ مَا مَعَاهَا.
[10] وَ طَوَّالِي، الْمَرَةْ جَرَتْ لِرَاجِلْهَا خَبَّرَتَهْ وَ قَالَتْ لَيَّهْ: «دَاهُو الرَّاجِلْ الْجَانِي الْيَوْم دَاكْ، بَتَّانْ بَانْ لَيِّ!»
[11] وَ مَنُوحْ قَمَّ تَابَعْ مَرْتَهْ وَ جَوْا لِلرَّاجِلْ. وَ هُو قَالْ لَيَّهْ: «إِنْتَ بَسْ الرَّاجِلْ الْأَوَّلْ كَلَّمْت لِمَرْتِي وَلَّا؟» وَ هُو رَدَّ لَيَّهْ وَ قَالْ: «أَيْوَى، أَنَا بَسْ.»
[12] وَ مَنُوحْ قَالْ لَيَّهْ: «وَكِتْ كَلَامَكْ دَا يِلْحَقَّقْ، شُنُو الشُّرُوطْ الْوَاجِبْ لَيَّهْ؟ وَ أَنِحْنَ نِسَوُّوا شُنُو لِلْوِلَيْد دَا؟»
[13] وَ مَلَكْ اللّٰهْ قَالْ لِمَنُوحْ: «كُلَّ شَيّءْ الْأَنَا قُلْتَهْ لِمَرْتَكْ دِي، خَلِّي هِي تِفَكِّرْ فَوْقَهْ.
[14] مَا تَاكُلْ أَيِّ شَيّءْ الْجَايِ مِنْ الْعِنَبْ وَ لَا تَشْرَبْ خَمَرْ وَ لَا أَيِّ شَرَابْ الْبِسَكِّرْ وَ مَا تَاكُلْ أَكِلْ نِجِسْ. وَاجِبْ هِي تِطَبِّقْ كُلَّ الْكَلَامْ الْأَنَا قُلْتَهْ لَيْهَا.»
[15] وَ مَنُوحْ قَالْ لِمَلَكْ اللّٰهْ: «مِنْ فَضْلَكْ، خَلِّي نِضَيُّفُوكْ وَ نِقَدُّمُوا لَيْك سَخَلْ.»
[16] وَ مَلَكْ اللّٰهْ قَالْ لِمَنُوحْ: «حَتَّى كَانْ تِضَيِّفْنِي كُلَ، أَنَا مَا نَاكُلْ أَكْلَكْ. وَ لَاكِنْ كَنْ تِدَوْر تِقَدِّمْ ضَحِيَّةْ مُحَرَّقَةْ، قَدِّمْهَا لِلّٰهْ.» وَ مَنُوحْ مَا عِرِفْ كَدَرْ الرَّاجِلْ هُو مَلَكْ اللّٰهْ.
[17] وَ مَنُوحْ قَالْ لِمَلَكْ اللّٰهْ: «أُسْمَكْ يَاتُو؟ أَشَانْ وَكِتْ كَلَامَكْ دَا يِلْحَقَّقْ، نِشَرُّفُوكْ زِيَادَةْ.»
[18] وَ مَلَكْ اللّٰهْ قَالْ لَيَّهْ: «مَالَا تَسْأَلْنِي مِنْ أُسْمِي؟ أُسْمِي هُو عَجِيبْ بِلْحَيْن.»
[19] وَ مَنُوحْ شَالْ سَخَلْ وَ هَدِيَّةْ هَنَا دَقِيقْ وَ قَدَّمَاهُمْ ضَحِيَّةْ مُحَرَّقَةْ فِي رَاسْ حَجَرْ وَاحِدْ لِلّٰهْ. وَ طَوَّالِي، شَيّءْ عَجِيبْ بِقِي قِدَّامْ مَنُوحْ وَ مَرْتَهْ.
[20] وَ وَكِتْ لَهِيبْ النَّارْ قَاعِدْ يَطْلَعْ مِنْ الْمَدْبَحْ لِلسَّمَاءْ، مَلَكْ اللّٰهْ كُلَ طَلَعْ فِي اللَّهِيبْ. وَ وَكِتْ شَافَوْا الشَّيّءْ دَا، مَنُوحْ وَ مَرْتَهْ وَقَعَوْا بِوُجُوهُّمْ فِي الْأَرْض.
[21] وَ خَلَاصْ، مَنُوحْ عِرِفْ كَدَرْ دَا مَلَكْ اللّٰهْ. وَ مَلَكْ اللّٰهْ مَا بَانْ لَيَّهْ هُو وَ لَا لِمَرْتَهْ بَتَّانْ.
[22] وَ مَنُوحْ قَالْ لِمَرْتَهْ: «أَكِيدْ أَنِحْنَ نُمُوتُوا أَشَانْ شِفْنَا الرَّبّ!»
[23] وَ لَاكِنْ مَرْتَهْ قَالَتْ لَيَّهْ: «كَنْ اللّٰهْ دَوَّرْ يَكْتُلْنَا، مَا قِبِلْ مِنِّنَا الضَّحِيَّةْ الْمُحَرَّقَةْ وَ الْهَدِيَّةْ وَ لَا وَصَّفْنَا كُلَّ الْأَشْيَاءْ دَوْل وَ لَا أَوْرَانَا كُلَّ الْكَلَامْ دَا.»
[24] وَ الْمَرَةْ وِلْدَتْ وِلَيْد وَ سَمَّتَهْ شَمْشُونْ. وَ الْوِلَيْد كِبِرْ وَ اللّٰهْ بَارَكَهْ.
[25] وَ فِي مَنْطَقَةْ دَانْ أَمْبَيْن صَرْعَةْ وَ أَشْتَوُولْ، رُوحْ اللّٰهْ نَزَلْ فِي شَمْشُونْ وَ بَدَا يِشَجِّعَهْ.