[1] «يَا رُجَالْ الدِّينْ، أَسْمَعَوْا الْكَلَامْ دَا! يَا بَنِي إِسْرَائِيلْ، خُطُّوا بَالْكُو! يَا نَاسْ بَيْت الْمَلِكْ، خُطُّوا أَدَانْكُو! الشَّرِيعَةْ دِي مُوَجِّهَةْ لَيْكُو إِنْتُو أَشَانْ فِي مِصْفَةْ، كَجَّيْتُوا شَرَكْ // لِشَعَبِي وَ فِي جَبَلْ تَابُورْ، خَطَّيْتُوا لَيْهُمْ أَمْ كَجَّامَةْ.
[2] أَيْوَى، إِنْتُو نَكَتُّوا نُقْرَةْ كَبِيرَةْ // لِنَاسْ شِطِّيمْ وَ لَاكِنْ أَنَا نِأَدِّبْكُو كُلُّكُو.
[3] أَنَا نَعَرِفْ تَمَامْ قَبِيلَةْ أَفْرَايِمْ، أَيْوَى، بَنِي إِسْرَائِيلْ // مَا مُلَبَّدِينْ لَيِّ. يَا نَاسْ أَفْرَايِمْ، إِنْتُو أَشَّرْمَطْتُوا، أَيْوَى، بَنِي إِسْرَائِيلْ أَنَّجَّسَوْا.»
[4] وَ عَمَلْهُمْ الْهَوَانْ مَا يِخَلِّيهُمْ يِقَبُّلُوا لِإِلٰـهُّمْ أَشَانْ رُوحْ الشَّرْمَطَةْ قَاعِدَةْ فِي قُلُوبْهُمْ وَ هُمَّنْ مَا يَعَرْفُوا اللّٰهْ.
[5] إِسْتِكْبَارْ بَنِي إِسْرَائِيلْ يَشْهَدْ فَوْقهُمْ. بَنِي إِسْرَائِيلْ وَ نَاسْ أَفْرَايِمْ يِتَّرْتَعَوْا فِي شَانْ خَطَاهُمْ وَ بَنِي يَهُوذَا كُلَ يِتَّرْتَعَوْا مَعَاهُمْ.
[6] يَمْشُوا يِقَدُّمُوا بَقَرْهُمْ وَ غَنَمْهُمْ ضَحَايَا لِيِفَتُّشُوا اللّٰهْ وَ لَاكِنْ مَا يَلْقَوْه أَشَانْ هُو خَلَّاهُمْ خَلَاصْ.
[7] هُمَّنْ خَانَوْا اللّٰهْ أَشَانْ وِلْدَوْا عِيَالْ زِنَى. وَ فِي وَكِتْ قِصَيِّرْ بَسْ، يِدَّمَّرَوْا، هُمَّنْ وَ أَرْضُهُمْ.
[8] اللّٰهْ قَالْ: «أَضُرْبُوا الْبُوقْ فِي قِبَيْعَةْ وَ أَضُرْبُوا الْبُرُنْجِي فِي الرَّامَةْ. عِيطُوا لِبَيْت إِيلْ الْفَسْلَةْ وَ شِيفُوا وَرَاكُو، يَا نَاسْ بَنْيَامِينْ!
[9] فِي يَوْم الْعِقَابْ، نَاسْ أَفْرَايِمْ يَخْرَبَوْا. وَ الْخَبَرْ النِّبَلِّغَهْ لَيْكُو، يَا قَبَايِلْ إِسْرَائِيلْ، هُو خَبَرْ أَكِيدْ.
[10] كُبَارَاتْ يَهُوذَا مِثِلْ نَاسْ الْيِحَوُّلُوا الْكَلَنْكِي. أَنَا نِنَزِّلْ غَضَبِي فَوْقهُمْ مِثِلْ أَلْمِي السَّيْل.
[11] ظَلَمَوْا نَاسْ أَفْرَايِمْ وَ عَوَّجَوْا شَرِيعِتْهُمْ أَشَانْ هُمَّنْ يِرِيدُوا يَجْرُوا وَرَاءْ الرِّيحْ.
[12] وَ أَنَا نَبْقَى مِثِلْ أَرْضَةْ لِنَاسْ أَفْرَايِمْ وَ مِثِلْ سُوسَةْ لِبَنِي يَهُوذَا.
[13] نَاسْ أَفْرَايِمْ شَافَوْا مَرَضْهُمْ وَ بَنِي يَهُوذَا شَافَوْا عُوَارْهُمْ. وَ دَوَّرَوْا مُسَاعَدَةْ // مِنْ بَلَدْ أَشُورْ وَ رَسَّلَوْا نَاسْ لِلْمَلِكْ الْكَبِيرْ. لَاكِنْ الْمَلِكْ دَا مَا يَقْدَرْ يَشْفِيهُمْ وَ مَا يَقْدَرْ يِدَاوِي عُوَارْهُمْ.
[14] أَشَانْ أَنَا نَبْقَى مِثِلْ دُودْ // ضِدّ نَاسْ أَفْرَايِمْ وَ مِثِلْ فَرْخ الدُّودْ // ضِدّ بَنِي يَهُوذَا. أَنَا بَسْ نَضْرُبْهُمْ وَ نِشَرِّطْهُمْ وَ نُكُرُّهُمْ وَ نِوَدِّيهُمْ وَ مَا فِي نَادُمْ الْيِنَجِّيهُمْ مِنِّي.
[15] أَنَا نَمْرُقْ وَ نِقَبِّلْ فِي بَكَانِي لَحَدِّي يِعْتَرُفُوا بِخَطَاهُمْ وَ يِوَجُّهُوا عَلَيِّ. وَ فِي ضِيقِتْهُمْ دِي، يِفَتُّشُونِي.»