[1] وَكِتْ نَاسْ أَفْرَايِمْ حَجَّوْا، الْخَوْف بِقِي شَدِيدْ فِي بَلَدْ إِسْرَائِيلْ. وَ لَاكِنْ هُمَّنْ بِقَوْا خَاطِيِّينْ أَشَانْ عَبَدَوْا إِلٰـهْ بَعَلْ وَ مَاتَوْا بِسَبَبَهْ.
[2] وَ يَا هَسَّعْ كُلَ، قَاعِدِينْ يِزِيدُوا // فِي ذُنُوبْهُمْ أَشَانْ صَنَعَوْا لَيْهُمْ صَنَمْ // بِفُضِّتْهُمْ. أَيْوَى حَسَبْ عِلِمْهُمْ، سَوَّوْا لَيْهُمْ أَصْنَامْ الدَّقَّاهُمْ صِنَاعِي مَعْرُوفْ. وَ النَّاسْ يُقُولُوا: «قَدُّمُوا لَيْهُمْ ضَحَايَا!» شِيفُوا! النَّاسْ دَوْل يِحِبُّوا أَصْنَامْ الْعَجَّالْ!
[3] وَ بِسَبَبْ دَا، هُمَّنْ يَبْقَوْا مِثِلْ سَحَابْ الْفَجُرْ الْيُفُوتْ وَ مِثِلْ كَرَنْج الصَّبَاحْ // الْمَا يِطَوِّلْ. يَبْقَوْا مِثِلْ أُتَّابْ الْمَدَقّ // التِّشِيلَهْ الرِّيحْ وَ مِثِلْ الدُّخَّانْ // الْيَمْرُقْ مِنْ الشُّبَّاكْ.
[4] «أَنَا اللّٰهْ إِلٰـهْكُو مِنْ مَرَقْتُكُو مِنْ بَلَدْ مَصِرْ. مَا وَاجِبْ تَعَرْفُوا إِلٰـهْ آخَرْ بَلَايِ أَنَا وَ مَا فِي مُنَجِّي إِلَّا أَنَا.
[5] أَنَا عِرِفْتُكُو فِي الصَّحَرَاءْ، فِي بَلَدْ الْيَبَاسْ.
[6] أَنَا سَرَّحْتُكُو فِي مَرْعَى عَدِيلْ وَ إِنْتُو رِوِيتُوا وَ شِبِعْتُوا. وَ مِنْ شِبِعْتُوا، الْإِسْتِكْبَارْ دَخَلْ // فِي قُلُوبْكُو وَ بَيْدَا، إِنْتُو نِسِيتُونِي.
[7] وَ خَلَاصْ، أَنَا نَبْقَى لَيْكُو مِثِلْ دُودْ وَ مِثِلْ نِمِرْ كَارِسْ فِي الدَّرِبْ.
[8] نَهْجِمْكُو مِثِلْ مَرْفَعِينْ الْوَدَّرْ عِيَالَهْ وَ نُشُقّ صُدُورْكُو. فِي الْبَكَانْ دَا، نَاكُلْكُو مِثِلْ مَرْة الدُّودْ وَ حَيْوَانَاتْ الْكَدَادَةْ الْخَطِيرِينْ يِشَرُّطُوكُو.
[9] «يَا بَنِي إِسْرَائِيلْ، أَدَّمَّرْتُوا أَشَانْ قَمَّيْتُوا ضِدِّي أَنَا النَّفْزَعْكُو.
[10] وَ هَسَّعْ دَا، وَيْن مَلِكُّو؟ خَلِّي يَفْزَعْكُو فِي كُلَّ حِلَّالْكُو! وَ وَيْن حُكَّامْكُو الْبِسَبَبْهُمْ قُلْتُوا: ‹أَنْطِينَا مَلِكْ وَ مَسَائِيلْ.›
[11] فِي زَعَلِي، أَنَا دَرَّجْت لَيْكُو مَلِكْ وَ فِي غَضَبِي، أَنَا نَزَّلْتَهْ.
[12] «خَطَا نَاسْ أَفْرَايِمْ مُسَجَّلْ وَ ذُنُوبْهُمْ مَكْتُوبِينْ.
[13] وَ وَجَعْ يَجِي لَيْهُمْ مِثِلْ وَجَعْ الطَّلَقَةْ. وَ هُمَّنْ مِثِلْ وِلَيْد الْمَا عِنْدَهْ حِكْمَةْ. فِي وَكِتْ الْوَالُودَةْ، مَا يَمْرُقْ مِنْ بَطُنْ أَمَّهْ!
[14] هَلْ نِنَجِّيهُمْ مِنْ الْقَبُرْ؟ هَلْ نَفْدَاهُمْ مِنْ الْمَوْت؟ يَا الْمَوْت، وَيْن وَبَاكْ؟ يَا الْقَبُرْ، وَيْن خَرَابَكْ؟ بَتَّانْ مَا نِشِيفْهُمْ بِعَيْن الرَّحْمَةْ.
[15] وَ كَنْ نَاسْ أَفْرَايِمْ زَادَوْا فِي أُسْط أَخْوَانْهُمْ، رِيحْ الصَّبَاحْ تَجِي وَ رِيحْ مِنْ اللّٰهْ تُقُمّ مِنْ الصَّحَرَاءْ. هِي تِيَبِّسْ وُدْيَانْهُمْ وَ تِجَفِّفْ عَيْن أَلْمِيهُمْ. الْمَخَازِنْ، يَنْهَبَوْهُمْ وَ خُمَامْهُمْ الْغَالِي، يِشِيلُوهْ.
[16] نَاسْ مَدِينَةْ السَّامِرَةْ خَاطِيِّينْ أَشَانْ عِصَوْا إِلٰـهُّمْ. يَكْتُلُوهُمْ فِي الْحَرِبْ وَ يَرْحَكَوْا عِيَالْهُمْ وَ يُشُقُّوا بُطُونْ عَوِينْهُمْ الْغَلْبَانَاتْ.»