[1] وَ فِي اللَّيْلَةْ دِي، النَّوْم أَبَى عُيُونْ الْمَلِكْ. وَ خَلَاصْ، أَمَرْ يِجِيبُوا كِتَابْ التَّارِيخْ هَنَا الْمَمْلَكَةْ. وَ هُمَّنْ جَابَوْه وَ قَرَوْه قِدَّامْ الْمَلِكْ.
[2] وَ لِقَوْا الْبَكَانْ الْمَرْدَكَايْ بَيَّنْ خِطَّةْ بِقْتَانْ وَ تَرَشْ حُرَّاسْ الْإِتْنَيْن الْيَحْفَضَوْا مَدَخَلْ قَصِرْ الْمَلِكْ. هُمَّنْ الْفَتَّشَوْا طَرِيقَةْ لِيَكْتُلُوا الْمَلِكْ أَشَوِرُوشْ.
[3] وَ الْمَلِكْ قَالْ: «شُنُو الشَّرَفْ وَ الْمُكَافَاةْ الْأَنْطَوْهُمْ لِمَرْدَكَايْ فِي شَانْ الشَّيّءْ دَا؟» وَ الصُّبْيَانْ الْيَخْدُمُوا لَيَّهْ قَالَوْا: «مَا شَرَّفَوْه بِشَيّءْ.»
[4] وَ الْمَلِكْ قَالْ: «يَاتُو الْقَاعِدْ فِي الْفَضَايْ؟» وَ فِي نَفْس الْوَكِتْ دَا، هَمَانْ جَاءْ فِي الْفَضَايْ الْبَرَّانِيَّةْ هَنَا الْقَصِرْ أَشَانْ يِحَجِّي لِلْمَلِكْ يِعَلُّقُوا مَرْدَكَايْ فِي رَاسْ الْعُودْ الْهُو جَهَّزَهْ لَيَّهْ.
[5] وَ الصُّبْيَانْ قَالَوْا لِلْمَلِكْ: «هَمَانْ بَسْ قَاعِدْ بَرَّا فِي الْفَضَايْ.» وَ الْمَلِكْ قَالْ: «خَلِّي يَدْخُلْ.»
[6] وَ هَمَانْ دَخَلْ وَ الْمَلِكْ قَالْ لَيَّهْ: «يِسَوُّوا شُنُو لِلنَّادُمْ الْمَلِكْ يِدَوْر يِشَرِّفَهْ؟» وَ هَمَانْ قَالْ فِي نَفْسَهْ: «لِيَاتُو بَتَّانْ الْمَلِكْ يِدَوْر يَنْطِيهْ شَرَفْ زِيَادَةْ مِنِّي أَنَا؟»
[7] وَ خَلَاصْ، هَمَانْ رَدَّ لِلْمَلِكْ وَ قَالْ: «كَنْ الْمَلِكْ يِدَوْر يِشَرِّفْ نَادُمْ،
[8] خَلِّي يَنْطُوهْ خَلَقْ اللِّبْسَهْ الْمَلِكْ وَ جُوَادْ الرِّكِبْ فَوْقَهْ الْمَلِكْ وَ يُخُطُّوا فِي رَاسْ الْجُوَادْ دَا تَاجْ الْمَمْلَكَةْ.
[9] وَ يَنْطُوا الْخَلَقْ وَ الْجُوَادْ لِوَاحِدْ مِنْ مَسَائِيلْ الْمَلِكْ وَ يِلَبُّسُوا النَّادُمْ الْمَلِكْ يِدَوْر يِشَرِّفَهْ. وَ يِرَكُّبُوهْ فِي الْجُوَادْ وَ يِوَدُّوهْ فِي النَّقَعَةْ هَنَا الْحِلَّةْ وَ يِعِيطُوا قِدَّامَهْ وَ يُقُولُوا: ‹دَاهُو الشَّيّءْ الْيِسَوُّوا لِلنَّادُمْ الْمَلِكْ يِدَوْر يِشَرِّفَهْ.›»
[10] وَ الْمَلِكْ قَالْ لِهَمَانْ: «عَجَلَةْ شِيلْ الْخَلَقْ وَ الْجُوَادْ مِثِلْ إِنْتَ قُلْتَهْ وَ سَوِّيهْ لِمَرْدَكَايْ الْيَهُودِي الْقَاعِدْ فِي خَشُمْ بَابْ قَصِرْ الْمَلِكْ. مَا تِخَلِّي شَيّءْ مِنْ كُلَّ الْكَلَامْ الْإِنْتَ قُلْتَهْ.»
[11] وَ خَلَاصْ، هَمَانْ شَالْ الْخَلَقْ وَ الْجُوَادْ وَ لَبَّسْ الْخَلَقْ لِمَرْدَكَايْ وَ رَكَّبَهْ فِي الْجُوَادْ وَ وَدَّاهْ فِي النَّقَعَةْ هَنَا الْحِلَّةْ وَ قَاعِدْ يِعِيطْ قِدَّامَهْ وَ يُقُولْ: «دَاهُو الشَّيّءْ الْيِسَوُّوا لِلنَّادُمْ الْمَلِكْ يِدَوْر يِشَرِّفَهْ.»
[12] وَ بَعَدْ دَا، مَرْدَكَايْ قَبَّلْ فِي خَشُمْ بَابْ قَصِرْ الْمَلِكْ. وَ هَمَانْ كَمَانْ قَبَّلْ عَجَلَةْ لِبَيْتَهْ حَزْنَانْ وَ مُغَطَّي رَاسَهْ مِنْ الْعَيْب.
[13] وَ هَمَانْ خَبَّرْ مَرْتَهْ زَرَشْ وَ كُلَّ رُفْقَانَهْ بِالشَّيّءْ الْحَصَلْ. وَ رُفْقَانَهْ الْحَكِيمِينْ وَ مَرْتَهْ قَالَوْا لَيَّهْ: «كَنْ قِدَّامْ مَرْدَكَايْ الْيَهُودِي دَا بَسْ إِنْتَ بَدَيْت تِعِيبْ، إِنْتَ مَا تَقْدَرْ تِسَوِّي شَيّءْ ضِدَّهْ. وَ لَاكِنْ دَايْماً تَبْقَى عَايِبْ قِدَّامَهْ.»
[14] وَ وَكِتْ لِسَّاعْهُمْ قَاعِدِينْ يِحَجُّوا مَعَايَهْ كَيْ بَسْ، خَدَّامِينْ الْمَلِكْ جَوْا وَ وَدَّوْا هَمَانْ عَجَلَةْ فِي الْعَازُومَةْ السَّوَّتْهَا أَسْتِيرْ.