[1] وَ وَكِتْ مَرْدَكَايْ سِمِعْ بِكُلَّ الشَّيّءْ الْكَانْ دَا، شَرَّطْ خُلْقَانَهْ وَ لِبِسْ خُلْقَانْ الْحِزِنْ وَ صَبَّ رُمَادْ فِي رَاسَهْ وَ مَشَى فِي لُبّ الْحِلَّةْ. وَ صَرَخْ صِرَاخْ شَدِيدْ هَنَا وَجِيعْ.
[2] وَ مَشَى لَحَدِّي خَشُمْ بَابْ قَصِرْ الْمَلِكْ وَ وَقَفْ هِنَاكْ أَشَانْ نَادُمْ مَا يَقْدَرْ يَدْخُلْ فِي قَصِرْ الْمَلِكْ كَنْ لَابِسْ خُلْقَانْ الْحِزِنْ.
[3] وَ فِي أَيِّ وُلَايَةْ الْوَصَّلْ فَوْقهَا قَرَارْ الْمَلِكْ وَ قَانُونَهْ، بِقِي حِزِنْ كَبِيرْ لِلْيَهُودْ وَ هُمَّنْ صَامَوْا وَ بَكَوْا وَ نَاحَوْا وَ كَتِيرِينْ مِنْهُمْ رَقَدَوْا فِي الشُّوَالَاتْ وَ فِي الرُّمَادْ.
[4] وَ الْبَنَاتْ الْخَدَّامَاتْ الْقَاعِدَاتْ مَعَ الْمَلِكَةْ أَسْتِيرْ وَ خَدَّامِينْهَا جَوْا وَ خَبَّرَوْهَا بِحِزِنْ مَرْدَكَايْ وَ هِي بَرْجَلَتْ مَرَّةْ وَاحِدْ. وَ هِي رَسَّلَتْ خُلْقَانْ لِمَرْدَكَايْ أَشَانْ يَلْبَسْهُمْ وَ يَمْرُقْ مِنَّهْ خُلْقَانْ الْحِزِنْ وَ لَاكِنْ هُو أَبَى.
[5] وَ خَلَاصْ، أَسْتِيرْ نَادَتْ هَتَاكْ وَاحِدْ مِنْ خَدَّامِينْ الْمَلِكْ الْجَابَوْه أَشَانْ يَخْدِمْ لَيْهَا. وَ هِي رَسَّلَتَهْ بَكَانْ مَرْدَكَايْ أَشَانْ يِأَكِّدْ مِنْ الشَّيّءْ الْكَانْ وَ بِقِي بِسَبَبْ شُنُو.
[6] وَ هَتَاكْ مَرَقْ وَ لَاقَاهْ لِمَرْدَكَايْ الْقَاعِدْ فِي نَقَعَةْ الْحِلَّةْ الْمُقَابِلَةْ خَشُمْ بَابْ قَصِرْ الْمَلِكْ.
[7] وَ مَرْدَكَايْ خَبَّرَهْ بِكُلَّ شَيّءْ الْحَصَلْ لَيَّهْ وَ أَكَّدْ لَيَّهْ الْوَزِنْ هَنَا الْفُضَّةْ الْهَمَانْ قَالْ يُصُبُّوهَا فِي مَخَزَنْ الْمَلِكْ وَ دَا لِدَمَارْ الْيَهُودْ.
[8] وَ أَنْطَاهْ نُسْخَةْ هَنَا قَانُونْ دَمَارْ الْيَهُودْ الْكَتَبَوْه وَ بَلَّغَوْه فِي مَدِينَةْ شُوشَةْ أَشَانْ يِوَصِّفَهْ لِأَسْتِيرْ وَ يِخَبِّرْهَا. وَ طَلَبْ مِنْهَا تَمْشِي تِقَابِلْ الْمَلِكْ وَ تَشْحَدَهْ أَشَانْ يِحِنّ فِي شَعَبْهَا.
[9] وَ هَتَاكْ جَاءْ خَبَّرَاهَا لِأَسْتِيرْ بِكُلَّ كَلَامْ مَرْدَكَايْ.
[10] وَ أَسْتِيرْ أَمَرَتْ هَتَاكْ أَشَانْ يَمْشِي لِمَرْدَكَايْ وَ يُقُولْ لَيَّهْ:
[11] «كُلَّ خَدَّامِينْ الْمَلِكْ وَ شَعَبْ وُلَايَاتْ الْمَمْلَكَةْ يَعَرْفُوا تَمَامْ كَدَرْ أَيِّ نَادُمْ كَنْ مَرَةْ وَلَّا رَاجِلْ كُلَ، كَنْ يَمْشِي فِي الْفَضَايْ الدَّخْلَانِيَّةْ هَنَا الْمَلِكْ بَلَا مُنَادَاةْ، فِي قَانُونْ وَاحِدْ بَسْ الْيَحْكُمُوهْ بَيَّهْ وَ هُو قَانُونْ الْمَوْت. وَ النَّادُمْ دَا يِعِيشْ إِلَّا كَنْ الْمَلِكْ مَدَّ لَيَّهْ عَصَاتَهْ الدَّهْبِيَّةْ هَنَا الْمُلُكْ. وَ هَسَّعْ، أَنَا عِنْدِي 30 يَوْم كَيْ الْمَلِكْ مَا نَادَانِي لِنَمْشِي لَيَّهْ.»
[12] وَ خَبَّرَوْه لِمَرْدَكَايْ بِكَلَامْ أَسْتِيرْ.
[13] وَ مَرْدَكَايْ رَسَّلْ رَدّ لِأَسْتِيرْ وَ قَالْ: «مَا بِسَبَبْ إِنْتِ قَاعِدَةْ فِي قَصِرْ الْمَلِكْ تُقُولِي إِنْتِ وِحَيْدكِ بَسْ تَنْجَيْ مِنْ كُلَّ الْيَهُودْ دَوْل.
[14] وَ كَنْ إِنْتِ تَسْكُتِي مَا تُقُولِي شَيّءْ فِي الْوَكِتْ الْمُنَاسِبْ دَا، الْأَمَانْ وَ النَّجَاةْ هَنَا الْيَهُودْ يَجُوا مِنْ بَكَانْ آخَرْ. وَ لَاكِنْ إِنْتِ وَ عَايِلَةْ أَبُوكِ كَمَانْ تِدَّمَّرَوْا. وَ يَاتُو يَعَرِفْ كَدَرْ فِي الْحَالَةْ الْمِثِلْ دِي بَسْ، إِنْتِ بِقِيتِ مَلِكَةْ؟»
[15] وَ أَسْتِيرْ رَسَّلَتْ لَيَّهْ الرَّدّ دَا وَ قَالَتْ:
[16] «أَمْشِي لِمّ كُلَّ الْيَهُودْ الْقَاعِدِينْ فِي مَدِينَةْ شُوشَةْ وَ صُومُوا فِي شَانِي. مَا تَاكُلُوا وَ لَا تَشَرْبَوْا وَ لَا بِالنَّهَارْ وَ لَا بِاللَّيْل لِمُدَّةْ تَلَاتَةْ يَوْم. وَ أَنَا كُلَ نُصُومْ وَ بَنَاتِي الْخَدَّامَاتْ كُلَ يُصُومَنْ كُلَ مِثِلْكُو. وَ بَعَدْ دَا، أَنَا نَمْشِي نِقَابِلْ الْمَلِكْ حَتَّى كَانْ دَا ضِدّ الْقَانُونْ كُلَ. وَ كَنْ وَاجِبْ لَيِّ الْمَوْت، نُمُوتْ.»
[17] وَ مَرْدَكَايْ مَشَى وَ سَوَّى كُلَّ شَيّءْ الْأَسْتِيرْ أَمَرَتَهْ بَيَّهْ.