[1] وَ سُكَّانْ حِلَّةْ قَرْيَةْ يَعَرِيمْ جَوْا شَالَوْا صَنْدُوقْ اللّٰهْ وَ خَطَّوْه فِي بَيْت أَبِنَدَابْ فِي رَاسْ الْحَجَرْ. وَ خَصَّصَوْا وِلَيْدَهْ أَلِعَازَرْ لِيَحْفَضَهْ.
[2] وَ الصَّنْدُوقْ دَا قَعَدْ أَيَّامْ كَتِيرِينْ فِي قَرْيَةْ يَعَرِيمْ، مُدَّةْ 20 سَنَةْ. وَ بَنِي إِسْرَائِيلْ دَوَّرَوْا يِقَبُّلُوا بَتَّانْ لِلّٰهْ.
[3] وَ صَمُوِيلْ كَلَّمَاهُمْ وَ قَالْ: «تَمَامْ! كَنْ بِكُلَّ قُلُوبْكُو تِدَوْرُوا تِقَبُّلُوا لِلّٰهْ، بَعُّدُوا مِنْ كُلَّ الْإِلٰـهَاتْ الْأَجْنَبِيِّينْ وَ الْإِلٰـهَةْ عَشْتَرُوتْ وَ ثَبُّتُوا قُلُوبْكُو فِي اللّٰهْ وَ أَعَبُدُوهْ هُو وِحَيْدَهْ بَسْ. بَيْدَا، هُو يِنَجِّيكُو مِنْ عُدْوَانْكُو الْفِلِسْطِيِّينْ.»
[4] وَ خَلَاصْ، بَنِي إِسْرَائِيلْ طَرَّفَوْا مِنْهُمْ أَصْنَامْ بَعَلْ وَ عَشْتَرُوتْ وَ عَبَدَوْا اللّٰهْ وِحَيْدَهْ.
[5] وَ صَمُوِيلْ قَالْ لِبَنِي إِسْرَائِيلْ: «لِمُّوا كُلُّكُو فِي حِلَّةْ مِصْفَةْ أَشَانْ نَسْأَلْ لَيْكُو اللّٰهْ.»
[6] خَلَاصْ، بَنِي إِسْرَائِيلْ لَمَّوْا فِي مِصْفَةْ وَ شَالَوْا أَلْمِي وَ صَبَّوْه قِدَّامْ اللّٰهْ. وَ دِي عَلَامَةْ التَّوْبَةْ. وَ فِي الْيَوْم دَا، هُمَّنْ صَامَوْا وَ قَالَوْا: «نَشْهَدَوْا فِي نُفُوسْنَا كَدَرْ أَنِحْنَ أَذْنَبْنَا قِدَّامْ اللّٰهْ.» وَ فِي الْوَكِتْ دَا فِي مِصْفَةْ، صَمُوِيلْ بِقِي حَاكِمْ فِي بَنِي إِسْرَائِيلْ.
[7] وَكِتْ الْفِلِسْطِيِّينْ سِمْعَوْا كَدَرْ بَنِي إِسْرَائِيلْ لَمَّوْا فِي مِصْفَةْ، كُلَّ عَسْكَرْ كُبَارَاتْ الْفِلِسْطِيِّينْ قَمَّوْا لِيِحَارُبُوهُمْ. وَ بَنِي إِسْرَائِيلْ سِمْعَوْا الْخَبَرْ دَا وَ خَافَوْا خَوْف شَدِيدْ مِنْ الْفِلِسْطِيِّينْ.
[8] وَ قَالَوْا لِصَمُوِيلْ: «أَسْأَلْ اللّٰهْ إِلٰـهْنَا دَايْماً أَشَانْ يِنَجِّينَا مِنْ الْفِلِسْطِيِّينْ.»
[9] وَ صَمُوِيلْ شَالْ حَمَلْ رَضِيعْ وَ قَدَّمَهْ كُلَّ كَيْ ضَحِيَّةْ مُحَرَّقَةْ لِلّٰهْ وَ سَأَلْ اللّٰهْ فِي شَانْ بَنِي إِسْرَائِيلْ. وَ خَلَاصْ، اللّٰهْ قِبِلْ سُؤَالَهْ.
[10] وَ وَكِتْ صَمُوِيلْ قَاعِدْ يِقَدِّمْ الضَّحِيَّةْ الْمُحَرَّقَةْ دَا، الْفِلِسْطِيِّينْ قَرَّبَوْا لِيَهْجُمُوا بَنِي إِسْرَائِيلْ. وَ لَاكِنْ فِي الْيَوْم دَا، اللّٰهْ ضَرَبَاهُمْ لِلْفِلِسْطِيِّينْ بِرَعَدْ شَدِيدْ. وَ هُمَّنْ بَرْجَلَوْا مَرَّةْ وَاحِدْ وَ أَنْهَزَمَوْا قِدَّامْ بَنِي إِسْرَائِيلْ.
[11] وَ رُجَالْ بَنِي إِسْرَائِيلْ قَمَّوْا مِنْ مِصْفَةْ وَ طَارَدَوْا الْفِلِسْطِيِّينْ وَ كَتَلَوْهُمْ لَحَدِّي بِغَادِي لِحِلَّةْ بَيْت كَارْ.
[12] وَ صَمُوِيلْ شَالْ حَجَرْ وَ غَزَّاهْ بَيْن مِصْفَةْ وَ الْحَجَرْ الْأُسْمَهْ سِنّ وَ سَمَّى الْحَجَرْ دَا حَجَرْ الْمُسَاعَدَةْ. وَ قَالْ: «لَحَدِّي هِنِي، اللّٰهْ سَاعَدْنَا.»
[13] وَ الْهَزِيمَةْ دِي بِقَتْ شَدِيدَةْ لِلْفِلِسْطِيِّينْ وَ بَتَّانْ كَيْ مَا قَبَّلَوْا فِي تُرَابْ بَنِي إِسْرَائِيلْ. أَشَانْ اللّٰهْ دَحَرَاهُمْ مِنْ تُرَابْ بَنِي إِسْرَائِيلْ فِي كُلَّ وَكِتْ صَمُوِيلْ.
[14] وَ بَنِي إِسْرَائِيلْ قَلَعَوْا كُلَّ التُّرَابْ وَ الْمُدُنْ الشَّالَوْهُمْ مِنْهُمْ الْفِلِسْطِيِّينْ مِنْ حُدُودْ مَدِينَةْ عَقْرُونْ لَحَدِّي حِلَّةْ قَاتْ. وَ كَانْ سَلَامْ أَمْبَيْن الْأَمُورِيِّينْ وَ بَنِي إِسْرَائِيلْ.
[15] وَ صَمُوِيلْ حَكَمْ فِي بَنِي إِسْرَائِيلْ مُدَّةْ حَيَاتَهْ.
[16] وَ هُو يَمْشِي كُلَّ سَنَةْ لِبَيْت إِيلْ وَ قِلْقَالْ وَ مِصْفَةْ وَ يِسَوِّي شَرِيعَةْ لِبَنِي إِسْرَائِيلْ فِي كُلَّ الْحِلَّالْ التَّلَاتَةْ دَوْل.
[17] وَ بَعَدْ دَا، يِقَبِّلْ فِي حِلَّةْ الرَّامَةْ وَ دَا الْبَكَانْ الْهُو سَاكِنْ فَوْقَهْ. وَ هِنَاكْ كُلَ هُو يِسَوِّي شَرِيعَةْ لِبَنِي إِسْرَائِيلْ. وَ بَنَى مَدْبَحْ لِعِبَادَةْ اللّٰهْ.