[1] وَ الْفِلِسْطِيِّينْ لَمَّوْا عَسْكَرْهُمْ فِي حِلَّةْ أَفِيقْ. وَ بَنِي إِسْرَائِيلْ كَمَانْ لَمَّوْا عَسْكَرْهُمْ جَنْب عَيْن الْأَلْمِي الْقَاعِدَةْ فِي حِلَّةْ يَزْرَعِيلْ.
[2] وَ كُبَارَاتْ الْفِلِسْطِيِّينْ جَرْسَسَوْا أَيِّ وَاحِدْ فِي رَاسْ مِيَةْ عَسْكَرْ أَوْ فِي أَلِفْ. وَ دَاوُدْ وَ نَاسَهْ جَرْسَسَوْا فِي الأَخِيرْ مَعَ الْمَلِكْ أَكِيشْ.
[3] وَ كُبَارَاتْ الْفِلِسْطِيِّينْ قَالَوْا: «الْعِبْرَانِيِّينْ دَوْل جَوْا يِسَوُّوا شُنُو؟» وَ أَكِيشْ قَالْ لَيْهُمْ: «دَا دَاوُدْ مَسْؤُولْ هَنَا شَاوُولْ مَلِكْ إِسْرَائِيلْ. هُو قَاعِدْ مَعَايِ مُدَّةْ سَنَةْ أَوْ سَنْتَيْن. وَ أَنَا مَا لِقِيتْ فَوْقَهْ شَيّءْ فَسِلْ مِنْ عَرَّدْ مِنْ سَيِّدَهْ لَحَدِّي الْيَوْم.»
[4] وَ كُبَارَاتْ الْفِلِسْطِيِّينْ زِعِلَوْا ضِدّ أَكِيشْ وَ قَالَوْا: «أَطْرُدْ الرَّاجِلْ دَا! خَلِّي يِقَبِّلْ فِي الْبَكَانْ الْإِنْتَ سَكَّنْتَهْ فَوْقَهْ! مَا يَمْشِي مَعَانَا فِي الْحَرِبْ أَشَانْ بَعَدَيْن مَا يِقَبِّلْ ضِدِّنَا. وَ كَنْ يِدَوْر يِدَلِّي قَلِبْ سَيِّدَهْ، مَا يِوَدِّي لَيَّهْ رُوسَيْنَا وَلَّا؟
[5] دَا مَا دَاوُدْ الْبِغَنُّوا بَيَّهْ وَ بُقُولُوا: ‹شَاوُولْ كَتَلْ آلَافْ وَ دَاوُدْ كَتَلْ عَشَرَاتْ الْآلَافْ؟›»
[6] وَ خَلَاصْ، الْمَلِكْ أَكِيشْ نَادَاهْ لِدَاوُدْ وَ قَالْ لَيَّهْ: «نَحْلِفْ بِاللّٰهْ الْحَيّ، إِنْتَ عَدِيلْ! دَا بِقِي لَيِّ سَمَحْ وَكِتْ تَمْشِي وَ تَجِي مَعَايِ فِي الْمُعَسْكَرْ. وَ أَنَا مَا لِقِيتْ فَوْقَكْ شَيّءْ فَسِلْ مِنْ جِيتْ لَيِّ لَحَدِّي الْيَوْم. وَ لَاكِنْ كُبَارَاتْ الْفِلِسْطِيِّينْ الْآخَرِينْ مَا يِدَوْرُوكْ.
[7] هَسَّعْ دَا، قَبِّلْ وَ أَمْشِي بِالسَّلَامَةْ أَشَانْ مَا تِسَوِّي شَيّءْ الْيِزَعِّلْ كُبَارَاتْ الْفِلِسْطِيِّينْ.»
[8] وَ دَاوُدْ قَالْ لِأَكِيشْ: «لَاكِنْ أَنَا سَوَّيْت شُنُو؟ وَ شُنُو الشَّيّءْ الْإِنْتَ سِمِعْتَهْ مِنِّي أَنَا عَبْدَكْ مِنْ أَنَا جِيتَكْ لَحَدِّي الْيَوْم أَشَانْ تَدْحَرْنِي مَا نَمْشِي نِحَارِبْ عُدْوَانْ سَيِّدِي الْمَلِكْ؟»
[9] وَ أَكِيشْ رَدَّ لِدَاوُدْ وَ قَالْ: «أَنَا نَعَرِفْ كَدَرْ إِنْتَ عَدِيلْ مَعَايِ مِثِلْ مَلَكْ الرَّبّ. وَ لَاكِنْ كُبَارَاتْ الْفِلِسْطِيِّينْ بَسْ قَالَوْا لَيِّ، إِنْتَ مَا تَمْشِي مَعَانَا فِي الْحَرِبْ.
[10] هَسَّعْ دَا، قُمّ بِفَجُرْ بَدْرِي، إِنْتَ وَ الرُّجَالْ الْجَوْا مَعَاكْ. قَبُّلُوا فِي الْبَكَانْ الْأَنَا أَنْطَيْتَكْ. مَا تِفَكِّرْ فِي الْكَلَامْ دَا أَشَانْ أَنَا رَضْيَانْ بَيْك. وَ كَنْ الْوَطَاةْ أَصْبَحَتْ، خَلَاصْ أَمْشُوا!»
[11] وَ أَمْبَاكِرْ فَجُرْ بَدْرِي، دَاوُدْ وَ نَاسَهْ قَبَّلَوْا فِي بَلَدْ الْفِلِسْطِيِّينْ. وَ الْفِلِسْطِيِّينْ كَمَانْ فَاتَوْا عَلَيْ يَزْرَعِيلْ.