[1] وَ نِدَوْر نِحَجِّي لِلشُّيُوخْ الْمَعَاكُو. أَنَا كُلَ شَيْخ مِثِلْهُمْ وَ أَنَا شَاهِدْ لِتَعَبْ الْمَسِيحْ وَ بَتَّانْ مُشَارِكْ فِي قُدْرَةْ الْمَسِيحْ الْمَجِيدَةْ التِّبِينْ قَرِيبْ. أَسْمَعَوْا كَلَامِي.
[2] رَيُّسُوا الْمُؤْمِنِينْ الْمَعَاكُو. هُمَّنْ مِثِلْ غَنَمْ هَنَا اللّٰهْ وَ هُو كَلَّفَاكُو بَيْهُمْ مِثِلْ رُعْيَانْ. وَ شِيلُوا الْمَسُؤُولِيَّةْ فَوْقهُمْ مَا مِثِلْ جَبَرَوْكُو لَاكِنْ بِنِيِّتْكُو قِدَّامْ اللّٰهْ وَ مَا أَشَانْ تِدَوْرُوا مِنْهُمْ رِبَحْ الْمَا وَاجِبْ لَاكِنْ شِيلُوا الْمَسُؤُولِيَّةْ دِي بِفَرَحْ.
[3] مَا تِسَوُّوا نُفُوسْكُو سِيَادْهُمْ لِلنَّاسْ الْاللّٰهْ كَلَّفَاكُو بَيْهُمْ مِثِلْ غَنَمْ لَاكِنْ أَبْقَوْا لَيْهُمْ مَثَلْ لَحَدِّي يِتَابُعُوا دَرِبْكُو.
[4] وَ وَكِتْ الْمَسِيحْ كَبِيرْ الرُّعْيَانْ يِبِينْ هُو يَنْطِيكُو التَّاجْ الْمَجِيدْ الْجَمَالَهْ أَبَداً مَا يِكَمِّلْ.
[5] وَ لَيْكُو إِنْتُو كُلَ الشَّبَابْ، أَسْمَعَوْا عَدِيلْ كَلَامْ الشُّيُوخْ. وَ نُقُولْ لَيْكُو كُلُّكُو، مَسْكُنُوا نُفُوسْكُو قِدَّامْ أَخْوَانْكُو وَ أَخْدُمُوا لَيْهُمْ. أَشَانْ اللّٰهْ يَابَى النَّاسْ يِسْتَكْبَرَوْا وَ يَنْطِي نِعْمَةْ لِلنَّاسْ الْيِمَسْكُنُوا نُفُوسْهُمْ.
[6] مَسْكُنُوا نُفُوسْكُو قِدَّامْ قُدْرَةْ اللّٰهْ وَ فِي الْوَكِتْ الْمُوَافِقْ، هُو بَسْ يَرْفَعْكُو.
[7] كُلَّ شَيْء التِّهِمُّوا بَيَّهْ، خَلُّوهْ لِلّٰهْ أَشَانْ إِنْتُو مُهِمِّينْ لَيَّهْ.
[8] خُطُّوا بَالْكُو وَ أَقْعُدُوا وَاعِيِينْ أَشَانْ عَدُوكُو إِبْلِيسْ قَاعِدْ يِحَاوِقْ فَوْقكُو مِثِلْ دُودْ الْقَاعِدْ يِكِرّ وَ يِدَوْر فُرْصَةْ يَاكُلْ نَادُمْ.
[9] أَقْعُدُوا ثَابْتِينْ فِي إِيمَانْكُو وَ أَقِيفُوا ضِدّ إِبْلِيسْ. أَعَرْفُوا كَدَرْ أَخْوَانْكُو فِي أَيِّ بَكَانْ قَاعِدِينْ يَحْمَلَوْا نَفْس التَّعَبْ مِثِلْكُو.
[10] وَ اللّٰهْ النَّادَاكُو أَشَانْ تِتَابُعُوا الْمَسِيحْ وَ تَدْخُلُوا فِي مَجْدَهْ الْأَبَدِي، رَحْمَتَهْ هُو تَكْفِيكُو فِي كُلَّ حَالْ. وَ بَعَدْ إِنْتُو تِعِبْتُوا وَكِتْ شِيَّةْ، اللّٰهْ ذَاتَهْ يِكَمِّلْ خِدِمْتَهْ فِيكُو وَ يِثَبِّتْكُو وَ يِقَوِّيكُو وَ يِثَبِّتْ حَالْكُو.
[11] وَ الْمُلُكْ وَاجِبْ لَيَّهْ هُو بَسْ إِلَى الْأَبَدْ. آمِينْ.
[12] وَ أَنَا كَتَبْت لَيْكُو الْجَوَابْ الْقِصَيِّرْ دَا مَعَ أَخُونَا سِيلَا وَ نَشْهَدْ لَيَّهْ هُو أَخُو صَادِقْ. وَ كَتَبْتَهْ لَيْكُو أَشَانْ نِشَجِّعْكُو وَ نَشْهَدْ لَيْكُو كَدَرْ عِنْدُكُو نِعْمَةْ اللّٰهْ الصَّحِيحَةْ. وَ أَقْعُدُوا فَوْقهَا ثَابْتِينْ.
[13] وَ الْمُؤْمِنِينْ هِنِي فِي بَابِلْ الْاللّٰهْ إِخْتَارَاهُمْ مِثِلْ هُو إِخْتَارَاكُو يِسَلُّمُوكُو. وَ وِلَيْدِي مَرْقُسْ يِسَلِّمْكُو كُلَ.
[14] أَسَّالَمَوْا أَمْبَيْنَاتْكُو بِسَلَامْ الْمَحَبَّةْ. السَّلَامْ عَلَيْكُو كُلُّكُو إِنْتُو الْعِنْدُكُو عَلَاقَةْ مَعَ الْمَسِيحْ.