[1] پشت سەر ئەوە ئمجا عیسا لەێ نوو کەفتە شار و دیەکەیلا ئڕا جاڕ کیشان خەوەر خوەش پاشاێەتی خوداوەن. هەر دوانزە شاگردەگەیشێ وە گەردێا بۊن.
[2] ئەێزەن چەن گلە ژنیش ک لە ناخوەشی و جن خوو لە دەسێ شەفا گرتۊن ئەولێا هاتۊن، ک یەکێگ لە لێان مەریەم مەجدەلییە بۊ ک هەفت مڵەێکەت لە کووڵێەو کریاۊدن
[3] و یوەناێ ژن خۆزای ک زابت هرۆدۆس بۊدن و هەروها سووزانا و ژنەیل ترەکیش ک لە ماڵ و مکنەت خوەێان پشتیوانی عیسا و شاگردەگانێ کردن.
[4] وەختێگ جماعەت گەوراێگ گردەو بۊن و مەردمان لە گشت شارێگەو هاتن وە لاێ، ئمجا عیسا مەسڵەتێگ ئڕاێان هاورد:
[5] "جفتێارێگ چێ وە شۊەم وەشانن. وەختێگ لە پسا شۊەمەگەی وەشان، قەێرێگ لە دەنک شۊەمەگان کەفتن لە بان ڕێ کنار زەۊەگە و پاوڵا بۊن و مەلەوەرەیل خواردنەێان.
[6] قەێرێگ لە لێان کەفتن لە بان تیەت سانێگ و وەختێگ هێز گرتن، چۊن ڕیشێەگانێان بن نێاشتن و لە وشکان بۊن، سیس هڵاتن.
[7] قەێرێگ لە لێان کەفتن لە ناو دڕگینێگ، دڕگەگان ئەولێانا هێز گرتن و نق لە لێان بڕین.
[8] قەێرێگیش لە لێان کەفتن لە بان زەۊ نەخت و لەورە سەونز کردن و یەکا سەت نیشتن لە سەمەر." وەختێگ مەسڵەتەگەێ تمام بۊ، ئمجا دەنگ بەرزەو کرد و وەت: "تا هەرکە گووش ئەژنەوا دێرێد ئەژنەوێد!"
[9] ئمجا شاگردەگانێ لە لێ پرسین، مەنزوورد لە ئێ مەسڵەتە چوە بۊ؟
[10] عیسایش وەت: "وە ئێوە ئجازەێ ئەوڕەسین لە ئەسرار پاشاێەتی خوداوەن دریاس، ئمان ئڕا باقی مەردمان م وە مەسڵەتەو قسیە کەم تا؛ "بنووڕن ئمان نەۊنن و ئەژنەون، ئمان نەڕسنەو."
[11] "ئمان مەنزوور لە شۊەم لە ناو ئێ مەسڵەتە کەلیمەێ خوداس.
[12] ئەوانە لە بان ڕێەگە، کەسانێگن ک کەلیمەێ خودا ئەژنەون ئمان دۊاجار شەێتان تیەێدن و ئەو کەلیمەیلە لە دڵێان درارێدن تا نەخواێ ئێمان بارن و نجات پێا بکەن.
[13] ئەوانەیشە ک کەفن لە بان تیەت کوچگین، کەسانێگن ک وەختێگ ک کڵام خودا ئەژنەون وە خوەشی قەبوولێ کەن، ئمان ئێ جماعەتە ڕیشێ نەێرن، ئڕا ماوەێگ باوەڕ تیەرن و دۊاجار وەخت ئمتەحان دەنە دۊاوا.
[14] ئڕا ئەو شۊەمەیلە ک کەفن لە ناو دڕگەگان؛ یانە کەسانێگن ک ئەژنەون، ئمان دۊاجار لە ژێر وەرواسە و فکر ماڵ دنیا و لەزەت ژیان خنکیەن و وە سەمەر نیەڕەسن.
[15] جا ئەوانە ک کەفن لە بان زەۊ نەخت؛ یانە کەسانێگێن ک کەلیمەێ خودا ئەژنەون و بێدرەنگ وە دڵێگ پاکەو هەڵگرنەێ و سەمەرگەیشێ وە سەور و تامڵەو هێوەت کەن."
[16] "هیچکەس چراخێگ ڕووشن نیەکەێدن تا لە ژێر پووتێگ بشارێدنەوەێ، یا بنەیدنەێ لە ژێر تەختێگ، ئمان نەێدنەێ ئەو بان چراخدانێگ، تا ئەوانە ک ئەو ناو تیەن، بتوانن شەوقەگەێ بۊنن.
[17] ئڕا یە ک هیچ چشت ئەوشاریاوێگ نیە ک ئەو دەیشت نەکەفێدن و هیچ سەر و سڕێگیش نیە ک ئاشکراوا نەودن.
[18] سە ئاگادار بوون ک چۊن گووش دەین، چۊن وە ئەوانە ک دێرن فریەتر دریەێدن، وە ئەوانەیش ک نەێرن، تاهەێ هەر ئەو چشتیشە ک فکر کەن دێرن لە لێان ئەوسێنیەێدن."
[19] ئمجا داڵگ و برایل عیسا هاتن ئڕا لاێ، ئمان وە خاتر شلخی جماعەت نەتوانسن عیسا بۊنن.
[20] خەوەر دریا وە عیسا، "ک داڵگد و برایلد لە دەیشت وسانە. خوازن بۊننەد."
[21] ئمان عیسا لە جواو وەت: "داڵگ من و برایل م ئەوانەن ک کڵام خودا ئەژنەون و وە پێ عەمەڵ کەن."
[22] ڕووژێگ عیسا وە گەرد شاگردەگانێا سوار قایق بۊن و وە پێان وەت: "بچیمن ئڕا ئەو دەس دەریاگە." ئمجا کەفتن وە ڕێا.
[23] وەختێگ قایقەگە ئەول شنەێ واێا لە پسا وروە نوا چێ، عیسا خەوێ بردەو. واهێڵان سەختێگ جمیا، چۊنەو ک قایقەگە نزیک بۊ لە ئاو پڕ بوودن. کەفتن لە خەتەر.
[24] ئەوانیش وە هاوار هاوار عیسا لە خەو هەڵسانن: "گەورەم، گەورەم، لە پسا لە بەێن چیمن!" عیسایش لە خەو هەڵسا و خوڕیا لە واهێڵان و شڵپ دەریاگە. دنیا کپیا و ئارامەو بۊ.
[25] ئمجا وە پێان وەت: "ئێماندان ها لە کوو؟" ئەوانیش ک سەرسام مەنۊن و ڕخێان چێ، وە یەکترەکی وەتن: "یە دی کیە! تا ئەو تنانەتە ک فەرمان دەێدن وە واهێڵان و ئاو، ئەوانیش لە دەمێ ڕام بەن؟"
[26] ئمجا ڕەسین وە مڵک گەراسین ک لە ئەو دەس جەلیل بۊ.
[27] وەختێگ عیسا لە قایقەگە پا هاوردەو، پیاوێگ لە ئەو شارە ک مڵەێکەت داشت، هات وە تۊشێەو. ڕووزێار دریژێگ بۊ ک هۊچ دڵنگێگ لە وەر نەکردۊدن و ماڵ نێاشت و لە ناو قەورسانێگ ژیا.
[28] وەختێگ چەوێ کەفت لە عیسا، کەفت لە خاک پاێ و وە هاوار بەرزێگەو وەت: "خوازید چوە ئەول منا بکەیدن، عیسا، کوڕ خوداێ بان سەر؟ لاڵکیەم لە لید، عەزاوم مەکە."
[29] چۊن عیسا فەرمان کردۊدن لەو ڕووح خەبیسە تا لە گیان پیاوەگە بچوودن ئەو دەیشت. ئاخر لە ئەوە ئەو وەر، فرە جار مڵەێکەتەگە گرتۊدنەێ، ئمان وە سەر یەوە، ک پیاوەگە لە قڵانگ و زەنجیر نریاۊدن، هەر دەفە زەنجیر و تناف بڕۊدن و ئەو مڵەێکەتە وەرێ ناۊدن لە کەش و کۊە.
[30] ئێکە عیسا لە لێ پرسی: "ناود کیە؟" ئەۊیش جواو دا: "لژیون"، چۊن مڵەێکەتەیل فرەێگ لە گیانێ بۊن.
[31] مڵەێکەتەگانیش لاڵکیان لە عیسا تا فەرمان پێان نەکەێدن تا بچنەو وە چاڵ بێ بن.
[32] لەێ ئانە لە ڕۊە پاڵێگ، گەل گەوراێگ وراز لە پسا لەوەڕیان. مڵەێکەتەگان لاڵکیان لە عیسا تا بیلێدنەێان تا بچن لە جەڵد ورازەگان. ئمجا عیسا هیشتەێان.
[33] جا مڵەێکەتەگان هاتن ئەو دەیشت و چێن لە گیان ورازەگان. ئەوانیش لە بەرزڵانیەگەێا هڕ کردن و ڕۊ نان لە دەریاگە و گشتێ لە تێ مردارەو بۊن.
[34] هەناێ ورازەیلەوانەگان ئەو هەڵکەفتە دین، نان وە دەوا و ئەو خەوەرە لە شار و لە دەر پەخشەو کردن.
[35] مەردمان هاتنەو دەیشت تا بۊنن چوە بۊە. وەختێگ ڕەسین وە ئەو شوونە ک عیسا لەورە بۊ، دیتن ک مڵەێکەتەگان لە گیانێەو بۊنە و پیاوەگەیش دڵنگ کردێەس لە وەر و لە وەر دەم عیسا عاقڵ نیشتێە. ڕخێان چێ.
[36] ئەوانە ک لە ئەورە بۊن و ئەو هەڵکەفتەیلە دۊن، ئڕا باقی مەردمان وەتن، ک ئەو پیاو مڵەێکەتدارە چ جوور شەفا گرتێە.
[37] ئمجا گشتێ مەردمان ناوچەێ گەراسین لە عیسا تواسن تا لە ئەورە بچوودن وە ڕێەو، چۊن ترس گەوراێگ هەڵگرتۊدنەێان. جا عیسا سوار قایقەگە بۊ و هەڵگەردیاوا.
[38] ئەو پیاوە ک مڵەێکەتەگان لە کووڵێە کریاۊن، لاڵکیا لە عیسا تا ئەوان ئەول خوەێانا بوەنەێ. ئمان عیسا ڕەوانەێ کرد و وە پێ وەت:
[39] "بچوورەو وە ماڵ خوەد و ئڕاێ گشتێ بۊش ک خودا چوە ئڕاد کردێە." سە ئەۊیش کەفت وە ڕێا و ئڕا گشت مەردم ئەو شارە وەت ک عیسا ئڕەێ ئەۊ چوە کردێە.
[40] لەو ئانە ک عیسا هاتەو، جماعەتەگە هاتن وە پیریێەو، چۊن ئەوان گشت چەوەنووڕ عیسا بۊن.
[41] کەمێگ پشت سەر ئەوە، پیاوێگ وە ئسم یایرۆس، ک ڕەیس کەنێشت بۊ، هات و کەفت لە خاک پاێ عیسا و لاڵکیا لە لێ تا بچوودن ئڕا ماڵێان.
[42] چۊن تەنیا دۊەت دوانزە ساڵانێگ داشت ک لە نەز گیان کەنین بۊ. وەختێگ عیسا کەفت وە ڕێا، مەردمان خورووشیان ئەو یەک لە شوونێ.
[43] لەێ ئانە، ژنێگ لە ئەورە بۊ، ک یە دوانز ساڵ بۊ ک خۊنڕیزی داشتۊدن و [وە سەر یەوە ک هەرچێگ ک داشتۊدن، خەرج دەوای و دەرمان کردۊدن] ئمان شەفا نەگرتۊدن.
[44] ئەو ژنە لە پشتا هات و دەسێگ ڕەسان وە داوان کەرواسەگەێ عیسا و دەرجا خۊنەگەێ وساوا.
[45] ئمجا عیسا پرسی: "کی بۊ ک دەس کیشا لە قەێ م؟" گشتێ هاشا کردن. پترۆس وەت: "گەورەم، ئێ مەردمانە زوور یەکترەکی دەن لە دەور و پشتد؟"
[46] عیسا وەت: "کەسێگ دەس سای لە م، چۊن م حس کردم ک تواناێگ لە لەشم ئەو دەیشت چێ."
[47] وەختێگ ژنەگە زانس ک نیەتوانێدن ئەوشاریاو بمینیەێدن، لەرزیا و کەفت لە خاک پاێ عیسا. ئەۊ لە وەر دەم گشتێ ئەو مەردمە وەت ئڕا چوە دەس سایە لە قەێ عیسا و ئەێزەن یە ک چ جوور فەوری شەفا گرتێە.
[48] عیسا وە پێ وەت: "دۊەتم، ئێماند شەفاد داێە، بچوو وە سڵامەت."
[49] وەختێگ عیسا هێمان لە پسا قسیە کرد، یەکێگ لە ماڵ یایرۆس، ڕەیس کەنێشتەگەوە هات و وە پێ وەت: "دۊەتەد مردێە، دی زامەت وە مامووسا مەێە."
[50] وەختێگ عیسا ئێ قسیە ئەژنەفت، وەت: "ڕخد نەچوودن. بیلا ئێمان داشتۊدن تا دۊەتەد نجات پێا بکەێدن."
[51] هەناێ عیسا ڕەسی وە ماڵ کابرا، ئجازە وە هیچکەس نێا تا ئەولێا ئەو ناو بچوودن بێجگە لە پترۆس، یووهەنا، یاقووب و باوگ و داڵگ دۊەتە.
[52] ئەوان گشتێ لە پسا گیرسن و هەێ مەڕوو کردن ئڕا دۊەتە. ئمان عیسا وە پێان وەت: "مەگیرن، چۊن ئەۊ نەمردێە، خەفتێە."
[53] ئمان ئەوان چۊن زانسن ک دۊەتە مردێە، وە عیسا خەنسن.
[54] جا عیسا دەسێ گرت و وە پێ وەت: "ڕووڵە، هەڵس!"
[55] ڕووح هاتەو وە گیانێ و فلفەور هەڵسا. ئمجا عیسا وە پێان وەت: چشتێگ بێەن وە پێ تا بخوەێدن.
[56] داڵگ و باوگێ تاجب مەنن، ئمان عیسا وە پێان سپارش کرد تا باس ئەو هەڵکەفتە ئڕا کەس نەکەن.