[1] ئمجا عیسا نووڕس وەێ ناوە و دی ک دەوڵەمەنەیل سەدەقەگانێان خەن لە سندووق پەرەستگا.
[2] لەێ ئانە بیوەژن هەژارێگیش دی ک دو سکەێ مسین بۊچگ خس لە سندووقەگە.
[3] ئمجا عیسا وەت: "وە ڕاس وە پیدان بۊشم، ئێ بیوەژن هەژارە لە گشتێ ئەو دەوڵەمەنەیلە فریەتر سەدەقە داس،
[4] ئڕا یە ک دەوڵەمەنەگان بەشێگ لە زێاتی ماڵ و دارایێان بەخشان، ئمان یەۊ وە سەر فەقیریەو هەرچێگ ئڕەێ گوزەران داشت بەخشا."
[5] وەختێگ یەێ بڕ لە شاگردەگانێ لە باوەت پەرەستگا لە پسا قسیە کردن، ک چ کوچگەیل ڕیک و پیک و خڵاتەیل قەشەنگێگ لە تێ نریانە لە کار، عیسا وەت:
[6] "ڕووژێارێگ تێد، ک لە ئێ چشتەیلە ک ئێوە ئلان دۊنین، کوچگێگ وە بان کوچگ ترەکەو نیەمینێد، گشتێ ڕمیەن."
[7] ئەوانیش لە لێ پرسین، "مامووسا، ئێ هەڵکەفتە کەێ تەتیەێدن و چ نیشانەیلێگ لە وەخت نزیکەو بۊن ئێ هەڵکەفتە کەفنەو دەیشت؟"
[8] جا عیسایش وەت: "وریا بوون تا سەر لە لیدان نەشێوێد، چۊن فرە کەس وە ناو منەو تیەن و ئۊشن: 'م ئەۊم' و 'وادەێ هاتێەسەو نزیک'، ئەو شوونێان مەکەفن.
[9] هەناێ خەوەر جەنگەیل و شووڕشەیل ئەژنەفتین، هەوزاماتدان نەچوودن، چۊن ئێ چشتەیلە باێە بان و بچن، ئمان ئاخر کار فەوری لە پشت سەر یانە نیە."
[10] ئێکە وە پێان وەت: "نەتەوە وە گژ نەتەوەێا چوودن و پاتشا وە گژ پاتشاێا،
[11] زەۊەلەرەیل گەوراێگ تیەن و قتی قڕان و مەریزیەیل داێر وڵاتەیل فرەێگ گرن لە وەر. هەڵکەفتەیلێگ تەتیەن دڵەڕاوکیدار و نیشانەیل گەوراێگ لە ئاسمانا دیار دەن.
[12] "ئمان وەرجلە یە ک گشت ئێ چشتەیلە ئتفاق بکەفن، گرنەدان و ئازاردان کەن. وە خاتر ناو م دەنەدان ئەو دەس کەنێشتەیل و خەنەدان لە زندان و کیشنەدان وە دیوان پاتشایل و حاکمەیل.
[13] یە دەرفەتێگ دەێدن وە پیدان تا ئڕەێ م شاتی بێەین.
[14] سە وە هۊر یە مەون ک ئڕەێ دەفا کردن لە خوەدان لە وەرەو چشتێگ حازر بکەین،
[15] چۊن م خوەم حکمەت و تواناێ قسیە کردنێگ دەم وە پیدان ک هیچکام لە دژمنەیلدان نیەتوانن وەرەقەتدان بگرن یا بەرپەرچ قسیەگاندان بێەنەو.
[16] ئمان ئێوە تاهەێ وە دەس داڵگ و باوگ و برایل و قەوم و ڕەفیقەیلدان دریەین وە گیر و ئەوانیش چەن گلەێگ لە لیدان کوشن.
[17] گشتێ مەردمان بەدێان لە لیدان تیەێدن، تەنیا وە خاتر ناو م.
[18] ئمان مۊێگ لە سەردان کەمەو نیەود.
[19] وە پا وە گەز دان لە بان م نجات پێا کەین."
[20] "هەناێ دین ک لەشکەرەیل چەکمەێ دەورادەور ئورشەلیم دانە، جا بزانن ک خراو و خاپۊر بۊنێ نزیکەو بۊە.
[21] لەو وەختە ئەوانە ک هان لە یەهوودیە باێە ورەو کۊەگان بدەرچن، ئەوانە ک هان لە خود شارەگە باێە ڕەو بکەن و ئەوانەیشە ک هان لە دەیشت شار نەباێە بچنەو وە ئەورە.
[22] چۊن یانە ڕووژەیل قەرەوی ئەودانن، ک لە تێان هەر چشتێگ ک لە کتاو پیرۆز نۊسریاس وە دی تیەێدن.
[23] لە ئەو ڕووژە، گەن وە حاڵ ژنەیل دگیان یا شیر مناڵ دەر، چۊن بڵخە و تەنگاژوو گەوراێگ دنیا داوڕێدن و خەزەو کەفێد لە ژیان ئێ مەردمانە،
[24] وە دەم شمشێر قلار کریەن، لە ناو نەتەوەیل تر وە ئەسیری بریەن و ئورشەلیم لە لاێەن خاوارەیلەو پاوڵا کریەێدن، تا ئەو ڕووژە ک وادەێ خاوارەگان ئەو سەر باێدن.
[25] "نیشانەیلێگ لە مانگ و خوەر و هسارەیل کەفنەو دەیشت. لە بان زەۊیش بڵخە و تەنگاژووێگ کەفێدن لە ناو نەتەوەیل ک لە گرمەێ مەوج و شەپوول دەریا سەر لە لێان شێویاس.
[26] مەردمان لە دڵەڕاوکی و هەروها وەرواسەێ یە ک چوە وە سەر دنیا تیەێد لە خوەێان چن، ئڕا یە ک توانایل ئاسمانەیل نیشن لە چمارە.
[27] ئمجا دۊنن ک 'کوڕ ئاێەم وە ناو ئەورێگەو تیەێدن' وە توانا و شەوکەت گەوراێگەو.
[28] هەناێ ئێ چشتەیلە دەس کەن وە ئتفاق کەفتن، بووسیەن وە پاوا و سەردان هێز بێەن، چۊن نجاتدان لە پسا نزیکەو بوودن."
[29] ئمجا عیسا مەسڵەتێگ ئڕاێان هاورد: "بنووڕن وە دار ئەنجیر و گشت جوور دارەیل تر.
[30] هەناێ دۊنین قورووژە کردنە، زانین دی تاوسان لە پسا نزیکەو بوودن.
[31] سە هەناێ دین ک ئێ چشتەیلە لە پسا ئتفاق کەفن، بزانن ک پاشاێەتی خوداوەن نزیکە.
[32] وە ڕاس وە پیدان بۊشم؛ ئێ نەسڵە لە بەێن نیەچن تا وەختێگ گشت ئێ چشتەیلە نەتەتیەن.
[33] دنیا و ئاسمان لە بەێن چن، ئمان قسیەگان م لە بەێن نیەچن."
[34] "وریا بوون تا دڵدان لە شراو خواردن و تاڵانکاری یا وەرواسەێ خەفەت ژیان ئێ دنیا کوورەو نەودن، ک ئەو ڕووژە لە ناکاوا بگرێدەدان،
[35] وێنەێ دامێگ. ئڕا یە ک ئەو ڕووژە تیەێدنەو دیار گشت مەردمانێگ ک لە سەرانسەر دنیا ژیەن.
[36] وشیار بوون و داێەم دوا بکەن ئڕەێ یە ک هاز دەرچێن لە تمام ئەو چشتەیلە ک ئتفاق کەفن داشتۊن، تا بتوانین لە وەر دەم کوڕ ئاێەم بووسین."
[37] عیسایش هەر ڕووژ مەخشووڵ ئامووژگاری کردن لە پەرەستگا بۊ و شەوانە چێ وە کۊەێ زەێتوون و شەوار لە ئەورە بردەو سەر.
[38] مەردمانیش گشتێ، شەوەکیان زۊ هاتن وە پەرەستگا تا لە لێ گووش بتەکنن.