[1] ئێکە ئمجا ئەو جەرخە گشتێ وە یەکەو هەڵسان و عیسا بردن وە لاێ پیلاتۆس
[2] و دەس کردن وە توومەتبار کردن عیسا و وەتن: "ئیمە دیمنە ک ئێ ئاێەمە چەواشەکاری نەتەوەگەمان کەێدن و قەێەخە کەێدن لە یە ک باج و خەراج سزار بدریەێدن، ئەێزەن ئۊشێدن ک یەۊ خوەێ مەسیحە، پاتشاس."
[3] ئمجا پیلاتۆس لە لێ پرسی: "ت پاتشاێ یەهوودیەیلید؟" عیسا وەت: "ت خوەد لەوا ئۊشید."
[4] ئێکە پیلاتۆس وە کاهنەیل گەورا و ئەو جماعەتە وەت: "م دەلیلێگ ئڕا تاوانبار کردن ئێ ئاێەمە نیەۊنم."
[5] ئمان ئەوان کوتران کردن و وەتن: "وە ئامووژگاریەیلێەو لە سەرانسەر یەهوودیە ئاژاوە خسێە لە ناو مەردم، لە جەلیلیەێا دەس وە پێ کردێە و ئلان ڕەسیە وەێ جێە."
[6] وەختێگ پیلاتۆس یە ئەژنەفت، پرسی ک ئایا ئێ پیاوە لە خەڵک جەلیلیەس.
[7] هەناێ ڕەسیەو ک عیسا لە مەنتەقەێ ژێر فەرمان هرۆدۆس ئانتیپاسە، کلێ کرد ئڕا لاێ هرۆدۆس ک خوەێ هەر لە ئەو بەێنە لە ئورشەلیم بۊ.
[8] وەختێگ هرۆدۆس عیسا دی، فریە خوەشحاڵەو بۊ، چۊن ئەۊ ڕووزێار دریژێگ بۊ ک تواسۊدن عیسا بۊنێدن، ئاخر لە باوەتێ ئەژنەفتۊدن و وە تەما بۊ تا چەن مەوجزە لە لێ بۊنێدن.
[9] هرۆدۆس پرسێارەیل فریەێگ لە لێ کرد، ئمان عیسا هیچ جواوێگ وە پێ نێا.
[10] ئمجا کاهنەیل گەورا و ئاخونەیل شەریعەت پا نانەو وەر و گەن جوور توومەتبارێ کردن.
[11] جا هرۆدۆس و سەربازەگانیشێ وە سووکاێەتیەو تۊلەکی وە پێ کردن، ئێکە ئاباێ ئجڵافیێگ کردن لە وەرێ و کلێ کردنەو وە لاێ پیلاتۆس.
[12] هەر لە ئەو ڕووژە، هرۆدۆس و پیلاتۆس وە یەکەو دووسەو بۊن، چۊن وەرجلە ئەوە دژمن یەکترەکی بۊن.
[13] جا پیلاتۆس کاهنەیل گەورا و کەێخودایل و مەمەردمەگە چری ئەو یەک و
[14] وە پێان وەت: "ئێوە ئێ پیاوە هاوردینە وە لاێ م، وە عنوان کەسێگ ک گاڵ مەردم دەێدن تا ئاژاوەگەری بکەن. م لەێرە لە وەر دەم خوەدان باجوای لێ کردم و هیچ گوناێگ لە پووسێ نەیمەو، لە ئەو چشتەیلە ک ئێوە بخت کردینە وە پێا.
[15] هرۆدۆسیش گوناێگ نەۊدنەو، وە ئێ خاترە کلێەو کردۊدن وە لاێ ئیمە. وە ڕاس یەۊ هیچ تاوانێگ نەکردێە ک قابڵ وە حکم مەرگ بوودن.
[16] سە م دەم شەلاخێ بێەن و وڵێ بکەن."
[17] [چۊن لە هەر عەێدێگ باێە یەێ گلە زندانی ئڕاێان ئازاد بکرداد.]
[18] ئێکە ئەوان گشتێ وە یەکەو کردنەێ وە قاڵ و هاوار و وەتن: "گومێ کە یە، باراباس ئڕامان وڵ بکە!"
[19] باراباس پیاوێگ بۊ ک وە خاتر شووڕش کردن لە ناو شار و قەتڵ خریاۊدن لە زندان.
[20] پیلاتۆس ک تواس عیسا ئازاد بکەێدن، لەێ نوو وە گەرد مەردمەگەێا وەت،
[21] ئمان ئەوان هەر هاوار کردن: "بکیشنەێ لە سەلیب، بکیشنەێ لە سەلیب!"
[22] ئڕا دەفەێ سیهم لە لێان پرسی: "ئڕا چوە؟ چ گوناێگ کردێە؟ م لە گیانێ هیچ گوناێگ نیەۊنمەو تا حکم وە مەرگێ بکەم، سە دەم شەلاخێ بێەن و وڵێ بکەن."
[23] ئمان ئەوان وە دەنگ بەرز لە بان قسەێ خوەێان پا دان وە گەز، ک لە سەلیب باێە بدریەێد. جا دەنگێان دەس بان دەس گرت.
[24] ئمجا پیلاتۆس حکم کرد، داخواز ئەوان وە حکم بزانن.
[25] ئەو پیاوە ک ئەوان تواسن ئازاد کرد، ئەو کەسە ک ئڕا شووڕش و قەتڵ لە زندان خریاۊدن و عیسا دا ئەو دەس ئەو چشتە ک ئەوان خوازین.
[26] وەختێگ لە پسا بردنەێ، پیاوێگ وە ناو شەمعوون قەیرنەی ک لە ئاوایەو هاتۊدن وە شار، گرتن و سەلیبەگە نانەو کووڵێ و خسنەێ ئەو پشت سەر عیسا.
[27] جماعەت گەوراێگ کەفتنەو شوونێ. لە ناو ئەو مەردمانە ژنەیلێگ بۊن ک تەپڵەسینێ کردن و ئڕاێ شین و واوەیلی کردن.
[28] ئمان عیسا وەر کردەو پێان و وەت: "دۊەتەیل ئورشەلیم، ئڕەێ م مەگیرن، ئمان ئڕا خوەدان و مناڵەگاندان بگیرن.
[29] ئڕا یە ک بێگومان ڕووژەیلێگ تیەن ک ئۊشن: 'خوەزێمانەو ژنەیل نەزووک و زگەیلێگ ک هیچ وەخت نەزاین و مەمگەیلێگ ک هیچ وەخت شیر نێان.'
[30] لەو وەختە ک ئۊشن وە کۊەگان: 'بڕمیەن وە ملمانا' و وە پاڵەگان: 'بکەنەمان وە ژێرەو.'
[31] چۊن وەختێگ ئەوان وە چوو سەونز لەوا کەن، سە چوە ئەول چوو وشکا تیەێدن؟"
[32] دو نەفەر ترەکیش ک جناێەتکار بۊن خریاۊنەو ڕێ تا وە گەرد عیساێا بکوشیەن.
[33] وەختێگ ڕەسین وە ئەو شوونە ک وە پێ وەتیا کەلاک، لە ئەورە وە گەرد جناێەتکارەگانا کیشانەێ لە سەلیب، یەکێگ ئەو دەس ڕاسێ، یەکێگ ئەو دەس چەپێ.
[34] ئمجا عیسا وەت: "باوگە بوەخشەێان، چۊن یانە نیەزانن لە پسا چوە کەن." دۊاجار ئەوانیش تیر پشک خسن تا دڵنگەگانێ بەش بکەن.
[35] مەردمانیش وساۊن و نووڕسن و کەێخوداگانیش وە تۊلەکیەو وەتن: "نجات ئەو دۊاێ مەردم دا، با نجات خوەێ بەێدن ئەگەر یە مەسیح خوداس، هەڵوژیاڵەێ!"
[36] سەربازەگانیش تۊلەکی وە پێ کردن، هاتنەو وەر و شراو ترش دان وە پێ
[37] و وەتن: "ئەگەر ت پاتشاێ یەهوودیدن، خوەد نجات بێە!"
[38] لە بان سەریشێ نۊسیاۊدن؛ یە پاتشاێ یەهوودە.
[39] یەکێگ لە جناێەتکارەگان ک لە ئەورە لە سەلیب کیشیاۊدن، وە پیتەخەنەوە وە پێ وەت: "مەگەر ت مەسیح نیید؟ خوو نجات خوەد بێە و هن ئیمەیش!"
[40] ئمان ئەوەکە تنیا وە پێا وەت: "لە خودا نیەترسی؟ تنیش هەر هایدە ژێر چنەو حکمێگ وێنەێ ئەۊ!
[41] حکمەگان ئیمە خوو حەقن، چۊن ئیمە مکافات کارێگ ک کردیمنە کیشیمن، ئمان ئێ ئاێەمە هیچ گوناێگ نەکردێە."
[42] ئمجا وەت: "عیسا، با م لە هۊرد بووم وەختێگ نیشیدنەو تەخت پاشاێەتید."
[43] ئەۊیش جواو دا: "وە ڕاس وە پید بۊشم، ت ئمڕوو وە گەرد منا هایدن لە ناو بهەیشت."
[44] دەم نیمەروو بۊ، تیەریکی تمام وڵات گرت لە وەر تا وە سات سێ نیمرەودۊا،
[45] چۊن خوەر لە نۊرانن وساوا. پەردەێ پەرەستگایش تلیشیا و بۊ وە دو لەتەو
[46] و عیسایش وە هاوار بەرزێگ وەت: "باوگە، ڕووح خوەم دەمەو دەس ت." ئمجا یە وەت و ئاخر هناسەگەێ کیشا.
[47] هەناێ ئەفسەرەگە دی ک چ ئتفاقێگ کەفت، زکر خودا کرد و وەت: "بێگومان، ئێ ئاێەمە بێ گونا بۊ."
[48] وەختێگ ئەو مەردمانیشە ک لە ئەورە گردەو بۊن، دین ک چ ئتفاقێگ کەفت، چێنەو ورەو ماڵ و تەپڵەسینێ کردن.
[49] ئمان گشت شناسەگانێ و ئەو ژنەیلە ک لە جەلیلیەوە ئەولێا هاتۊن، لە دۊرەو وسان و نووڕسن وە ئێ چشتەیلە.
[50] جا بزان چوە بۊ، خاسەپیاو موومنێگ وە ناو یووسف ک خوەێ هەرسەێ یەکێگ لە ئەندامەیل شەوراێ یەهوود بۊدن،
[51] ئمان هاوشەور و هاوقەوڵ ئەو کاێە و کردارێانە نەۊدن، خەڵک شار یەهوودی نشینێگ وە ناو ئاریماتیا بۊ و وە تاشقەو چەوەنووڕ هاتن پاشاێەتی خوداوەن.
[52] ئێ باوەمەردە چێ وە لاێ پیلاتۆس و داواێ تەرمەگەێ عیسا کرد.
[53] ئمجا هاوردەێ ئەو خوار و پێچانەێ لە پارچەێ کەتانێگ و نادەێ لە قەورێگ ک لە ناو کەورێگ هەڵکەنیاۊد و هیچ کەس ترەک تا ئلان لە تێ نەنریاۊدن.
[54] یە ڕووژ ئامادەسازی بۊ و ڕووژ شەبەت لە پسا دەس وە پێ کرد.
[55] ئەو ژنەیلیشە ک لە جەلیلیەوە وە گەردێا هاتۊن، لە شوونێ چێن و قەورەگە دین و هەروها یەیشە ک تەرمەگەێ چۊ نریاۊدن لە تێ.
[56] ئێکە هاتنەو و سدر و کافوور ئامادە کردن. لە ڕووژ شەبەتیش وە قاێەێ قانوون ئسراحەت کردن.