[1] Khadaaba eti soochiiro a anihi ewweenenye urur Kiriisto woyo. Eti an isoochiiro a ati, Gaayohi aaleeyenye an weyti rum ka 'doono.
[2] Aaleeyki an weyti 'doono, an Waakhe kisoowaha, saggaas maanta at orey on ikasohatti rubeytaah wahanyeyyohi Waakh ka ihaaggantahuu, feyya ichoow wihi at jirotaah tuumman ka yeesso haagsataan.
[3] I'di tahe 'doo'doo Kiriisto rummeeste a yimiyye, saggi at rumanka wihi Waakh 'doono iyeesso, toro la orey isohatti runti Waakh iraahto nah isoocheeke, waha la weyti ikahamaadicheen.
[4] Wihi weyti ikahamaadicho, a nyaakhuteeyki jiroticho ka saggi icho runti Waakh iraahaan an daago.
[5] Aaleeyki an weyti 'doono, 'doo'di Kiriisto rummeeste sossohti yeed Kiriisto cheeko at gargaarto ka, at a eti lakakhuufo, cha'at icho igaran laka.
[6] 'Doo'da saggi at 'doo'di Kiriisto rummeeste i'doonto urur Kiriisto a icheeke. A haaggantahe chirri at chi'icho intoo addan ikahaan, saggi Waakh ikahamaaduu icho gargaarto.
[7] I'di tahe 'doo'da iroono Yeesso Kiriisto ibaha, 'doo'di Waakh igaran la gargaar us ka'helo mele.
[8] Maantaka inno rubeyteen 'doo'da wihi us 'doono siinno gi'de. I'daakka la runti Waakhe icho cheekaan a isleegargaarra.
[9] Urur Kiriisto khadaab 'hor a isoochiire i'daasenyi Diyoodirefhi weynaan marmo waansiheey a 'dii'de.
[10] Maantaka maanti an amiit, wihi us yeelo 'dowe isoobahcha. Usu ani ihanta, wori beenaat ka ani icheeka. Waha kalday on menye, wihi weyti suujenye us yeelo a mehe ya, 'doo'di Kiriisto rummeeste wori Waakh cheeko laka ma martiisti. Toro la 'doo'di 'doo'daas wohoo iyeelin 'doono a tirta, urur Kiriisto laka goya kariha.
[11] Aaleeyki an weyti 'doono, 'doo'di suujoon yeelo goya atabine, i'daasenyi 'doo'di haag yeelo on dabatiis raah. Eti tuummane haag yeelo Waakhe kayimiy. Eti tuummane suujoon yeelo la Waákh ma argin.
[12] Enenyet tuumman haag Demmediroos a cheeka. Us runti Waakhe raaha, waha la saggi us eti haaggan iyahe iche tusaan. Nah laka saggi us eti haaggan iyahe a atin isoocheekna. Atin la saggi wihi nah cheekno tuumman rum iyahiin a garattaan.
[13] Wihi noole an kisoochiirin 'doono a khaba, i'daasenyi kalaamo ichoow ringi kasoochiirin ma 'doono.
[14] Anihi dowwanoha ka kisoo'daaro khajjeela afaah 'hela.
[15] Waakh ba nebey kaahida. Aalassaahki inta kajiro tuumman a kisoobariiticheen. Aalasseenki intaas kajiro kooba bariiti.