[1] Sayno kaykaptinqa Jesucristupa wilakuyninta wilakushqäpita prësu kashpä qamkunata ruwä Tayta Dios munashqanno imaypis kawayänaykipaqmi. Sayno kawayänaykipaqmi Tayta Dios qayayäshushkanki.
[2] Mana yachaq tukuypa kawayay, pïmaypaqpis ali shonqu kayay y kuyanakur pacienciakuyay.
[3] Espíritu Santu yanapäyäshushqaykinöla yärakuq mayikikunawan juk shonqula jawka kawayay.
[4] Jesucristuman yärakuq kaqqa lapansimi juk cuerpula kaykansi. Juklaylami Espíritu Santupis. Juk salvacionlata chaskinansipaqmi Tayta Dios qayamashkansi.
[5] Juklaylami Señorninsipis. Juklaylamanmi yärakuykansi. Juklaylami bautismu.
[6] Juklaylami Tayta Diospis. Paymi lapansipa Taytansi, lapansitami makincho sararaykämansi, lapansitami yanapaykämansi y lapansiwanmi kaykan.
[7] Juk cuerpula kashqapis cada ünunsitami Jesucristo kuyakuq kar churamashkansi payta sirvinansipaq.
[8] Saymi Tayta Diospa palabranchöpis nikan: “Contrankunata vincirkurmi junishpa wisarqan. Saypitanami runakunata yanapämurqan”.
[9] Wisashqanta niptinmi tantiyansi Jesucristo puntata kay pasaman urämushqanta.
[10] Kay pasaman urarkamurmi jana pasaman kutikush. Lapanpaq munayyuq karmi lapantapis makincho sararaykan.
[11] Paymi wakinta churash apóstol kayänanpaq, wakinta profëta kayänanpaq, wakinta ali wilakuyninta wilakuyänanpaq y wakintana pastor kar yachasikuq kayänanpaq.
[12] Paykunata Jesucristo churash yärakuq mayinkunata shakyäsir yachasiyänanpaqmi. Sayno yachasiyaptinmi kamarikush kaykäyanqa Tayta Dios munashqanta rurar Jesucristupa cuerpun iglesiata lapanchöpis yanapäyänanpaq.
[13] Sayno kaptinqa lapansi juk shonqula kar y Tayta Diospa Surinman yärakur Jesucristo kawashqanno noqansipis kawashun.
[14] Sayno kawar manami pishi wamranönasu kashun pipis manakaqkunata yachasir lutankunata criyisimänansipaq. Saynöpis manami punshata wayra wakman kayman apashqannönasu kashun.
[15] Saypa trukanqa jukninsi jukninsipis kuyanakur rasun kaqlata imaypis parlashun. Saynöpami Jesucristo kawashqanno noqansipis kawashun. Jesucristo umansi kaptin
[16] y noqansi cuerpun kaptinsimi jukninsi jukninsi yanapänakunansipaq churamansi. Saymi moqunsikuna sararänakushqanno yanapänakur kuyanakunansipaq tantiyakushun.
[17] Sayno kaptinmi Señor Jesucristupa apostolnin kar qamkunata yäsï Tayta Diosta mana chaskikuq runakunano mana kawayänaykipaq. Paykunaqa toqshun sakish karmi
[18] manakaqkunata yarpachakular kawayan. Juiciuynaq karmi y shonqunkuna chukruyash kaptinmi Tayta Dios munashqannösu kawayan.
[19] Paykuna shonqunkuna munashlanta rurarmi penqakuyninkunapis kansu. Jukwan jukwan kakurmi tukuyläya melanaypaq jusakunata jusalikuyan.
[20] Qamkunaqa manami sayno kawayänaykipaqsu Jesucristupa wilakuyninta yachakuyashkanki.
[21] Jesucristupa ali wilakuyninta rasunpaypa chaskikush kaykarqa y pay munashqanno kawayänaykipaq yachakuykarqa
[22] nawpata kawayashqaykino amana kawayaynasu, sinöqa makwa mödanata jitariqno unay kawayashqaykita kachariyay. Nawpataqa alita rurayashqaykita yarparpis lutan ruraykunaman umaykikuna churakashqami kayarqayki.
[23] Kananqa Espíritu Santu tantiyasiyäshushqaykinöla kawayay.
[24] Tayta Dios kashqanno qamkunapis kayänaykipaqmi mushuq kamash runana kaykäyanki. Sayno kaykarqa Tayta Dios munashqanno mana jusalikuypa kawayänaykipaq mushuq kawaytana kawayay.
[25] Ama lulapänakuyaysu. Lapaykipis juk ayllunöla kaykarqa rasun kaqlata parlayay.
[26] Rabyakurpis ama jusalikuyaysu. Qoyayninpaqa ama rabyashla kakuyaysu.
[27] Rabyashla karqa shonquykikunatami diabluta kichapaykäyanki.
[28] Nawpata suwakush karqa amana suwakuyaynasu. Suwakuyänaykipa trukanqa arukuyay. Saynöpami imalaykipis kanqa muchuqkunata yanapäyänaykipaq.
[29] Ama imatapis lutankunata parlayaysu. Saypa trukanqa runa mayikita shakyäsiyänaykipaq ali kaqkunalata parlayay.
[30] Lutankunata rurar Espíritu Santuta ama lakikasiyaysu. Paymi shonquykikunata sëllayäshushkanki Jesucristo kutimunan junaq salvash kayänaykipaq.
[31] Pitapis ama nanaparäyaysu, rabyapäyaysu ni qayapäyaysu. Ama pipa washantapis rimayaysu ni manakaqkunata parlayaysu.
[32] Sayno kawayänaykipa trukanqa jukniki juknikipis kuyapänakur kawayay. Jesucristo wanushqanpita Tayta Dios perdonayäshushqaykinöla perdonanakuyay.