[1] Kuyay wawqi panikuna, kaywanqa ishkay kutinami cartakaykämü. Ishkan cartachöpis ali kawayänaykipaqmi yäsiykä.
[2] Saynöpis yäsiykä santu profëtakuna wilakuyashqanta y salvamaqninsi Señor Jesucristupa mandamientunta mana qonqäyänaykipaqmi. Say mandamientutaqa apostolninkunami yachasiyäshurqayki.
[3] Ultimu tiempukunacho Diosta mana cäsukuq runakuna yurimunanpaq kashqanta tantiyakuyay. Say runakunaqa asipäyäshushpaykimi
[4] niyanqa: “¿Imanirtaq Jesucristo ‘kutimushaqmi’ nirkur kutimunraqsu? Paywan puriqkunapis shuyakuykäyashlanchömi wanukuyash. Kay pasapis qalaykushqanpita pasa kashqannölami kaykan”.
[5] Sayno nir manami tantiyayansu kay pasatapis jana pasatapis Tayta Dios “saykuna kayäsun” nilar kamashqanta. Kamaptinmi yaku rurinpita saki pasa yarqamurqan.
[6] Saypitanami kay pasata diluviuwan ushakäsirqan.
[7] Saynölami juiciu finalcho Tayta Dios niptilan kay pasa, inti, killa y lapan qoyllarkunapis ninawan ushakäyanqa. Say junaqmi jusalikur kawaq runakunapis ushakäyanqa.
[8] Kuyay wawqi panikuna, shumaq tantiyakushun: Tayta Diospaqqa juk junaq waranqa (1,000) watanömi kaykan y waranqa watapis juk junaqnölami kaykan.
[9] Sayno kaykaptinqa wakin runakuna yarpäyashqanno ama yarpäshunsu Señor Jesucristo mana kutimunanpaq kashqanta. Payqa manami munansu pipis jusalancho wanunanta. Saymi shuyaraykan runakuna jusalikuyta wanakuyänanta.
[10] [Sakaypa] elaqpita suwa shamushqannömi Señor Jesucristupis elaqpita shamunqa. Pay shamuptinmi intipis, killapis y lapan qoyllarkunapis mansariypaq bunrurur ninawan rupaykar ushakäyanqa. Saynölami kay pasapis y kay pasacho kaqkunapis rupaykälar chipyaq ushakanqa.
[11] Imaykapis ushakänanpaq kaykaptinqa mana jusalikuypa Tayta Dios munashqanno santu kawayay.
[12] Sayno shuyakuyaptikimi Tayta Dios juzganan junaq ras chämunqa. Say junaqmi intita, killata y qoyllarkunatapis nina rupaykar ushanqa. Saynölami lapan imaykapis suluykälar ushakanqa.
[13] Noqansimi isanqa Tayta Dios promitishqannöla mushuq ciëluta y mushuq pasata shuyakuykansi. Saychöqa Tayta Dios munashqannömi lapanpis ali kanqa.
[14] Kuyay wawqi panikuna, saykunata shuyakuykarqa jusalikuykunata kacharir pïmaywanpis ali kawayay. Saynöpami Jesucristo kutimur jusaynaqta tariyäshunki.
[15] Yarpäyay Señor Jesucristo imanir manaraq kutimushqanta. Pay shuyaraykan runakuna salvakuyänantami. Saytaqa kuyay wawqinsi Pablupis Tayta Dios tantiyasiptin qelqashqami.
[16] Lapan cartankunachömi sayta qelqarqan. Say cartankunacho aja tantiyaypaq kaptinmi yachaq tukuqkuna y Tayta Diosman janan shonqula yärakuqkuna lutanta yachasiyan. Saynölami lutanta yachasiyan Tayta Diospa palabrancho wakin kaq yachasikuykunatapis. Say runakunaqa infiernuchömi nakayanqa.
[17] Kuyay wawqi panikuna, kay nishqäkunata musyaykarnaqa cuidä chaskipäyankiman lutan yachasikuqkunapa yachasikuyninta. Tayta Diosman ali yärakuykäyashqaykicho qepamantaq kutikuyankiman.
[18] Saypa trukanqa waran waran tantiyakuyay kuyapäkuq y salvakuq Señor Jesucristo munashqanno kawayänaykipaq. ¡Pay kananpis y imayyaqpis alabash kaykuläsun! Amén.