[1] Yärakuq mayïkuna: Noqa Simón Pedro, Jesucristupa sirviqnin y apostolnin karmi, qamkunapaq kay cartata cartakaykämü. Qamkunatapis Jesucristo kuyapäyäshushpaykimi noqakunatano salvayäshushkanki. Payqa Diosninsimi y salvamaqninsimi.
[2] Tayta Diosta y Señorninsi Jesucristuta reqiyaptikimi kuyapäyäshunaykipaq y waran waran ali kawayta qoykuyäläshunaykipaq qamkunapaq manakü.
[3] Payta reqiptinsimi munashqanno kawanansipaq Tayta Dios munayninwan tukuynöpa yanapaykämansi. Kuyapäkuq y alilata ruraq karmi sayno kawanansipaq qayamashkansi.
[4] Saynölami imaypis yanapämänansipaq promitimashkansi. Sayno yanapämäshun jusaynaq kashqanno noqansipis jusalikuyta kacharir jusaynaqna kanansipaqmi.
[5] Sayno kaykaptinqa Tayta Diosman imaypis yärakuyay. Payman yärakur alilata rurayay. Alilata rurar palabranta yachakuyay.
[6] Palabranta yachakur mana ali yarpayta vinciyay. Mana ali yarpayta vincir wanuyashqaykiyaq cäsukuyay. Cäsukur Tayta Dios munashqanno imaypis kawayay.
[7] Tayta Dios munashqanno kawar say ayllunöla ali rikanakuyay. Ali rikanakur pïmaywanpis kuyanakur kawayay.
[8] Waran waran sayno kawayaptikiqa Señorninsi Jesucristuta reqiyashqayki manami manakaqlapaqsu kanqa.
[9] Sayno mana kawarqa qapra runa rikayta mana puëdishqannömi kaykäyanki. Tayta Dios perdonayäshushqaykitapis qonqaykuyashkankimi.
[10] Wawqi panikuna, Tayta Dios qayayäshushqaykita y akrayäshushqaykita shumaq tantiyayänaykipaq imaykanöpapis pay munashqanno kawayay. Saynöpami jusalikuyman imaypis ishkiyankisu.
[11] Saymi mandaykashqanman chäyaptiki salvamaqninsi Señor Jesucristo kushish chaskiyäshunki.
[12] Saymi mayna musyaykäyaptikipis y Diospa wilakuyninta shumaq yachakush kayaptikipis saykunata imaypis yarpaykäsiyäshayki.
[13] Kawashqäyaqqa saykunata imaypis yarpäsiyäshaykimi.
[14] Wanukunäpaqna kaykashqäta Señor Jesucristo musyasimash kaptinmi
[15] qamkunata yarpaykäsï wanukuptïpis yäsishqäkunata imaypis yarparäyänaykipaq.
[16] Señor Jesucristo munayyuq kashqanta y kutimunanpaq kashqanta manami yarpayläpitasu yachaykäsï, saypa trukanqa chipipiykaqta kikï rikash karmi sayno yachaykäsï.
[17] Chipipiykaqman tikraptinmi Tayta Dios gloriapita nimurqan: “Paymi kuyay Surï. Paypitami kushish kaykä”.
[18] Sayno nimushqanta kikïmi wiyashkä sagrädu jirka puntacho Jesucristuwan kaykar.
[19] Saymi masraq tantiyansi profëtakuna wilakuyashqan rasunpaypa kashqanta. Sayno kaykaptinqa profëtakuna qelqayashqankunata shumaq cäsukuyay. Saykunaqa sakaycho aksi asikyapämashqansinömi kaykan. Sayno cäsukuyay pasa waraptin waraq qoyllar shonquykikunacho asikyashqanyaq.
[20] Shumaq tantiyakuyay. Ama yarpäyaysu Tayta Diospa palabranta runakuna jamuylanpita qelqayashqanta.
[21] Tayta Diospa profëtankuna manami imaypis kikinkunapa yarpaylanpitasu qelqayarqan, sinöqa Espíritu Santu tantiyasiptinmi Tayta Diospa yarpayninta qelqayarqan.