[1] Kawasikuq Palabrapitami qamkunaman qelqamü. Paymi imapis manaraq kaptin mayna kaykarqan. Paytami rikayashkä, yatayashkä y wiyayashkä.
[2] Say Kawasikuqta Tayta Dios kachamuptinmi payta rikayarqä. Saymi qamkunata wilayä mana ushakaq kawayta qaramaqninsi kashqanta. Paymi Tayta Dioswan kaykashqanpita noqansiman shamush.
[3] Rikayashqäta y wiyayashqätami qamkunata musyaykäsiyä. Saynöpami Tayta Diospa y Surin Jesucristupa nawpancho kawayashqäno qamkunapis paypa nawpancho kawayankipaq.
[4] Saykunata qelqaykämü kushish kawanansipaqmi.
[5] Jesucristo yachasiyämashlantami wilayä: Tayta Diosqa aksimi. Paycho manami ima sakaypis kansu.
[6] Saymi mayqansipis “Tayta Dios munashqannömi kawaykä” nikar sakäpakushno purirqa lulakuykansi. Sayno kawarqa manami rasunpaypasu Tayta Dios munashqanno kawaykansi.
[7] Tayta Dios asikyaycho kashqanno noqansipis asikyaycho kawarmi jukninsi jukninsi kuyanakuykansi. Saynöpis Surin Jesucristumi yawarninwan lapan jusansita maylamansi.
[8] Mayqansipis jusaynaq tukurqa manami rasun kaqtasu parlaykansi, sinöqa lulakuykansimi.
[9] Jusalikushqansipita perdonta manakushqami isanqa promitimashqansita cumplir Tayta Dios perdonamäshun. Payqa alilata ruraq karmi lapan jusansita maylamäshun.
[10] Jusaynaq tukurqa pay nishqankunata manakaqmanmi churaykansi. Sayno karqa manaraqmi wilakuyninta chaskikushkansiraqsu.