[1] Mayor wawqikuna, noqapis qamkunano mayor wawqimi kaykä. Saynöpis Jesucristo nakashqankunata kikïmi rikashkä. Jesucristo kutimur lapansitami shuntamäshun. Saymi qamkunata kayno yäsï:
[2] Tayta Diosman yärakuqkunata rikayänaykipaq churash kaykarqa uysha misiqkuna uyshankunata rikayashqanno shumaq rikayay. Mana niraykälar rikayänaykipa trukanqa lapan voluntänikiwan rikayay. Ama qellay raykula rikayankisu, sinöqa Tayta Dios munashqanno ashak ashakla rikayanki.
[3] Yaqa patronnöqa wawqi panikunata mana aliqa ama rikayankisu. Saypa trukanqa rikakur yachakuyänanpaq ali kawayanki.
[4] Sayno kawarmi pastorkunapa pastornin Jesucristo kutimuptin imayyaqpis mana ushakaq corönata chaskiyankipaq.
[5] Mözukuna y jipashkuna, mayor wawqikunata cäsukuyay. Lapaykipis mana yachaq tukuylapa respitanakuyay. Yachaq tukuqkunataqa Tayta Dios manami yanapansu. Humildi kaqkunatami isanqa kuyapar yanapan.
[6] Sayno kaykaptinqa munayyuq Tayta Diosta cäsukur mana yachaq tukuypa kawayay. Paymi tiempun chämuptin respitash kayänaykipaq churayäshunki.
[7] Tayta Dios yanapaykäyäshuptikiqa lapan lakikuynikikunatapis paypa makinman kachaykuyay.
[8] Shumaq tantiyakuyashpayki alcäbula kawayay. Chikimaqninsi diablu imayka malaqash leonnömi pitapis jusalikasinanpaq qaparar puriykan.
[9] Yärakuq mayinsikuna maysaychöpis qamkunano nakaykäyashqanta musyaykarqa Tayta Diosman yärakur diabluta ichipäyay.
[10] Noqansi rayku Jesucristo wanush kaptinmi kuyapäkuq Tayta Dios qayamashkansi gloriacho imayyaqpis kawanansipaq. Saymi kay pasacho nakashqapis Tayta Dios yanapämäshun mana jusalikunansipaq, pay munashqanno kawanansipaq y payman shumaq yärakunansipaqpis.
[11] ¡Tayta Dios lapanpaq munayyuq kashqanpita imaypis alabash kaykuläsun! Amén.
[12] Wawqinsi Silvanumi kay cartata qelqäsimash. Tayta Dios munashqannömi imaypis pay kawaykan. Kay cartata qamkunapaq qelqaykämü Tayta Dios kuyapaykäyäshushqaykita tantiyakuyänaykipaqmi. Mana ajayaypa imaypis payman yärakuyay.
[13] Babiloniacho kaykaq wawqi panikunami salüdunkunata apasikayämun. Paykunatapis qamkunatapis Tayta Diosmi akrayäshushkanki. Saynömi kuyashqä wawqi Marcuspis salüdunta apasikamun.
[14] Jukniki juknikipis wamayänakur qaqlaykikunacho musashpayki winchinakuyanki. Jesucristucho kaqkunapaqqa lapaykipaq ali kaway kaykuläsun. [Amén.]