[1] Jesucristupa wilakuyninta chaskikushna kaykarqa jusalikuyta kachariyayna. Ama lulakuyaysu, ama ali tukuyaysu, ama chikinakuyaysu ni wilachipis kayaysu.
[2] Iti wamra chuchunashqanno qamkunapis Tayta Diospa palabranta imaypis yachakuyay. Saynöpami imayka wamra winar tantiyakushqanno Tayta Dios munashqanno kawayänaykipaq tantiyakuyanki. Saypaqmi Tayta Dios salvayäshushkanki.
[3] Sayno yachakuyänaykipaqmi Tayta Dios kuyakuq kashqanta tantiyayashkankina.
[4] Jesucristuta runakuna manakaqman churayaptinpis cimientucho alinnin rumino kananpaqmi Tayta Dios churash. Sayno kaykaptinqa Jesucristuman yärakuyay.
[5] Qamkunapis rumino kayaptikimi Tayta Dios churaykäyäshunki templun kayänaykipaq y payta sirviq santu cürakuna kayänaykipaqpis. Saymi altarman churash sacrificiuno kashpansi lapan shonquykikunawan payta sirviyänayki. Jesucristupa yanapayninwan sirvirmi Tayta Diospa shonqunpaqno kayankipaq.
[6] Jesucristupaqmi Tayta Diospa palabranpis kayno nikan: “ Siónmanmi cimientupaq alinnin rumita churä. Say rumiqa akrashqami kaykan. Pipis payman yärakuq kaqqa manami manakaqlapaqsu yärakunqa”.
[7] Yärakuqkunapaqqa Jesucristo seqaypa kushikuypaqmi kaykan. Mana yärakuqkunapaqmi isanqa Tayta Diospa palabrancho kayno qelqaraykan: “Wayi sharkasiqkuna ‘kay rumi manami alisu’ nir jitariyashqanmi wayi esquïnan cimientuchöna churaraykan”.
[8] Mastapis kaynömi nikan: “Takakäsikuq y tunisikuq ruminömi kashaq”. Jesucristuman mana yärakuqkunaqa Tayta Diospa palabranta mana cäsukurmi say rumicho takakaqno kaykäyan. Sayno kayänanpaqmi destinash kayarqan.
[9] Qamkunami isanqa kaykäyanki Tayta Dios akrashqan runakuna, payta sirviq cürakuna, kuyashqan santa nación runakuna y paypa makincho kaykaq runakuna. Paymi sakäpakushno kawaykäyaptiki aksinman jorquyäshushkanki kuyakuq kashqanta pïmaytapis wilapäyänaykipaq.
[10] Nawpataqa manami Diospa wamransu kayarqayki. Kananmi isanqa wamrankunana kaykäyanki. Nawpataqa manami kuyapäyäshurqaykisu. Kananmi isanqa kuyapäyäshushkankina.
[11] Kuyay wawqi panikuna, kay pasacho qorpanöla kayaptikimi qamkunata ruwakü lutan yarpashqaykikunata mana rurayänaykipaq. Say yarpaykunaqa contraykikunami kaykan.
[12] Jesucristuta mana chaskikuqkunawan ali kawayay. Ali kawayashqaykita rikarmi manakaqkunata kanan jitapäyäshushpaykipis Jesucristo kutimunan junaq Tayta Diosta alabayanqa.
[13] Señor Jesucristuta pipis manakaqman mana churananpaq lapan mandayäshuqnikikunata cäsukuyay nación mandaq rey kaptinpis
[14] y autoridäkuna kayaptinpis. Autoridäkunatami rey churash mana ali ruraqkunata castigayänanpaq y ali ruraqkunapa favornin sharkuyänanpaq.
[15] Tayta Dios munan alilata rurar kawayänaykitami. Sayno kawayaptikiqa Diosta mana cäsukuq runakuna manami washaykita rimayanqanasu.
[16] Munayashqaykino kawayänaykipaq librimi kaykäyanki. Librina karpis ama jusalikuyankisu. Saypa trukanqa Tayta Diosta sirvir pay munashqannöla kawayanki.
[17] Lapan runakunatapis respitayanki. Yärakuq mayikikunawan kuyanakuyanki. Tayta Diosta mansapakuyanki. Reytapis respitayanki.
[18] Ashmaykuna, patronniki ali runa kaptinpis o yaqa kaptinpis respitar cäsukuyanki.
[19] Tayta Dios munashqanno kawayashqaykipita jusayuqtano nakasiyäshuptikipis ama jaqayäyaysu. Mana jaqayaypa kawarqa alitami ruraykäyanki.
[20] Lutanta rurayashqaykipita nakarqa ¿ima alitataq ruraykäyanki? Alikunata rurayashqaykipita nakarmi isanqa Tayta Diospa shonqunpaqno kawaykäyanki.
[21] Sayno nakayänaykipaqmi Tayta Dios qayayäshushkanki. Jesucristo noqansi rayku nakash kaptinmi tantiyakunsi pay nakashqanno noqansipis nakanansipaq kashqanta.
[22] Pay manami jusalikurqansu ni pitapis lulaparqansu.
[23] Runakuna ashliyaptinpis upälakurqanmi. Nakasiyaptinpis manami juraparqansu. Saypa trukanqa pitapis mana jananpaypa juzgaq Tayta Diospa makinmanmi kachaykurqan.
[24] Jesucristo cruzcho nakarmi noqansipa jusansipita wanurqan. Sayno wanurqan noqansipis jusalikuypaq wanur Tayta Dios munashqanno kawanansipaqmi. Yawarninta jicharmi aliyäsimashkansi.
[25] Nawpataqa oqrakash uyshanömi karqansi. Kananmi isanqa Jesucristupa makinchöna kaykansi. Paymi misimaqninsi y ali rikamaqninsi kaykan.