[1] Ancha munakusqay Gayo, ñoqa kurak runan, qanman qelqamuyki. Ñoqaqa cheqaq kaqpin munakuyki.
[2] Munakusqay wawqey, imaynan almaykipas llanllarishan, chay hinallataqmi tukuy imaymanapipas Diosqa llanllarichinasunkipaq, Diosman parlapushayki. Hinallataq qhalilla kanaykipaqwanmi Diosmanqa parlapushayki.
[3] Wawqe-panakunan hamuspanku, cheqaqpi kashasqaykimanta, hinallataq imaynatachus cheqaq kaqpi purishasqaykimantawan willawanku. Chaymi anchatapuni q'ochukurqani.
[4] Wawaykunaq cheqaq kaqpi purishasqankumantan uyarirqani. Chaymanta aswan ancha kusikuyniyqa manan kapuwanchu.
[5] Munakusqay wawqey, tukuy imaymanata wawqepanakunarayku, hinallataq mana reqsisqakunaraykupas ruwaspaykiqa, hunt'aq kayniykiwanmi ruwasqanki.
[6] Paykunan, iñiq t'aqaq ñawpaqenpi munakuyniykimanta sut'incharqanku. Sichus Diospaq kaqkunata hinapuni chay sut'inchaqkunata puriyninkupi yanapaykunki chayqa, allintan ruwanki.
[7] Diospa sutinta munakusqankuraykun, paykunaqa puririmurqanku. Mana-judío runakunamanta mana imatapas chaskikuspallankun puririmurqanku.
[8] Chay hina kaqtinqa, cheqaq kaqpi yanapakuqkuna kananchispaqqa, ñoqanchispas paykunata chaskinanchismi.
[9] Iñiq t'aqamanmi ñoqaqa qelqamurqani. Ichaqa paykuna ukhumanta, ñawpaq kaq kayta munapakuq Diotrefesmi mana chaskiyta munawarqankuchu.
[10] Payqa, millay simikunawanmi, yanqata k'amiwarqanku. Manataqmi chay k'amiwasqankuwanpas kusikunchu. Payqa wawqe-panakunatapas manan qorpachayta munanchu. Hinallataq qorpachay munaqkunatapas hark'akuspan, iñiq t'aqamanta paykunata qarqon. Chayrayku, sichus hamusaq chayqa, paypa ruwasqankunatan yuyarichimusaq.
[11] Munakusqay wawqey, ama mana allin kaqtaqa qatichikuychu. Aswanpas allin kaqllatapuni qatichikuy. Allin kaqta ruwaqqa, Diosmantan hamun. Mana allin kaqta ruwaqtaqmi, Diostaqa mana rikurqanchu.
[12] Llapa runakunan, hinallataq kikin cheqaq kaqpunin Demetriomantaqa allinta willakunku. Hinallataq ñoqaykupas paymantaqa kaqllatataqmi willakuyku. Willakusqayku cheqaqpuni kasqantapas yachankichismi.
[13] Ñoqaqmi askha imaymanakuna qelqamunaypaq kapuwarqan. Ichaqa tintawan, hinallataq qelqana phuruwanpas manan qelqamuyta munanichu.
[14] Aswanmi pisi p'unchaykunallamanta rikuykuyta munashayki. Hinan uya-uyapura rimasunchis.
[15] Thak kay qanwan kachun. Amigokunan napaykamusunkiku. Qantaq sapanka amigokunata sutinmantakama napaykunki.