[1] จ ม โล้ แบฆ้ะ ดี๊ ก ด๊างพื่งวี่ น่าง เฟบี. อ เว๊ เก โพล้ง ฌี้ แม้ เท่อ ดี๊ โพล้ง ทื๊ง ซยอง กแช่ แยว้ ลู่ง เฌง เคงครียา.
[2] พี่ อ เว๊ เก กแช่ เยซู คริ้ อ เท่อ นอ เกม๊า น ซื๊ง ฮะ นี่-อ้ะ บี่ ซุ้ โพล้ง แบ้ แยว้ เกิ้ง แม้ เว๊ ดี๊ แม้ช้า-อ้ะ ท้อง อ เว๊ แบ อ ซ้ะ. อ ไฌ่ บี่ อี้ง อ เว๊ เก ฌุ้พาง ลู่ง อ ฌี้ ดี๊ โพล้ง แอ แฌ้ ดี๊ แย้ ปะ.
[3] จ ท ยื่ง ซ้ะ ดี๊ น่าง ปรีซาคา ดี๊ อาคีลา พี่ อ แม้ ซกุ้ ฆึ กแช่ เยซู คริ้ อ เท่อ ดี๊ แย้.
[4] คี๊ง แฌ้ อี้ง นอ ซี๊ง ฌี้ ม๊า ฌี้ อางกี ล้าง อ ซ้ะ ม แม้ช้า แย้. จ ไจ้ะ บลึ้-อ้ะ เต้~ๆ ล เมะ ที่ แย้ ล แฌ้ แบ แบ เด้าะ โพล้ง ทื๊ง ซยอง กแช่ แยว้ พี่ ล เมะ เก ยู แบ กุ้ อ จอง ไจ้ะ บลึ้-อ้ะ ปะ.
[5] จ ท ยื่ง ซ้ะ ดี๊ โพล้ง ทื๊ง ซยอง เท่อ กุ้ อ แฌ้ พี่ อ เฌ๊ โอ ซยอง ลู่ง อ ซื๊ง เว๊ อ เด้า พ้า ปะ. จ ท ยื่ง ซ้ะ ดี๊ เอเปเนโต พี่ จ เอ-อ้ะ ดู มะ. อ เว๊ เก อ ต้องคู ล แฌ้ พี่ อ ชู่ง นะ กแช่ เยซู คริ้ ลู่ง ค่าง อาแซย.
[6] จ ท ยื่ง ซ้ะ ดี๊ น่าง มารียา พี่ อ แม้ เท่อ น้ะ ลู่ง น ซื๊ง ฌ่าง.
[7] จ ท ยื่ง ซ้ะ ดี๊ อางโดนีโค ดี๊ น่าง ยูนี พี่ อ เก โพล้ง ล ชื้อ ฆ่าง ดี๊ แย้ ดี๊ แบซุ้ ฆึ ดี๊ แย้. อ ซื๊ง เว๊ เก โพล้ง พี่ อ เม้ง ลื้อ แซ ท้อง ลู่ง กแช่ เยซู คริ้ อ เพล่ ดู ล แพ นอ อ แกล้ ดี๊ ชู่ง นะ เท่อ วี่ง แย้.
[8] จ ท ยื่ง ซ้ะ ดี๊ อางปลีอาโต พี่ จ เอ-อ้ะ ดู มะ ลู่ง กแช่ เยซู คริ้ อ กย้อง.
[9] จ ท ยื่ง ซ้ะ ดี๊ อูราบาโน พี่ อ แม้ ซกุ้ กแช่ เยซู คริ้ อ เท่อ ดี๊ เฆ้อ ดี๊ จ ท ยื่ง ซ้ะ ดี๊ ซตากู พี่ จ เอ-อ้ะ ดู มะ.
[10] จ ท ยื่ง ซ้ะ ดี๊ อาเปเล พี่ อ เนโพล ทาง อ ซ้ะ เก โพล้ง โต้ โพล้ง ล้อง ดี๊ กแช่ เยซู คริ้. จ ท ยื่ง ซ้ะ ดี๊ โพล้ง กุ้ อ แฌ้ พี่ อ โอ ลู่ง อารีโตบูโล อ เด้า พ้า.
[11] จ ท ยื่ง ซ้ะ ดี๊ เฮโรดี เก โพล้ง ล ชื้อ ฆ่าง ดี๊ แย้. จ ท ยื่ง ซ้ะ ดี๊ ก ด๊างพื่งวี่ ทื๊ง ซยอง เท่อ กุ้ อ แฌ้ พี่ อ โอ ลู่ง นาคีโซ อ เด้า พ้า.
[12] จ ท ยื่ง ซ้ะ ดี๊ น่าง ตรีเฟนา ดี๊ น่าง ตรีโฟซา พี่ อ แม้ กแช่ เยซู คริ้ อ เท่อ ดี๊ จ ท ยื่ง ซ้ะ ดี๊ น่าง เปซี พี่ จ เอ-อ้ะ ดู มะ. อ เว๊ แม้ เท่อ น้ะ ลู่ง กแช่ เยซู คริ้ อ ฌ่าง.
[13] จ ท ยื่ง ซ้ะ ดี๊ รูโฟ พี่ กแช่ เยซู คริ้ อางลึ นี่-อ้ะ. จ ท ยื่ง ซ้ะ ดี๊ อ มู่ พี่ อ เอ แย้ บี่ ซุ้ จ เก อ พูแคว๊.
[14] จ ท ยื่ง ซ้ะ ดี๊ อาซีงครีโต เฟโกง เฮอเม ปาโตบา เฮมา ดี๊ ด๊างพื่งวี่ อ แฌ้แพ กุ้ อ แฌ้ พี่ อ โอ ดี๊ อ ซื๊ง เว๊ ล แพ นอ.
[15] จ ท ยื่ง ซ้ะ ดี๊ ฟีโลโลโก ดี๊ น่าง ยูลี ดี๊ เนเร ดี๊ อ พื่ง มืง ดี๊ โอลีงปา ดี๊ กแช่ แยว้ อ พู อ ลี้ง กุ้ อ แฌ้ พี่ อ โอ ดี๊ อ ซื๊ง เว๊ ล แพ นอ.
[16] พี่ น ซื๊ง แด โละ ซ้ะ นอ ไคล้เดิง ไคล้ดุ้ โละ ซ้ะ ดี๊ ท เอ ท กวี้ง. โพล้ง ทื๊ง ซยอง กแช่ แยว้ กุ้ จอง ท ยื่ง ซ้ะ ดี๊ น ซื๊ง ปะ.
[17] ด๊างพื่งวี่ ซีง-เอ้อ จ อวีงซ้ะชู้ น ซื๊ง เกม๊า น ปโล่ ล้าง น ซ้ะ ดี๊ โพล้ง พี่ อ แม้ ที่พ้ะ ที่ล้าง น ซื๊ง ดี๊ เกม๊า โพล้ง อ ท ชู่ง ท นะ คู~ๆ ไค๊~ๆ. โพล้ง ล แพ อี้ง แม้ ไทะทะ ท ซอง ท ซ๊าง พี่ น นี่ แบ-อ้ะ. แม้ แบฆ้ะ ล้าง น ซ้ะ ดี๊ โพล้ง ล แพ อี้ง ล ฌี้.
[18] โพล้ง พี่ อ แม้ บี่ อี้ง ล แม้ กแช่ เยซู คริ้ อ เท่อ แบ แบ เด้าะ อ ซื๊ง เว๊ ช๊องมอง ที่ อ โฌ่งโพ๊ง อ ฌ่าง. อ ซื๊ง เว๊ เจ่ ท ไคล้ ลู่ง อ มึ อ พ้า อ เพา อ เบ้ อางโล๊ นี่ โพล้ง พี่ อ ชู่ง โพล้ง อ แฌ้แพ โย๊ น้ะ.
[19] โพล้ง กุ้ อ แฌ้ แน่ฌ๊า แบ เว๊ เย้า น ซื๊ง ชู่ง ท ฌี้ อ ไฌ่ เมาน่าง. ท บี่ นอ จ เซิง มึ ซ้ะ มึ ดี๊ น ซื๊ง เต้~ๆ. จ แบ ซ้ะ เกม๊า น ซื๊ง แม้ ท อ ฌี้ ซี กุ้ อ เม้ง แบ เด้าะ แม้ ท อ้า ล ซี แบ.
[20] ล ไยะ ล้า แบ กแช่ แยว้ พี่ อ เก ท มึ ท พ้า อ กแช่ ล แฌ้ นอ ม ไควะ ล้าง ม้างโค้ไล่ ลู่ง น คาง พ๊างละ เกม๊า น ไย่ บลิ้-อ้ะ. เกม๊า ก กแช่ เยซู คริ้ อ โก้ง อ โบ้ง อ บลึ้ อ บลาง โอ ดี๊ น ซื๊ง นอ ล้อ.
[21] ทีโมเท พี่ อ แม้ ซกุ้ เท่อ ดี๊ แย้ ท ยื่ง ซ้ะ ดี๊ น ซื๊ง. ลูกีโย ยาโซง ดี๊ โซซีปาโต พี่ อ เก ล ชื้อ ฆ่าง ดี๊ แย้ ท ยื่ง ซ้ะ ดี๊ น ซื๊ง ปะ.
[22] แย้ เตตี จ เก โพล้ง กวิ้ ไละ อี้ง ท ยื่ง ซ้ะ ดี๊ น ซื๊ง ลู่ง กแช่ เยซู คริ้ อ กย้อง.
[23] ไกโย พี่ จ โอ อ เด้า พ้า ดี๊ โพล้ง ทื๊ง ซยอง เท่อ เฌ๊ โอ ซยอง อ เด้า พ้า ล แฌ้ นอ อ เว๊ ท ยื่ง ซ้ะ ดี๊ น ซื๊ง. เอราโต พี่ อ เก โพล้ง ยู่แคว่ เฌง ฆ๊าง อ ค๊อง ดี๊ ก ด๊างพื่งวี่ กวาโต ท ยื่ง ซ้ะ ดี๊ น ซื๊ง.
[24] เกม๊า ก กแช่ เยซู คริ้ อ โก้ง อ โบ้ง อ บลึ้ อ บลาง โอ ดี๊ น ซื๊ง กุ้ อ แฌ้ นอ ล้อ. อาเมง.
[25] เกม๊า ก อางปฆ้า กแช่ แยว้ แด เทา. อ เว๊ เกม๊า น ซื๊ง โอ ดี๊ ท ชู่ง ท นะ เฌิ่ง~ๆ ค๊า~ๆ ซี บี่ ซุ้ ท ฌี้ อ ไฌ่ พี่ จ โล้ ล้าง อี้ง พี่ อ แบฆ้ะ ดี๊ กแช่ เยซู คริ้. อ อี้ง เก เท่อ พี่ อ โอ คิ้ซูง คิ้บีง ลู่ง อ ต้องคู เย้า แบ เด้าะ แบ ท แม้ โพล ทาง-อ้ะ.
[26] ค๊องเนง อี้ง เท่อ ลู่ง โม ไคล้ คิ้ กแช่ แยว้ กวิ้ ล้าง เว๊ นอ เกม๊า ท เมะ ท โต้ อี้ง โพล ทาง เติ้งต้าง ดี๊ กแช่ แยว้ พี่ อ โอ ม๊า ล้างชู้ ล้างแกย อางแม้เลา เว๊ เกม๊า โพล้ง กุ้ อ ชื้อ ซีงแฌ๊ ท เมะ ท โต้ อี้ง บี่ ซุ้ โพล้ง กุ้ อ แฌ้ ม ชู่ง ม นะ ดี๊ ม แม้ โพะ เว๊ อ ไค๊.
[27] เกม๊า ท อ ฆี๊ง อ แล้ อ โฌ่ง อ พ้าง โอ เว๊ ดี๊ กแช่ แยว้ ลู่ง กแช่ เยซู คริ้ อ กย้อง ครึ~ๆ. กแช่ แยว้ ล แฌ้ ล้อ โอ ดี๊ ท ซีงแฌ๊ แน่ฌ๊า กุ้ อ เม้ง อาเมง.