[1] ท บี่ นอ จ ด๊างพื่งวี่ ซีง-เอ้อ ลู่ง กแช่ แยว้ อ ท ย๊างเซิง ย๊างซ้ะ อ กย้อง นอ จ อวีงซ้ะชู้ เกม๊า น ซื๊ง เกล๊าง ล้าง ซ้ะ ดี๊-อ้ะ เก บี่ ซุ้ ท ลื่ง ทาง พี่ อ โอ ดี๊ ท ม๊า. เกม๊า น อางกี ล้าง ซ้ะ พี่ ม แม้ อ เท่อ ดี๊ ม แบ อ ซ้ะ อ นอ เก ท โบง ท แบ้ ลู่ง อ แบ พี่ น ซื๊ง เกิ้ง เทว๊ เอะ กแช่ แยว้.
[2] แม้ น ซื๊ง ซ้ะ บี่ ซุ้ โพล้ง ล ว๊าง แย๊ อี้ง ล ฌี้ แบ เด้าะ เกม๊า กแช่ แยว้ เปลง ไฆวะ น ซื๊ง บี่ ซุ้ น ท ช๊องมอง ดี๊ น เซิง น ซ้ะ ม โอ ทาง ก้ะ อ ซ๊าง. ฌ้อง น ซื๊ง ม ซีงแฌ๊ กแช่ แยว้ อ ซ้ะ ซี เมะ เว๊ ม ซีงแฌ๊ ท เม้ง เล้ ฌี้ ท เม้ง เล้ แบ อ ซ้ะ ดี๊ ท เม้ง เล้ ลู่ง อ เกิ้ง อ แบ.
[3] ลู่ง กแช่ แยว้ อ โก้ง อ โบ้ง อ บลึ้ อ บลาง พี่ อ เกล๊าง เอะ แย้ เย้า นอ จ ม โล้ เอะ น ซื๊ง กุ้ อ แฌ้ บี่ อี้ง อางกี ทาง โท๊ น ซื๊ง ซ้ะ พะ ไฆวะ ล ฌี้ แบ เด้าะ ช๊องมอง เท่อ ลู่ง น กแช่ อ ฌ่าง พี่ ม แบ อ เมาะ ท๊อง น ท ชู่ง ท นะ โอ พี่ กแช่ แยว้ เกล๊าง เอะ น ซื๊ง นอ.
[4] ก ล้อง ก ย่าง โอ ฆึ ดี๊ เท่อ ตบลึ้ เม้ง ดี๊ ล เม้ง แบ ล เม้ง แม้ เท่อ ล บี่ ซุ้ โละ ซ้ะ แบ.
[5] บี่ นอ อ ซุ้ ทึ เมะ ก โอ แอ แฌ้ ฌี้~ๆ ก เก บี่ ซุ้ โพล้ง ล แฌ้ ฆ่าง ลู่ง กแช่ เยซู คริ้ อ ซุ้. ก โอ ฆึ โละ ซ้ะ บี่ ซุ้ ล้องย่าง ล เม้ง แบ ล เม้ง พี่ ม แม้ช้า โละ ซ้ะ.
[6] เฆ้อ กุ้ อ แฌ้ ก โอ ดี๊ ท ซี ท แบ ล เม้ง แบ ล เม้ง พี่ กแช่ แยว้ เกล๊าง เอะ เฆ้อ ท๊อง เว๊ อ โก้ง อ โบ้ง อ บลึ้ อ บลาง โอ ดี๊ เฆ้อ นอ. ก เมะ นี่ แบ อ ท เกล๊าง ลู่ง ก ม ไคล้ คิ้ กแช่ แยว้ ซี นอ ก แบ ไคล้ ท๊อง ก ท ชู่ง ท นะ โอ นอ.
[7] เมะ แม้ช้า โพล้ง แบ้ แยว้ ซี นอ ก แบ แม้ช้า ล้อ. เมะ ซอง เท่อ ซี นอ ก แบ ซอง ล้อ.
[8] โพล้ง พี่ แม้ ชอง ทาง โพล้ง อ ซ้ะ ซี นอ แบ แม้ ล้อ. โพล้ง พี่ อ เกล๊าง เอะ โพล้ง อ เท่อ นอ แบ เกล๊าง ดี๊ ท เซิง โพล๊ ซ้ะ โพล๊ ล้อ. โพล้ง พี่ อ ยู่แคว่ เท่อ นอ แบ ยู่แคว่ เว๊ เมาน่าง ล้อ. โพล้ง พี่ อ ย๊างเซิง ย๊างซ้ะ แบ โพล้ง อ แฌ้แพ นอ แบ แม้ เว๊ ดี๊ ท เซิง มึ ซ้ะ มึ ล้อ.
[9] เอ โพล้ง ดี๊ เซิง ดี๊ ซ้ะ เต้~ๆ ไช้ะ. แช๊เมะ ดี๊ ท อ้า ท ซ๊าง ไช้ะ. อางกี นี่ เท่อ ลู่ง อ ฌี้ ไช้ะ.
[10] เอ โละ ซ้ะ ด้อง พื่ง ด้อง วี่ เมะ ฌี้ ไช้ะ. เฌาโละ ทื๊ง แบ นะ แบ โละ ซ้ะ ไช้ะ.
[11] แม้ เท่อ ไพ้ะ เท่อ เมะ ฆ้ะ ไช้ะ เกิง ล ฌี้. แม้ เอะ กแช่ แยว้ อ เท่อ เลา เซิง เลา ซ้ะ ไช้ะ.
[12] พี่ น มื้งแล่ เท่อ นอ เกม๊า น เซิง มึ ซ้ะ มึ. น เมะ แบ ท น้ะ ท โน๊ง นอ เกม๊า น โอ โก้ง-อ้ะ เก ดี๊ ชูแพ เท่อ ครึ~ๆ.
[13] น ด๊างพื่งวี่ พี่ อ เท่อ ล โอ แบ นอ น แบ อางน้าง เอะ อ เท่อ. น แบ เซิง โพล๊ ซ้ะ โพล๊ ดี๊ โพล้ง พี่ อ เฌ๊ น โอ.
[14] ชูแพ ไป๊ป้อง โพล้ง พี่ อ แม้ น้ะ แม้ โน๊ง แบ น ซื๊ง. ไป๊ป้อง-อ้ะ ชู-อ้ะ ล ฌี้.
[15] ซ้ะอวีง ซ้ะโทะ ฆึ ดี๊ โพล้ง พี่ อ โอ ดี๊ ท ซ้ะอวีง ซ้ะโทะ. ฌาง ฆึ ดี๊ โพล้ง พี่ อ ฌาง.
[16] เอ โพล้ง กุ้ อ แฌ้ บี่ ซุ้~ๆ. ชีอูงพู๊ น ซ้ะ ล ฌี้ แบ เด้าะ ชาง ล้าง น ซ้ะ นย่อง แม้ เท่อ ลู่ง อ พือ. ไจ้ะ ล้าง น ซ้ะ แซย๊ ล ฌี้.
[17] โพล้ง เมะ แม้ อ้า แม้ ซ๊าง น ซื๊ง ล แฌ้~ๆ นอ แม้ ช๊า ไท้-อ้ะ ล ฌี้. เฌา แม้ เท่อ พี่ โพล้ง กุ้ อ แฌ้ แคว่ เว๊ เก ท อ ฌี้.
[18] แม้ ท กุ้ อ เม้ง ท๊อง น ม แม้-อ้ะ ซี บี่ ซุ้ น ม โอ ฆู๊ง โอ พุ้ ดี๊ โพล้ง กุ้ อ แฌ้.
[19] จ ฌุ้พาง ซีง-เอ้อ แม้ แก ไท้ เท่อ ล ฌี้ แบ เด้าะ เกม๊า กแช่ แยว้ แม้ เตา แม้ แต๊-อ้ะ. อ ไฌ่ บี่ อี้ง ไละ ฌี้ ไละ แอว้ ไจ้ะ เว๊ "แย้ จ ม แม้ แก ไท้ ท อ้า ท ซ๊าง. แย้ จ ม แม้ ช๊า ไท้-อ้ะ. กแช่ แยว้ ไจ้ะ เว๊ บี่ นอ".
[20] แบ เด้าะ แม้ บี่ ซุ้ ไละ ฌี้ ไละ แอว้ โล้ เว๊ " โพล้ง แช๊เมะ ไฌ๊ซ้ะ ดี๊ แน้ เมะ ซู๊ อาง ซ้ะ เท่อ นอ ลื่ง อาง-อ้ะ เมะ ซู๊ โอ้ ซ้ะ ที๊ง นอ ดึ้ โอ้-อ้ะ. น เมะ แม้ เอะ-อ้ะ บี่ อี้ง นอ อ เว๊ ม ฌางแช้ ล้าง อ ซ้ะ".
[21] เกม๊า ท อ้า ท ซ๊าง น้า น ซื๊ง ล ฌี้ แบ เด้าะ แม้ น้า ท อ้า ท ซ๊าง ดี๊ ท อ ฌี้ นอ ล้อ.