[1] Badha reng-oreng Farisi ban oreng Saduki nyabis ka Isa. Reng-oreng jareya andhi' maksod ajebbaga Isa, daddi laju menta sopaja Isa mabadha kaajiban kaangguy abukteyagi ja' Salerana pajat dhari Allah.
[2] Dhabuna Isa, [“Mon la compet are, ba'na ngoca', ‘Are bakal bagusa, sabab langnge'na, mera.”
[3] Ban e baja laggu, ba'na ngoca', ‘Are teya ojana, sabab langnge'na mera ban ondhem.’ Daddi ba'na tao nebbak kabadha'anna are kalaban ngabas ka langnge', tape ba'na ta' tao nebbak dha-tandhana jaman!”]
[4] “Ce' jahadda ban ce' darakana onggu reng-oreng jaman sateya reya. Ba'na menta sopaja Sengko' mabadha kaajiban. Ba'na ta' eberri'ana kaajiban settonga balakka' salaenna kaajibanna Nabbi Yunus.” Samarena adhabu kantha jareya Isa nyengla dhari jadhiya.
[5] E bakto la alengka talaga, red-moredda Isa buru tao ja' kabbi padha loppa ta' ngeba roti.
[6] Isa adhabu, “Pate-ngate ka ragina reng-oreng Farisi ban Saduki.”
[7] Ngedhing dhabuna Isa jareya, red-moredda padha saleng ngoca' kantha reya, “Guru adhabu kantha jareya polana sengko' ban ba'na tadha' se ngeba roti.”
[8] Isa ngagali ka se ekacaca red-moredda jareya, daddi pas adhabu, “Arapa ba'na ma' acaca parkara se ta' andhi' roti? Ba'na gi' ta' pate parcaja!
[9] Masa' ba'na gi' ta' ngarte? Apa ba'na ta' enga' e bakto Sengko' thok-ngetthok roti se lema meggi' se epakannagi ka oreng se lema ebu rowa? Barampa budhak karena roti se epakompol bi' ba'na?
[10] Ban baramma roti se papetto' se epakannagi ka oreng se pa' ebu rowa? Barampa budhak karena kakanan se epakompol ba'na?
[11] Arapa ba'na ma' sampe' ta' ngarte ja' Sengko' ta' acaca parkara roti ka ba'na? Pate-ngate ka ragina oreng Farisi ban Saduki!”
[12] Dhi-budhina red-moredda ngarte ja' Isa makon te-ngate banne ka ragi se eangguy agabay roti, tape ka pangajaran-pangajaranna reng-oreng Farisi ban Saduki.
[13] Isa meyos ka dhaera e seddi'na kottha Kaisareya Filipi. E jadhiya Salerana laju mareksane ka red-moredda, “Ca'na oreng, sapa Pottrana Manossa rowa?”
[14] Red-moredda mator, “Badha se ngoca' Yahya Pambaptis. Badha jugan se ngoca' Eliya. Se laen ngoca' Yeremiya, otabana sala settong dhari para nabbi.”
[15] “Tape mon ca'na ba'na, sapa Sengko' reya?”
[16] Simon Petrus nyaot, “Junandalem Rato Panyalamet, Pottrana Allah Se Odhi'.”
[17] “Pojur onggu ba'na, Simon ana'na Yona!” dhabuna Isa. “Sabab banne manossa se malae ba'na, tape Tang Rama se jumenneng e sowarga.
[18] Daddi ba'na kodu tao, ba'na reya Petrus, bato karang se kowat. Ban e attassa dhasar bato karang reya Sengko' maddegga Tang gereja se ta' bisa epakala maske bi' maot sakale!
[19] Bi' Sengko' ba'na eberri'ana koncina Dunnyana Allah Se Anyar. Apa se elarang ba'na e bume, elarang keya e sowarga. Ban apa se ebendherragi bi' ba'na e bume, ebendherragi keya e sowarga.”
[20] Saellana jareya Isa maenga' sopaja red-moredda ta' abala ka sapa'a bai ja' Salerana jareya Rato Panyalamet.
[21] Molae dhari jareya, Isa adhabu rang-terrangan ka red-moredda, “Sengko' masthe entar ka Yerusalim ban bannya' nanggung kasangsara'an dhari pin-pamimpin, mam-imam kapala ban ru-guru agama. Sengko' bakal epateyana, tape e are se kapeng tello' Sengko' bakal epaodhi'a pole.”
[22] Bi' Petrus Isa etaja' ka penggir laju mator, oca'na, “Moga-moga se kadi gapaneka ejauwagiya sareng Allah, Guste! Ja' kantos Junandalem ngalame kadaddiyan kadi gapaneka, Guste!”
[23] Isa atole ka Petrus laju adhabu, “Ondur ba'na, Se Panggudha! Ba'na lang-ngalange Sengko'. Pekkeranna ba'na jareya pekkeranna manossa; banne pekkeranna Allah!”
[24] Saellana jareya Isa pas adhabu ka red-morreda, “Pa'-sapa'a se noro'a Sengko', kodu paloppa ka kaparlowanna dibi', mekol salibba, pas terros noro' Sengko'.
[25] Sabab oreng se arebbu' odhi'na, bakal kaelangana odhi'na. Tape oreng se ngorbannagi odhi'na polana Sengko', bakal nemmowa odhi'na jareya.
[26] Apa ontongnga oreng se ngaandhi' saantero dunnya tape kaelangan odhi'na? Ba' ekennenga odhi' reya eporop bi' apa'a bai?
[27] Sabab ta' abit pole Pottrana Manossa bakal dhatengnga kalaban kobasana Ramana abareng ban kat-malaekadda. E bakto jareya Pottrana Manossa bakal malessa ka sakabbiyanna oreng menorot lalakonna bang-sebang.
[28] Ba'na ebala'ana ya! E antarana ba'na se badha e dhinna' reya badha se ta' kera mate, sabellunna nangale'e Pottrana Manossa rabu menangka Rato.”