[1] Yusup ta' kowat pole ngampet panggaliyanna e adha'na ba-ponggabana. Daddi laju epakon nyengla kabbi dhari jadhiya, sopaja salerana ngennenga notorragi ka tan-taretanna sapa salerana se sabendherra.
[2] Saellana kabbi padha nyengga Yusup laju molar epakaja, sampe' ekaedhing reng-oreng Messer se badha e lowar, ban kabar jareya sampe' kapeyarsa ka karaton.
[3] Yusup adhabu ka tan-taretanna, “Sengko' reya Yusup. Eppa' gi' odhi', ya?” E bakto ngedhing parkara jareya tan-taretanna ce' tako'na sampe' ta' ngenneng nyaot.
[4] Yusup laju adhabu, “Mara dha' enna'.” Tan-taretanna jareya nyander, ban Yusup laju adhabu pole, “Sengko' reya Yusup, se bi' ba'na ejuwal ka Messer rowa.
[5] Ella ja' tako' ban ja' nyala'agi aba'na polana ba'na ajuwal sengko'. Sabendherra Allah dibi' se abakta sengko' dha' enna' epajangadha'i ba'na kaangguy masalamedda oreng se bannya'.
[6] Sateya reya jaman laep gi' buru olle dhu taon; gi' lema taon aggi' oreng ta' kera nyalaga ban ta' kera anye.
[7] Allah se abakta sengko' dha' enna' ajangadha'i ba'na, polana masalamedda ba'na kalaban jalan se makasambu' ate reya, sopaja ba'na ban toronanna odhi'a terros.
[8] Daddi sanyatana banne ba'na se mowang sengko' dha' enna', tape Allah se abakta sengko'. Sengko' epadaddi ponggabana rato se paleng tenggi e Messer. Sengko' epassrae kakobasa'an ngoros roma tanggana ban sabingkerra nagara Messer.
[9] Sateya kassa' ba'na kabbi duli mole; atorragi ka eppa' ja' Yusup, pottrana, apessen kantha reya, ‘Kaula bi' Allah epadaddi pangobasana saantero nagara Messer; ngereng sampeyan enggal meyos ka Messer.
[10] Sampeyan kengeng alenggi e dhaera Gosyen, Pa', semma' sareng kaula; sampeyan, tra-pottrana sareng ja-bajana, dumba sareng embi'na, sape sareng ponapa'a saos kaagunganna sampeyan.
[11] Manabi sampeyan alenggi e Gosyen, kaula bisa ajaga sampeyan. Mosem laep paneka gi' abit, gi' kare lema taon aggi'. Kaula terro sopaja sampeyan sabala, jugan sareng ebinna, ja' kantos kakorangan pa-ponapa.’ ”
[12] Yusup adhabu pole, “Sateya ba'na padha nangale'e dibi', bariya keya ba'na, Benyamin, ja' sengko' reya Yusup onggu.
[13] Atorragi ka eppa' saapa rajana tang kakobasa'an e dhinna', e Messer reya, ban careta'agi ka eppa' pa-apa se etangale'e ba'na. Mon la mare, pas duli abali, eppa' giba dha' enna'.”
[14] Saellana jareya Yusup agellu' Benyamin, ale'na, laju molar. Benyamin nanges keya sambi agellu' Yusup keya.
[15] Saellana jareya, sambi gi' molar, Yusup agellu' tan-taretanna sarta eseyom gan settong. Saellana jareya tan-taretanna molae acaca ban Yusup.
[16] E bakto rato e karaton meyarsa kabar ja' tan-taretanna Yusup padha dhateng, rato ban ba-ponggabana padha noro' perak kabbi.
[17] Rato laju adhabu ka Yusup, “Kassa' tan-taretanna ba'na soro ngeba gandum, soro buwa' ka mar-hemarra, pas soro mole ka Kana'an,
[18] soro ngone'e eppa'na ban la-balana, soro ngalle dha' enna'. Bi' sengko' eberri'ana tana se paleng bagus e Messer; eppa'na ba'na sabalana bakal odhi'a ta' kakorangan, la'-mala' bi-talebbi dhari hasella tanana e dhinna'.
[19] Dhari dhinna' tan-taretanna ba'na pagibai ta-kareta, me' olle etompa' binena ban na'-ana'na se gi' ne'-kene', ban epangone'e eppa'na.
[20] Rang-barangnga se ta' ekenneng giba soro dina; sabab pa-apa se paleng bagus e sanagara Messer bakal ekaandhi'a eppa'na ba'na ban tan-taretanna.”
[21] Tra-pottrana Yakub ajalannagi dhabuna rato jareya. Bi' Yusup eparenge pan-barampan kareta, menorot dhabuna rato, bariya keya sango se ekaparlo e jalan.
[22] Tan-taretanna jareya padha eparenge kalambi anyar sasettel ebang, tape Benyamin eparenge tello ratos pesse salaka ban kalambi anyar lema settel.
[23] Eppa'na ekereme hemar lake' sapolo meggi' se ebuwadi rang-barang se paleng bagus e Messer, ban hemar babine' sapolo meggi' se ebuwadi gandum, roti ban kakanan laenna se edha'ara eppa'na dhalem parjalanan ka Messer.
[24] Saellana jareya Yusup ngaterragi tan-taretanna se mangkada, sambi adhabu, “Ja' atokaran e jalan.”
[25] Tan-taretanna Yusup jareya padha mangkat dhari Messer, mole ka Kana'an, ka eppa'na.
[26] “Yusup gi' odhi', Pa'!” ca'na reng-oreng jareya ka eppa'na. “Samangken ngobasane sanagara Messer!” E bakto meyarsa kabar jareya Yakub tababeggen ban ta' parcaja.
[27] Tape saellana tra-pottrana notorragi sakabbinna se edhabuwagi Yusup, ban e bakto ngoladi ta-kareta se ekeremmagi Yusup epangoneyana eppa'na ka Messer, Yakub pas cengngar pole.
[28] “Tang ana' gi' odhi'!” dhabuna. “Pera' jareya se ekaterrowe sengko'! Sengko' entara ngabas tang ana' sabellunna sengko' mate!”