[1] Petthe Parjanjiyan jareya esaba' e dhalem kemah se la esadhiya'agi bi' Daud. Reng-oreng jareya laju ngatorragi kurban obbaran ban kurban salameddan ka Allah.
[2] Saellana Daud mare se ngatorragi ban-kurban jareya, laju aberkadi ra'yadda bit asmana PANGERAN,
[3] pas gi-magi kakanan ka reng-oreng jareya kabbi. Saneyap oreng se badha e jadhiya, lake' otaba bine' padha olle bagiyan daging panggang sakerra', roti ban jajan kismis.
[4] Daud ngangkat pan-barampan oreng Lewi epamimpin opacarana kabakteyan ka PANGERAN, Allahna Isra'il, e adha'na Petthe Parjanjiyan jareya, ngangguy nyanyeyan ban ji-pojiyan.
[5] Asaf epele epadaddi pamimpin otama ban Zakhariya bakkella. Yeiyel, Semiramot, Yehiyel, Matica, Eliyab, Benaya, Obed-Edom ban Yeiyel epanabbu calempong; Asaf epanabbu simbal,
[6] ban imam kadhuwa, iya areya Benaya ban Yahaziyel epateptep epanope tarompet e adha'anna Petthe Parjanjiyan jareya.
[7] Jareya se dha'-adha'na Daud makon Asaf ban reng-oreng sakaomma anyanye gu-lagu se amolja'agi PANGERAN.
[8] Mara padha asokkor ka PANGERAN, berta'agi kaagunganna; careta'agi ka sa-bangsa sabarang se elampa'agi Salerana.
[9] Nyanyeyagi ji-pojiyan ka PANGERAN, careta'agi sabarang se elampa'agi Salerana se makasambu' atena manossa.
[10] Salerana jareya PANGERAN Se Settong; mara paperak atena sabab sengko' ban ba'na reya kaagunganna; pa'-sapa'a se nyemba ka Salerana mara padha anga-bunga.
[11] Nyo'on bantowanna, semba Salerana salanjangnga.
[12] He toronanna Yakub, abdina Allah! He toronanna Isra'il ommat peleyanna! Kaenga'e sakabbinna kaajiban se elampa'agi Salerana, ja' kaloppae kapotosan-kapotosanna.
[14] PANGERAN reya Allahna sengko' ban ba'na, kapotosanna kodu etoro' bi' saessena dunnya.
[15] Salerana emot terros ka parjanjiyanna, janji jareya elampa'agi salanjangnga.
[16] PANGERAN abadhi parjanjiyan jareya ban Ibrahim, saellana jareya ban Ishak
[17] laju epakoko ban Yakub epadaddi parjanjiyan se langgeng kaangguy ommat Isra'il.
[18] Dhabuna, “Tana Kana'an bi' Sengko' ebagiya ka ba'na epadaddiya tana sangkolanna ba'na.”
[19] Lamba' ommadda Pangeran daddi oreng manca e dhissa', bannya'na ta' saapa.
[20] Reng-oreng jareya alalana dhari bangsa se settong ka bangsa laenna, dhari nagara se settong ka nagara laenna.
[21] Tape Pangeran ta' ngedine oreng settonga nendhes reng-oreng jareya; Sopaja ommadda salamedda, to-rato eparenge parengeddan,
[22] “Ja' la-salae reng-oreng peleyan Sengko', ja' alako juba' ka bi-nabbi otosan Sengko'.”
[23] Mara, padha anyanye amolja'agi PANGERAN, saantero bume! Sabban are kabarragi kabar gumbira ja' Salerana la masalamet sengko' ban ba'na.
[24] Careta'agi kaagunganna ka sa-bangsa, ban sakabbinna lalakon se kowat kobasa se elampa'agi Salerana ka ommat manossa.
[25] Sabab PANGERAN reya agung ban ce' moljana; Salerana kodu ekatako'e ngalebbi'i ba-diba.
[26] Ba-dibana bangsa laen coma arca brahala, tape PANGERAN se nyepta'agi langnge'.
[27] Salerana katotoban kamolja'an ban kaagungan, dalemma possa' ban kobasa tor kagumbira'an.
[28] Molja'agi PANGERAN, he ommat manossa! Poji kaagunganna ban kakowadanna.
[29] Poji asmana se molja, giba kurban ka dalemma. Semba PANGERAN kalaban ngangguy kalambi kabakteyan!
[30] Pangetter e ajunanna, he saantero dunnya! Bume koko ta' ekenneng gundhek sakone'a.
[31] He langnge' ban bume, mara anga-bunga! Kabala ka sa-bangsa ja' PANGERAN reya Rato se saongguna.
[32] Mara agarudhu', he tase' ban saessena! Mara anga-bunga, he teggal ban men-tamennanna!
[33] Ka'-bungka'an e alas padha asoraga sabab PANGERAN la rabu marenta'a bume reya.
[34] Mara asokkor ka PANGERAN, sabab Allah reya becce'; bellas asena tadha' ambuna.
[35] Mara ngoca', “Adhu, GUSTE Allah, Panyalamet kaula, nyo'ona salamet abdidalem, Guste, dhari sadajana sa-bangsa e bume, sarengngan abdidalem sadaja pakompollagi pole sopaja kengenga asokkor e dhalem ate sareng moji asmaepon Junandalem se socce!”
[36] Molja'agi PANGERAN, Allahna Isra'il, sateya ban salanjangnga! Saellana jareya ommat Isra'il padha ngoca' kabbi, “Amin”, sarta laju amolja'agi PANGERAN.
[37] Saellana jareya Rato Daud makon Asaf ban reng-oreng Lewi laenna sopaja teptep ngoros sabarang se badha hubunganna ban kabakteyan e kennengngan panyempennanna Petthe Parjanjiyanna PANGERAN. Sabban are reng-oreng jareya kodu ngalakone kawajiban e jadhiya,
[38] etolonge bi' Obed-Edom ana'na Yedutun, sarta oreng laenna se sakaom ban aba'na se bannya'na sabidak ballu' oreng. Obed-Edom ban Hosa reya tokang jagana bang-labang saketheng.
[39] Tape Imam Zadok ban mam-imam laenna epakon teptep ngoros kabakteyan e kennengnganna kabakteyan e Gibeyon.
[40] Sabban gi' laggu ban lem-malem reng-oreng jareya kodu ngatorragi kurban obbaran e attas mezba menorot kom-hokom se eparengngagi PANGERAN ka oreng Isra'il.
[41] Imam Zadok ban mam-imam jareya etolonge Heman ban Yedutun sarta reng-oreng laenna se epele malolo kaangguy anyanye pojiyan ka PANGERAN lantaran bellas asena se langgeng.
[42] Heman ban Yedutun se epangoros keya tarompet, simbal ban kas-pakakassa mosik laenna se etabbu kaangguy noro'e gu-lagu pojiyan. Ta-anggotana kaomma Yedutun epajaga bang-labang saketheng.
[43] Saellana jareya reng-oreng jareya padha mole kabbi ka bengkona bang-sebang. Bariya keya Daud gubar parlo ngoladana kalowargana.