[1] Rato Daud aparembagan ban sakabbinna parwirana se mimpin kasatuwan-kasatuwanna saebu oreng ban kasatuwan-kasatuwanna saratos oreng.
[2] Daud laju adhabu ka reng-oreng jareya kabbi, “Mon ba'na padha saroju', ban mon ekarsa'agi bi' PANGERAN, Guste Allah se esemba sengko' ban ba'na, mara ngerem otosan ka para imam ban reng-oreng Lewi e sa-disana, ban ka sakabbinna tang bangsa se laen, balai soro akompol dha' enna'.
[3] Saellana jareya mara kone'e Petthe Parjanjiyanna Allah, se ta' eparduli saabidda pamarenta'anna Saul.”
[4] Reng-oreng Isra'il se akompol jareya padha perak ngedhing usul jareya ban padha saroju' kabbi.
[5] Daddi Daud makompol ra'yat Isra'il sanagarana, dhari batessa Messer e bagiyan lao' sampe' ka Jalan Hamat e bagiyan dhaja, ngoneyana Petthe Parjanjiyan jarowa dhari Kiryat-Yearim, egiba'a ka Yerusalim.
[6] Saellana jareya Daud laju meyos ban reng-oreng jareya ka kottha Ba'ala, iya areya Kiryat-Yearim, e dhaerana suku Yehuda, ngoneyana Petthe Parjanjiyanna Allah. Petthe jareya enyamae “PANGERAN se alenggi e attassa rub-kerub”.
[7] Sanapa'na ka Ba'ala, Petthe Parjanjiyan jareya epondhut dhari compo'na Abinadab, pas epaongga ka attas jikar se anyar. Uza ban Ahyo noro' bunte' jikar jareya,
[8] dineng Daud ban bangsa Isra'il padha atari ban anyanye ngormadi Allah; se atari ban se anyanye ce' samangadda, sambi etoro'e calempong, terbang, simbal ban tarompet.
[9] Sanapa'na ka kennengnganna panggebba'anna gandum andhi'na Kidon, pe-sape se narek jikar jareya tatandhung, Uza ajangngo nyandhak Petthe Parjanjiyan jareya sopaja ta' gaggara.
[10] E bakto jareya keya PANGERAN duka ka Uza lantaran Uza nyedding Petthe jareya. Uza laju epate'e e jadhiya. Daddi molae dhari bakto jareya kennengngan buru enyamae “Peres-Uza”. Daud duka polana PANGERAN mamate Uza.
[12] Tape Daud tako' keya ka Allah, laju adhabu, “Sateya baramma sengko' se ngeba'a Petthe Parjanjiyan reya?”
[13] Daddi bi' Daud Petthe Parjanjiyan jareya burung ta' ebakta ka Yerusalim, tape esempen e bengkona Obed-Edom, oreng Gat.
[14] Petthe jareya edina e jadhiya sampe' tello bulan abidda ban PANGERAN aberkadi kalowargana Obed-Edom ban sabarang dhi'-andhi'na.